WANGANA minya eky’abandu baka songa-songaya okwa kithaka nga niki? Kisosire ng’enzururu. Ni ky’enzeru, kandi ni kike-kike kandi ky’olhoberere. Aliriryo si nzururu; ni by’erirya.

Hamathalhaba mukera mughuma musa Abaisraeli balhwire e Misiri. Bali omwa mbwarara. Hano hakalhasa byalya bike, neryo abandu bakayineghenaya, bakabugha bathi: ‘Anguli Yehova athwithira e Misiri. Hakiri eyo thwanabya n’ebyalya byosi ebyo thwabya thwanzire.’

Neryo Yehova akabugha athi: ‘Ngendi wisya ebyalya ng’embulha erilhua omwa kyanya.’ N’eki kya Yehova akakolha. Engyakya eyakwamako Abaisraeli bakabya balhangira ebindu eby’enzeru ibyabiriwa ahisi, bakabulhanaya bathi: ‘Eki niki?’

Musa akabugha athi: ‘Ebi by’ebyalya ebya Yehova abahere athi mulye.’ Abandu bakahulhayo mwa AMANA. Yikasiha ng’ekeki eyi kolire omwa buki.

Musa akabwira abandu athi, ‘Mutholere imwasongya-songya eyabuli mundu anganalya.’ Neryo obuli ngyakya eki ky’abakakolha. Neryo, omughulhu eryuba likakolha kutsibu, amana eyiryasighalha okwa kithaka yika yeya.

Kandi Musa akathasya bugha athi: ‘Sihabye mundu oyukabika amana yosi-yosi ahabw’ekindi kiro.’ Aliriryo abandi bandu sibathowa. Wunasi ekika lhwiririramo? N’engyakya, amana eyabalyabika yamabya iyabiryusulha mw’ebimbodi, neryo yamatsuka eribeha!

Aliriryo, omwa yenga muli kiro kighuma ekya Yehova akabwira abandu athi ibakuma-kuma amana omwa bungi mirundi ibiri kwilhaba. Eki ky’ekiro eky’omukagha. Kandi Yehova akabugha athi ibabika kuyo busana n’ekiro eky’omungya, kusangwa siendi syathuma amana yosi-yosi okwa kiro ky’eb’irinda. Bakabya babiribika amana ahabw’ekiro eky’eb’irinda, siyiryusulha mw’ebimbodi n’eribeha! Eki ni kindi kithiko-thiko!

Ebirimo ebyosi Abaisraeli bane omwa mbwarara, Yehova akabalisaya amana.