EBINDU ebyosi ebyuwene ebyathuwithe bikalhua eyiri Nyamuhanga. Mwakolha eryuba erithuha ekyakakalha omw’ithungi, n’okwezi, n’esyangununu thwangabana ekyakakalha omwa kiro. Kandi Nyamuhanga mwathukolera ekihugho thwanga kikalhako.

Aliriryo eryuba, n’okwezi, esyangununu n’ekihugho sibya byabya bindu by’erimbere Nyamuhanga erihangika. Wunasi ekyabya eky’erimbere? Nyamuhanga mwatsuka erikolha abandu abali ng’iyo. Sithwangalhangira abandu bano, ngokwa thuthe thwangalhangira Nyamuhanga. Omwa Biblia abandu bano bakahulhawa mw’abamalaika. Nyamuhanga mwakolha abamalaika er’ikalha nayu elhubulha.

Omumalaika oyo Nyamuhanga atsuka erikolha abya wambaghane. Abya Mughalha wa Nyamuhanga ow’erimbere, kandi mwakolha haghuma na Thatha wiwe. Mwawathikya Nyamuhanga erikolha ebindi bindu byosi. Mwawathikya Nyamuhanga erikolha eryuba, okwezi, esyangununu kandi n’ekihugho kyethu.

Ekihugho kyabya kithi omughulhu oyo? Okwa nzuko sihabya mundu oyuwang’ikere okwa kihugho. Simwabya kindu erilhusyako engetse nene ey’amaghetse awabya akaleretha okwa kithaka. Aliriryo Nyamuhanga aby’anzire abandu bikale okwa kihugho. Neryo mwatsukiraho erithutheghekera ebindu. Mwakolha ki?

Eky’erimbere, ekihugho kyabya kiyithaghire ekyakakalha. Lithya Nyamuhanga mwakolha ekyakakalha erilhua okwa lyuba kyanga kolerya okwa kihugho. Mwakolha kyo hathoke eribya endambi y’ekiro n’endambi y’erithungi. Enyuma waho Nyamuhanga mwaleka ekithaka ikyahulhuka eyighulhu y’amaghetse aw’engetse nene.

Erimbere sihabya kindu kyosi-kyosi okwa kithaka. Kyabya kisosire ng’ekisasani ekya wulhangire hano. Sikwabya bimole kutse mithi kutse bisoro. Omwa ngetse simwabya nomwa lyangabya erihere. Nyamuhanga abya inyakina withe mubiiri munene ow’erikolha eriyira ekihugho mwa kibuya ahabw’ebisoro n’abandu erikalhako.