WANAMALHANGIRA ekiri hano? Aba b’abalhume Abaisraeli abosi abakalhwa. Abalhume abunamire ahisi bakanywa. Omutsweri Gideoni y’omulhume oyuwimene hakuhi nabu. Anathungerere ngokwa bakanywa amaghetse.

Yitheghereraye ndeke-ndeke emibere ey’embaghane ey’abalhume aba bakanywira mw’amaghetse. Abandi bakahira amusu abu w’omw’amaghetse. Aliriryo owundi akatheha amaghetse w’omwa byalha biwe, angathoka eriyitheghererya ebimuthimbireko. Eki ni kikulhu, kusangwa Yehova mwabwira Gideoni erisombolha abo basa abakanywa ibana yitheghirye. Abasighere, Nyamuhanga mwabugha athi, babasubaye eka. Leka thulebaye ngani busana naki.

Abaisraeli bali omwa butsibu bungi kandi. Enzumwa yiri yithi sibethowa Yehova. Abandu be Midiani babiri balengya akaghalha kandi bakabaghalhaya. Neryo Abaisraeli bakalhakira Yehova eribawathikya, na Yehova akahulikirira erilhaka lyabu.

Yehova akabwira Gideoni erihindania abalhwi, neryo Gideoni akakuma-kumira haghuma abalhume abalhwi 32,000. Aliriryo hali abasirikali 135,000 abakasyalhwa n’Abaisraeli. Aliriryo ibbwa kandi Yehova akabwira Gibeoni athi: ‘Wuwithe abalhume bangi kutsibu.’ Ekyaleka Yehova inyabugha athya niki?

Ni kusangwa Abaisraeli bamasingura olhuhi, bangana lengekania bathi bamasingura ahabwabu ibibene-bene. Bangana lengekania bathi sibabya bayithayire obuwathikya bwa Yehova erisingura. Neryo Yehova akabwira Gideoni athi: ‘Bwira abalhume bosi abakwire obuba basube ewabu.’ Gideoni akabya akolha eki, abalhwi biwe 22,000 bakasuba eka. Neryo akasighalha n’abalhume abalhwi 10,000 basa erilhwa n’abasirikali abosi abo 135,000.

Yehova amabugha athi: ‘Aliriryo, hulikirira, wukina withe abalhume bangi kutsibu!’ Neryo akabwira Gideoni erithwalha abalhume eriyanywa amaghetse okwa lhusi olhu neryo n’erithuma abandu abosi b’eka wabu abakanywa ibanunamirye amusu abu w’omw’amaghetse. Yehova akalhaghanisaya athi: ‘Ngendi kuha erisingura n’abalhume 300 abalyanywa ibana yitheghirye.’

Obuthuku obw’erilhwa bukahika. Gideoni akathegheka abalhume biwe 300 mwa bikundi bisathu. Akaha obuli mulhume y’engubi, n’omunagha imune ekikoleryo omwakathi. Bukabya bwahika omwa kathi k’erithumbi, neryo abosi bakathimba okwa kilhaliriro ky’abasirikali esyanzighu. Neryo okwa ndambi iya n’eyo, abosi bakabuha esyangubi syabu n’erithulhanga eminagha yabu, n’erilhaka bathi: ‘Omuyali wa Yehova na Gideoni!’ Neryo abasirikali esyanzighu bakabya babuka, bakatalibana n’eryubaha. Neryo abosi bakatsuka erithibitha, neryo Abaisraeli bakasinga amalhwa.