DAWUDI athali aholha, mwahererya Solomona y’esyandegheka esyalhua eyiri Nyamuhanga erihimba e hekalu ya Yehova. Omwa kirimo ekya kani eky’erithabalha liwe, Solomona akatsuka erihimba e hekalu, kandi yikathwalha ebirimo irinda n’engegha erighunza erihimbayo. Esyankumi sy’esyankumi sy’abalhume bakakolha okwa hekalu, kandi obuhimbe bukathwalha mbulho singahu-ngahu. Ni kusangwa esy’amaghetse n’ebitsipa bingi bikakolesibawa okwa hekalu eyo.

E hekalu yiwithe bisenge bibiri ebikulhu-bikulhu, ng’ehema y’erihindaniramu kwayabya. Aliriryo ebisenge ebi ni binene-binene emirundi ibiri kwilhaba ebyabya omwa hema ey’erihindaniramu. Solomona amahira esanduko y’endaghane omwa kisenge eky’omwakathi ak’ehekalu, n’ebindi bindu ebyabya bibikirwe omwa hema y’erihindaniramu byamahirwa omwa kindi kisenge.

E hekalu yamabya yabirihwa erihimbwa, hamabya bugheni bunene. Solomona akakukama embere sye hekalu n’erisaba, ngokwa wunalhangire omwa kisasani. Solomona akabwira Yehova athi: ‘N’olhubulha olhwosi si lhunene kutsibu erithoka erikuhikana, e hekalu eyi nayu kwesi kan’inge iwe erihikamo. Aliriryo, Nyamuhanga waghe, kisi hulikirira abandu baghu omughulhu bangasaba ibanalholere eyiri enyumba eno.’

Solomona akabya awunza omusabe wiwe, omuliro akalhua elhubulha. Akahisaya ebihongwa by’ebisoro ebyosi ebyabiri kolhwa. N’ekyakakalha kikalhua eyiri Yehova n’eryusulya e hekalu. Eki kikakanganaya indi Yehova anahulikirire, kandi indi atsemere e hekalu n’erisaba lya Solomona. Neryo lino e hekalu yamabya iky’ekikaru eky’abandu erisyaramiryamu, omwa mwanya w’ehema ey’erihindaniramu.

Ahabw’omughulhu mungi Solomona akathabalha omw’amenge, n’abandu bakatsema. Aliriryo Solomona amathahya bakali bangi erilhua omwa bindi bihugho abatheramaya Yehova. Wunalhangire omughuma wakubo akaramirya embere sy’ekibatsirwe? Erighunzerera bakali ba Solomona bamaleka nayu inyaramya esindi nyamuhanga. Wunasi ekikabyaho omughulhu Solomona akakolha eki? Syakithwalha abandu bandeke n’olhukeri. Akabya mundu mutsibu, n’abandu si bakiri n’obutseme nahake.

Kino kikaleka Yehova inyahithana oku Solomona, n’erimubwira athi: ‘Ngendi kulhusya kw’obwami n’eribuha owundi mulhume. Singendi kolha kino wukina humulha, aliriryo omwa buthabali bwa mughalha wawu. Ibbwa aliriryo singendi syalhusya abandu bosi ab’omw’obwami erilhua ku mughalha wawu.’ Thuthalebya kino ngakikabya kithi.