WANAMALHANGIRA aba Dina akaya balhamira? Akaya lebaya abaghuma b’okw’abambesa abikere omwa kihugho kye Kanana. Thatha wiwe ya Yakobo angana tsemire busana n’eki? Eriwathikya erisubirya ekibulyo eki, wibuke ekya Abrahamu na Isaka balengekanaya okw’abakali be Kanana.

Abrahamu mwan’anza mughalha wiwe Isaka akathahya omumbesa owe Kanana? Eyihi, mwathanza. Ya Isaka na Rebeka mubananza mughalha wabu Yakobo akathahya omumbesa owe Kanana? Eyihi, mubathanza. Wunasi nga ni busana naki?

Kyabya kithya kusangwa abandu be Kanana babya bakaramya esyanyamuhanga esyamabehi. Si babya abandu buwene ab’erithahibwa nabo kutse erithahyako, kandi si babya abandu buwene ab’erikolha mwa banywani ab’okwandungu. Busana n’ekyo thukaminya ahathe erithika-thika indi Yakobo syanga tsemire akowa indi mwali wiwe ane mukolha obunywani n’abambesa be Kanana.

Omwa kwenene, Dina mwawa omwa butsibu. Wanamalhangira omulhume we Kanana omwa kisasani oyusamalire Dina? Erina liwe ni Sekemu. Kiro kighuma omughulhu Dina asa okwi balhama, Sekemu mwathwalha Dina n’erimukaka aghotsere nayu. Eki kyabya kibi, kusangwa abalhume abathahirye n’abakali abathahibwe basa ba batholere erighotsera haghuma. Ekindu kibi eki ekya Sekemu akolha oku Dina mukya letha ebindi bitsibu bingi.

Omughulhu baghalha babu Dina bowa ekyabya kyabere, mubahithana kutsibu. Ababiri okw’ibo, ya Simioni na Lawi, mubaghalirwa kutsibu indi mubahamba emiyali n’erighenda omwa muyi n’eribawako kitsumbukirania. Ibo n’abaghalha babu mubitha Sekemu n’abandi abandu bosi. Yakobo mwaghalirwa kusangwa baghalha biwe mubakolha ekindu kibi eki.

Ekitsibu eki kya tsuka kithi? Kyabya kusangwa Dina mwa kolha obunywani n’abandu abathabya bakasikya ebiraghiro bya Nyamuhanga. Si thwanzire thukabya n’abanywani ng’abo, kwa kithe?