HANO abalhume baka kaka abandu erikolha. Thasamalira omulhume oyuka swiraya omughuma w’okw’abakoli omwa munyamba! Abakoli ni b’ekithunga kya Yakobo, kandi bakahulhawa mw’Abaisraeli. N’abalhume abaka bakaka erikolha ni banya Misiri. Abaisraeli babiribya bakobe b’abanya Misiri. Eki mukya thokekana kithi?

Erihiika inene lya Yakobo muly’ikalha e Misiri omwa buholho ahabw’ebirimo bingi. Yozefu, oyuwabya mulhume w’ekitsumbi e Misiri kandi ini wakabiri oku mwami Farao, inyaka batsomana. Aliriryo ibbwa Yozefu mwaholha. Neryo Farao omuhya-muhya oyuthabya anzire Abaisraeli, mwabya mwami we Misiri.

Neryo ya Farao omubi oyu mwakolha Abaisraeli mwa bakobe. Neryo mwabahira ahisi sy’obuthoki bw’abalhume abatsibu kandi abathekwa obulighe. Ibaka kaka Abaisraeli erikolha kutsibu erihimba emiyi ya Farao. Aliriryo kandi emighanzo y’Abaisraeli iyikabya iyina mukanyirira. Habere halhaba buthuku, abanya Misiri mubakwa obuba bathi Abaisraeli bangabere bangi kandi abakaghalha kanene.

Wunasi ekya Farao abya kolire? Mwabugha n’abakali ababya bakabuthisya abakali Abaisraeli, athi: ‘Mutholere imw’itha obuli mwana w’obulhume oyuka buthawa.’ Aliriryo aba babya bakali babuya, isibang’itha esyamekeke.

Neryo Farao mwaha ekiraghiro ky’abandu biwe abosi athi: ‘Mwimaye esyamekeke sy’obulhume n’eritha syo. Aliriryo muleke esyamekeke sy’obukali sibyeho.’ Eki sikyabya kiraghiro eky’akabi? Thuthalebya omughuma w’okwa syamekeke sy’obulhume ngokwa aby’alhamire.