WUNASI enyumba eyi nga niki? Ni hema ey’embaghane ey’eriramirya mwa Yehova. Kandi yikahulhawa mw’ehema ey’erihindaniramu. Abandu mubaghunza erihimbayo halhaba kirimo kighuma balhwire e Misiri. Wunasi nga kyabya kirengekanio kyandi erihimbayo?

Kyabya kirengekanio kya Yehova. Omughulhu Musa abya endatha okwa Kithwa kye Sinai, Yehova mwamubwira ngoku yanga himbwa. Mwabugha athi bakoleyo omwanzira eya kyangana bolhobera erihimbulhayo. Omwanzira eyi ebitsweka ibyangana hekwa n’erithwalhwa omwa kindi kitsweka, n’eyo ibyayahirwa haghuma kandi. Neryo omughulhu Abaisraeli babya bakaghenda-ghenda erilhua omwa kitsweka n’erihika omwa kindi kitsweka omwa mbwarara, ibakabya ibanahekire ehema.

Wamasamalira omwakathi k’ekisenge ekike ekiri okw’ighunzerera ly’ehema, wanganalhangira esanduko. Eyi yayi kahulhawa mw’esanduko ey’endaghano. Yabya yiwithe abamalaika babiri kutse aba kerubi abakolire omwa sy’amaghetse, okw’abuli musike ikuli mughuma. Nyamuhanga kandi mwasakanga Ebilhayiro Ikumi okwa bisayi bibiri eby’amabwe, kusangwa Musa mwathulhanga eby’erimbere. Kandi amabwe aya mwabikwa omwa sanduko ey’endaghano. Kandi, olhuthehi lhwe amana mulhwabikwa muyo. Wanam’ibuka amana nga niki?

Mughalha wabu Musa ya Haruni ya Yehova akasombolha eribya muhereri mukulhu. Akasondolha abandu omw’iramya Yehova. Kandi baghalha biwe nabu ni bahereri.

Hathya thungerera ekisenge ekinene eky’ehema. Ni kinene mirundi ibiri kwilhaba ekisenge ekike. Wanamalhangira esanduko, kutse akasanduko kake, n’omuki akakalhwamo? Ekyo ky’ekiherero ah’omuhereri akahisiraya ebindu ebikakumba ndeke ebikahulhawa mw’obukwa. Kandi hali omuthaghalha ow’awithe esya tara irinda. N’ekindu ekya kasathu omwa kisenge y’emeza. Yikabikawa kw’emiggati 12.

Omwa buthalha bw’ehema muli ekibindi kinene, kutse ekalaya, eyoswire mw’amaghetse. Abahereri baka kikolesaya bakanaba. Kandi hali n’ekiherero kinene. Hano h’ebisoro ebikerirwe bikahererawa oku Yehova ng’ebihongwa. Ehema yiri omwakathi-kathi ak’ekilhaliriro, n’Abaisraeli bikere omwa sy’ehema syabu ibana thimbire kuyo.