OMWAMI Nebukadeneza akathwalha Abaisraeli abosi abasomire ndeke be Babiloni. Enyuma waho, omwami akasombolha abalhwana omwa kathi-kathi kabu ababuya kandi ab’amenge kutsibu. Abbani okw’ibo b’abalhwana abawamalhangira hano. Omughuma ni Danieli, n’abandi basathu abanya Babiloni baka bahulha mwa Sadiraki, Mesaki na Abedenego.

Nebukadeneza akathegheka erikangirirya abalhwana aba erikolera omwa kikali kiwe. Enyuma w’erikangirirya ery’ebirimo bisathu, akendi sombolha ab’amenge kutsibu erimuwathikya erighunza ebitsibu. Omwami akanza abalhwana babane akaghalha n’obuyingo bubuya omughulhu bakakangiriribawa. Neryo akalhaghira athi abaghombe biwe batholere ibaha abosi ebyalya n’ebinyu eby’eka yiwe nayu bakalyako.

Lebaya omulhwana Danieli. Wunasi eby’akabugha n’omughombe mukulhu wa Nebukadeneza ya Aspenazi? Danieli akamubwira athi syanzire erirya ebindu by’obughuli okwa meza y’omwami. Neryo Aspenazi amayilhalikirira. Akabugha athi: ‘Omwami abirithwamu ekya mutholere erirya n’erinywa. Neryo mwamathendibya n’obuyingo obuwene ng’abandi balhwana, inyakendi nyitha.’

Neryo Danieli akaghenda eyiri omulindi oyo Aspenazi athekireho busana n’erimutheya haghuma n’abanywani biwe. Akabugha athi: ‘Thulengesaye ahabw’ebiro 10. Wuthuhe esyanyinyi esy’erirya n’amaghetse w’erinywa. Neryo wuthulinganisaye n’abandi balhwana abakalya ebyalya by’omwami, wanalhangira abali ndeke.’

Omulindi ak’ikiriraya erikolha eki. Neryo ebiro 10 byamabya bikahwa, Danieli n’abanywani biwe basathu bamabya n’amaghalha owuwene kwilhaba ow’abalhwana abandi abosi. Neryo omulindi akabaleka balhole embere eriryaesyanyinyi omwakanya ak’eby’omwami akaha.

Ebirimo bisathu byamabya bikahwa, abalhwana abosi bamathwalhwa ewa Nebukadeneza. Amabya abirikania n’abosi, omwami akabana Danieli n’abanywani biwe basathu ibabali n’amenge kwilhaba abandi. Neryo akabya nabu bamuwathikaye omwa kikali. Neryo omughulhu omwami akabulhaya Danieli, Sadiraki, Mesaki na Abedenego y’ebibulyo kutse eribaha ebitsibu ebikalire, basi mirundi 10 kwilhaba abahereri biwe kutse abalhume biwe ab’amenge.