THATHUNGERERA eky’omulhume oyu akatsika omwa hema yiwe! Olhukimba olhuwene, n’omuhimba mughuma ow’esy’amaghetse n’ebihandi eby’ebitsipa. Abihekire erilhua omwa muyi we Yeriko. Aliriryo niki ekyangakolirwe okwa bindu ebye Yeriko? Wanamibuka?

Byabya bitholere ibya thoghothibwa, n’esy’amaghetse n’ebitsipa byabya ini by’erihiribwa omwa ngunza ey’ehema ya Yehova. Neryo abandu aba sibethowa Nyamuhanga. Babir’iba ebitholere Nyamuhanga. Erina ery’omulhume ya Akana, n’abali nayu ni baghuma b’omwaka yiwe. Leka thulebaye ekikabya.

Akana akabya abir’iba ebindu ebi, Yosua akathuma abalhume eriyalhwa n’omuyi we Ai. Aliriryo bakasingawa omwa malhwa. Abaghuma bak’ithibawa, n’abandi bakathibitha. Yosua akalirikana kutsibu. Akayithulika ahisi n’obusu ibune okwa kithaka n’erisaba Yehova athi: ‘Busana naki iwaleka eki ikyathuhikako?’

Yehova akasubiraya athi: ‘Hangana! Israeli yabiri halya. Babirimya okwa bindu ebyabya bitholere erithoghothibwa kutse erihebwa omwa hema ya Yehova. Mub’ibire olhukimba lhubuya n’eribisa lho. Singendi batsumulha muthe mwathoghothya lho, n’oyulya heka ebindu ebi.’ Yehova akabugha athi akendi kangya Yosua omulhume mubi oyu nga nindi.

Neryo Yosua akahindanaya abandu abosi bahaghuma, na Yehova akasombolha mw’omulhume mubi ya Akana. Akana akabugha athi: ‘Ingye na birihalya. Munalhangira olhukimba lhubuya, n’omuhimba w’esy’amaghetse, n’ebihandi eby’ebitsipa. Muna by’anza kutsibu n’erihika okwibithwalha. Mukendi bibana ibina tsikire omwa hema yaghe.’

Ebindu ebi byamabya byabanika n’eribirethera Yosua, amabugha na Akana athi: ‘Busana naki iwa thulethera obutsibu? Lino nawu Yehova akendi kulethera obutsibu!’ Okwa ndambi eyo abandu bosi bak’itha Akana y’omwa mabwe n’eka yiwe. Eki sikirikanganaya ngokwa si kitholere eriheka ebindu ebithe byethu?

Enyuma waho Abaisraeli bakaghenda erithasya yalhwa n’omuyi we Ai. Obuthuku buno Yehova akawathikaya abandu biwe, kandi bakasinga amalhwa.