WUNASI erina ery’omulhume ow’akaghalha kanene oyu w’abirithabyaho? Y’omutsweri oyukahulhawa mwa Samusoni. Ni Yehova oyukaha Samusoni y’akaghalha kiwe. Samusoni athalya buthwa, Yehova akabwira mama wiwe athi: ‘Wukendi butha omwana w’obulhume omwa buthuku obuthe bwa hali. Akendi thwalha obusondoli erilhamya Israeli y’okw’Abafilisitini.’

Abafilisitini ni bandu babi abikere e Kanana. Bawithe abalhume abalhwi bangi, kandi kwenene bakanubaya Abaisraeli. Kiro kighuma, Samusoni anemughenda ey’ikere Abafilisitini, endale nene yikasa eyali iyine mururuma. Aliriryo Samusoni ak’itha endale eyi omwa byalha biwe bisa. Neryo ak’itha n’ebikumi eby’Abafilisitini babi.

Enyuma waho, Samusoni akanza omukali oyukahulhawa mwa Delila. Abasondoli abe Filisitini bakalhaghanisaya bathi obuli mundu akendiha Delila y’ebihandi eby’ebitsipa 1,100 amababwira ekikaleka Samusoni inyabya n’akaghalha. Delila anzire esyambulho syosi esyo. Si munywani ow’ekwenene eyiri Samusoni, kutse eyiri abandu ba Nyamuhanga. Neryo akahathikana eribulya Samusoni ekikaleka inyabya n’akaghalha.

Erighunzerera, Delila akaleka Samusoni inyamubwira embitha ey’akaghalha kiwe. Akabugha athi: ‘Esyonzwiri syaghe sisiri syathaghembwa. Erilhua omwa buthuku na buthawa, Nyamuhanga mwanyisombolha eribya mukoli wiwe ow’embaghane oyukahulhawa mw’Omunaziri. Esyonzwiri syaghe syamaghembwa, ini ngendi herya akaghalha kaghe.’

Delila akabya aminya eki, akaghotserya Samusoni y’omw’amawa aw’ebihinga biwe. Neryo akabirikira omulhume eringiramo n’erighemba esyonzwiri siwe. Samusoni akabya abuka, akaghalha kiwe ikabirihwa. Neryo Abafilisitini bak’ingiramu n’erimuhamba. Bakamulhusaya mw’ameso iwe awosi, n’erimukolha mwa mukobe wabu.

Kiro kighuma Abafilisitini bakabya n’obugheni bunene eriramya nyamuhanga wabu Dagoni, neryo bakaletha Samusoni erilhua omwa muliki erisya musekererya. Ebyo bikine aho, esyonzwiri sya Samusoni syamabiri thasya kulha kandi. Samusoni akabugha n’omulhwana oyuka musondolha athi: ‘Leka nga hambe okwa syanduhi esihambire enyumba.’ Neryo Samusoni akasaba Yehova amuhe akaghalha, neryo akahamba okwa syanduhi. Akalhaka athi: ‘Leka nga hole haghuma n’Abafilisitini.’ Hali Abafilisitini 3,000 abali okwa bugheni, neryo Samusoni akabya unamira okwa syanduhi, enyumba yikatherera ahisi n’eritha abandu bosi ababi aba.