Saulo mwabya mwami w’erimbere owe Israeli. Aliriryo Yehova mwa mughana, na Dawudi mwa sombolhwa eribya mwami omwa mwanya wiwe. Thukabana bindu bingi oku Dawudi. Ng’omunyetho, mwalhwa n’ow’omukaka Goliata. Enyuma waho, mwathibitha akasagha Omwami w’erihali ya Saulo. Neryo Abigaili omukali mubuya omwa busu mwa muthanga erikolha ekindu ky’obukiru.

Enyuma waho, thuk’igha bindu bingi oku mughalha wa Dawudi ya Solomona, oyu wasuba omwa mwanya wa Dawudi ng’omwami we Israeli. Abami abe Israeli abasathu abatsuka, buli mughuma mwa thabalha ahabw’ebirimo 40. Solomona abere abiri holha, e Israeli muyaghabana mw’amami abiri, obwami bw’endatha n’obw’eyikwa.

Obwami bw’endatha obw’ebihanda 10 mubwaghunza ebirimo 257 buthe bwathoghothibwa n’aba Asuri. Neryo ebirimo 133 byabere byabiri lhaba, obwami obw’ebihanda bibiri obw’eyikwa nabwo mubwathoghothibwa. Okwa ndambi eyo Abaisraeli mubathwalhwa omwa bunyewa mwe Babiloni. Neryo Ekitsweka ekya KANI kikakanaya okwa birimo 510 ebyabya kera, omughulhu owa thukalhangirira mw’ebindu bingi ebikasisimulha.