THATHUNGERERA ebimole n’ebighuma eby’amalozi ebyerire ebikalhasa okwa mutso oyu, kutse omwigho. Oyu w’omutso wa Haruni. Ebimole n’ebighuma ebyerire ebi mubyalhasa okwa mutso wa Haruni omw’ithumbi ighuma lisa! Thulebaye ngani busana naki.

Hathya Abaisraeli bamabiri ghunza kathuku omwa mbwarara ibane mughanga-ghanga. Abaghuma okw’abandu abakalengekanaya bathi Musa syabye musondoli, kutse ya Haruni eribya muhereri mukulhu. Kora ni mughuma w’okw’abakalengekanaya bathya, na Datani, Abiramu, n’abasondoli b’abandu 250. Abosi aba bakasa eyiri Musa n’eribugha bathi: ‘Busana naki wukayiheka embere syethu?’

Musa akabwira Kora n’abandu biwe athi: ‘Omwangyakya mwimaye emithaghalha y’omuliro kandi muhiremu obukwa. Neryo musyasa omwa hema ya Yehova ey’erihindanamu. Thukendi syalebya oyo Yehova akendi syasombolha.’

Ekiro ekya kwamako, Kora n’abandu biwe 250 bakasa omwa hema ey’erihindanamo. N’abandi bangi bakasa erisyasighika abalhume aba. Yehova ahithene kutsibu. Musa akabugha athi: ‘Mulhwe omwa syahema esy’abalhume babi aba. Simuthule okwa bindu byabu.’ Abandu bakahulikirira, n’eriseghera hali okwa syahema sya Kora, Datani, na Abiramu.

Neryo Musa akabugha athi: ‘Busana n’eki mukendi minya oyo Yehova abirisombolha. Ekithaka kikendi yisanza n’erimera abalhume babi aba.’

Neryo-neryo Musa akabya anabirighunza erikania, ekithaka kikathandamukalha. Ehema ya Kora n’ebindu biwe byosi kandi Datani na Abiramu n’abo ababya haghuma nabu bakahwera ekulimu, n’ekithaka kikabakuningira. Abandu bakabya bakowa erilhaka lyabu abakahwerekerera e kulimu, bakalhaka n’omulenge munene bathi: ‘Thuthi bithe! Nethu ekithaka kikasya thumera!’

Kora n’abandu biwe 250 bakine hakuhi n’ehema ey’erihindanamo. Neryo Yehova akathuma omuliro, neryo abosi bakalhongothera mugho. Neryo Yehova akabwira mughalha wa Haruni ya Eleazari athi athwale emithaghalha ey’omuliro ey’abalhume abaholire n’erikolha muyo mw’ekikuningiro kike-kike eky’ekiherero. Ekikuningiro eky’ekiherero eki, kikakunga Abaisraeli ngoku sihali wundi athe ini Haruni n’abaghalha biwe erikolera Yehova ng’abahereri.

Aliriryo Yehova anzire erikikangania ndeke-ndeke ngoku ni Haruni n’abaghalha biwe abo abirisombolha eribya bahereri. Neryo akabwira Musa athi: ‘Bwira obuli musondoli owa buli kihanda ekye Israeli wuthi alethe omutso wiwe. Ahabw’ekihanda eky’Abalawi, Haruni yulethe omutso wiwe. Neryo wuhire obuli mutso omwa hema embere w’esanduko ey’endaghano. Omutso w’omulhume oyo nabirisombolha ng’omuhereri akendi lhasya ebimole.’

Musa akabya akathungerera omwa ngyakya, lebaya, omutso wa Haruni ali kw’ebimole ebi n’ebighuma ebyerire eby’amalozi ibyabiri lhasa kugho! Neryo wunalhangira lino ekyaleka Yehova inyalhasya okwa mutso wa Haruni kw’ebimole?