WUNASI abalhume Yakobo akakanaya nabu aba nga nibahi? Abere abirighunza ebiro bingi anemughenda, Yakobo mwabeya okwa kidiba. Babya bakatheya esyambuli syabu. Yakobo mwabulyabo athi: ‘mukalhua hayi?’

Mubabugha bathi, ‘Thukalhua e Harani.’

Yakobo mwababulya athi: ‘Munasi Labani?’

Muba subirya bathi: ‘Inga. Lebaya, na Rakeli mwali wiwe yolya ane mwasa n’esyambuli siwe.’ Wanamalhangira Rakeli akasira erya?

Yakobo abere alhangira Rakeli n’esyambuli sya nyinya lhume wiwe ya Labani, mwaghenda n’eriyakumbaghalya eribwe eryabya okwa kidiba neryo esyambuli syanganywa. Neryo Yakobo mwa lyatsirira Rakeli n’erimubwira iyo nga nindi. Rakeli mwatsema kutsibu, neryo mwaghenda eka n’eriyabwira thatha wiwe Labani.

Labani mwatsema kutsibu er’ikalha na Yakobo. Neryo omughulhu Yakobo asaba erithahya Rakeli, Labani mwatsema. Aliriryo, mwabwira Yakobo athi amukolere ebirimo irinda habwa Rakeli. Kusangwa Yakobo aby’anzire Rakeli ya kutsibu mwakolha eki. Aliriryo obuthuku bwabere bwahika obw’eriherukya, wunasi ekyabya kyabere?

Labani mwaha Yakobo ya mwali wiwe omukulhu ya Lea omumwanya w’erimuha Rakeli. Yakobo abere ikiriraya erithasya kolera Labani y’ebirimo ebindi irinda, Labani mwamuha kandi ya Rakeli nga mukali wiwe. Omwa buthuku obo Nyamuhanga mw’ikirirya abalhume eribya n’abakali bangi. Aliriryo hathya, ngokwa e Biblia yikakanganaya, omulhume atholere inyabya n’omukali mughuma.