THATHUNGERERA! Abaisraeli bakasoka Olhusi Yorodani! Aliriryo amaghetse ali hayi? Kusangwa embulha nyingi yikawa omwa buthuku buno obw’ekirimo, olhusi lhulhwe lhuswire bathe basoka. Aliriryo hathya amaghetse awosi abiryuma! Kandi Abaisraeli bakasoka okwa kithaka ekyumire ngoku basoka omwa Ngetse Eyengulha! Amaghetse awosi ayire hayi? Leka thulebaye.

Obuthuku bwabere bwahika Abaisraeli eriyasoka Olhusi Yorodani, Yehova mwabwira Yosua athi abwire abandu b’eki: ‘Abahereri batholere erithwalha esanduko ey’endaghano n’eribya embere syethu. Bakendibya bakahira ebisandu by’omw’amaghetse w’Olhusi Yorodani, neryo amaghetse akendi leka erisenda.’

Neryo abahereri bakimaya esanduko ey’endaghano, n’erihekayo embere sy’abandu. Bakabya bahika okwa Yorodani, abahereri bakalyatha omw’amaghetse. Olhusi lhukasenda n’omuhurumuko munene kandi lhuli mw’omuhathyo. Aliriryo bamabya balyatha okwa maghetse, neryo-neryo amaghetse kwanamaleka athya erisenda! Ni kithiko-thiko! Yehova abiri kyikira amaghetse w’eyighulhu sy’olhusi. Neryo, kathambi kake omwa lhusi simukiri maghetse!

Abahereri abahekire esanduko ey’endaghano bakaghenda erihika omwa kathi-kathi k’olhusi olhumire. Wanama balhangira omwa kisasani? Bakabya banimene aho, Abaisraeli abosi bakasoka Olhusi Yorodani okwa kithaka ekyumire!

Buli mundu amabya abirisoka, Yehova akabwira Yosua eribwira abalhume 12 ab’akaghalha athi: ‘Mughende omwa lhusi eyiri abahereri ab’imene n’esanduko ey’endaghano. Musongaye amabwe 12, kandi muthondegho aho inywe abosi mukendi lhalirira munabwire. Neryo, omwa buthuku obukasa, omughulhu abana benyu basya babulya eky’amabwe aya akamanyisaya, mwasya bwirabo muthi amaghetse mw’imana omughulhu esanduko ya Yehova ey’endaghano yasoka e Yorodani. Amabwe ayo akendi syabibukya ekithiko-thiko eki!’ Yosua nayu akahimba amabwe 12 aho abahereri balhwe bimene omwa lhusi.

Erighunzerera Yosua akabwira abahereri abahekire esanduko ey’endaghano athi: ‘Mulhwe omu Yorodani.’ Banamabya babiri kolha bathya, olhusi kandi lhukatsuka erithasya senda.