WUNASI eky’omwana muthwa mulere ono akabugha? Akabwira omukali y’oku Elisa omuminyereri wa Yehova, n’ebindu by’erithikya ebya Yehova akamuwathikaya erikolha. Omukali syasi Yehova kusangwa si Muisraeli. Thuthalebaya no, ngani busana naki omumbesa ali omwa nyumba y’omukali.

Omukali ni mu Asuria. Mwira wiwe ya Namani, mukulhu w’abasirikali abe Asuria. Abasuria babya ibabiri hamba omumbesa Omuisraeli ono, kandi mwalethwa ew’omukali wa Namani eribya mughombe wiwe.

Namani awithe obulhwere bubi obukahulhawa mw’ebihagha. Obulhwere buno bwangana leka ebitsweka eby’okwa mubiri w’omundu ibyatsutsangika bolho-bolho. Neryo kino ky’omumbesa akabwira muka Namani athi: ‘Anguli mukama waghe alyaghenda ew’omuminyereri wa Yehova e Israeli. Anga mulhamya kw’ebihagha biwe.’ Enyuma waho, ebinywe ebi byamabwirwa mwira w’omukali.

Namani anzire kutsibu erilhamibwa; busana n’eki akathwamu erighenda e Israeli. Akabya ahika yo, akaghenda eyiri enyumba ya Elisa. Elisa akathuma omughombe wiwe y’eyihya n’eriyabwira Namani athi aghende oghere omwa lhusi Yorodani mirundi irinda. Eki kikaleka Namani inyahithana kutsibu, n’eribugha athi: ‘Esyanyusi esiri ewethu silengire esyanyusi esyomu Israeli!’ Akabya abiribugha bino, Namani akabinduka n’erighenda.

Aliriryo omughuma w’okw’abaghombe biwe akamubwira athi: ‘Mukama, Elisa kw’akubwira erikolha ekindu ekikalire, wangana kikolire. Neryo busana naki iwuthakwama eky’eriyogha, ngokwa akubwire?’ Namani akahulikirira omughombe wiwe n’erighenda eriyayiluba omwa lhusi Yorudani mw’emirundi irinda. Akabya abirikolha athya, omubiri wiwe akasuba ndeke n’eryuwana!

Namani amatsema kutsibu. Akasuba eyiri Erisa n’erimubwira athi: ‘Lino namabiri minya kwenene indi Nyamuhanga we Israeli ya Nyamuhanga musa ow’ekwenene omwa kihugho kyosi. Busana n’ekyo, thwalha ekihembo kino.’ Aliriryo Elisa akasubiraya athi: ‘Eyihi, singendi kithwalha.’ Elisa akyasi athi kyangabya kibi iyo erithwalha ekihembo ekyo, kusangwa abya ini Yehova oyuwalhamaya Namani. Aliriryo omughombe wa Elisa ya Gehazi anzire athwale ekihembo ekyo.

Neryo kino kya Gehazi akakolha. Namani akabya abirighenda, Gehazi akamuthibithako n’eriyamusanga. Neryo akamubwira athi: ‘Elisa amanyithuma erikubwira athi anganzire okwa bihembo byawu busana n’abanywani abamasya mubalhamira.’ Omwa kwenene, aya ni mabehi. Aliriryo Namani iyo syasi kwa ni mabehi; busana n’ekyo akaha Gehazi y’okwa bindu.

Gehazi akabya asuba eka, Elisa abiriminya eky’abirikolha. Yehova abirimubwira. Neryo akabugha athi: ‘Busana n’erikolha ekindu kibi kino, ebihagha bya Namani bikendi kwasako.’ Neryo-neryo kwa byanamamwasako bithya!

Ebyosi ebi thwang’igha mwaki? Eky’erimbere, thutholere ithwabya ng’omumbesa mulere n’eribwira abandi b’oku Yehova. Mwanganalhua ebibuya. Ekya kabiri, isithwabya ab’emiyiheko nga Namani kwabya, aliriryo thutholere ithwa sikya abaghombe ba Nyamuhanga. N’ekyakasathu, isithwathulha amabehi nga Gehazi kw’akolha. Sithwang’igha bingi thwamasoma e Biblia?