YOSIA awithe ebirimo munani bisa eby’obukulhu akabya mwami w’ebihanda bibiri ebye Israeli eby’eyikwa. Ni mulere kutsibu okw’ibya mwami. Neryo erimbere abandu bakulhu bakamuwathikaya erisondolha erihanga.

Yosia amabya abiribya mwami ahabw’ebirimo irinda akatsuka erirondekania Yehova. Akakwama eky’erireberyako eky’abami babuya nga Daudi, Yosofati na Hezekia. Neryo, akabya akine munyethu, Yosia akakolha ekindu eky’amani.

Ahabw’obuthuku buli, Abaisraeli bangi balhwe babi. Bakaramaya esyanyamuhanga esy’amabehi. Bakunamira ebibatsirwe. Neryo Yosia akathimbamo n’abalhume biwe n’eritsuka erilhusya eriramya ery’amabehi ry’omwa kihugho. Oyu ni mubiiri munene kusangwa abandu bangi bakaramaya esyanyamuhanga esy’amabehi. Wangana lhangira Yosia n’abalhume biwe hano baka tsutsanga ebibatsirwe.

Enyuma waho, Yosia akahira h’abalhume basathu abaka lebereraya eryuwania ery’ehekalu ya Yehova. Bamasorokya esyambulho erilhua omw’abandu n’erisiha abalhume aba erithuha omubiiri owa kendi kolhwa. Bamabya bane mukolha okwa hekalu, omuhereri mukulhu Hilikia amabana mw’ekindu eky’omubongo kutsibu. Ky’ekitabu eky’ebiraghiro ekya Yehova asakangisaya Musa kera-kera. Kyasangirwe ikyabiri ghunza birimo bingi kyathere.

Ekitabu bamakithwalira Yosia, neryo akasaba athi bamusomere kyo. Anamuhulikirira, Yosia amathoka erilhangira indi abandu si balhwe baka ghondera ebiraghiro bya Yehova. Akakwa obulighe busana n’eki, neryo akasathangaya esyangimba siwe, ngoku wanamalhangira hano. Akabugha athi: ‘Yehova ahithene busana nethu, kusangwa abathatha bethu mubatha ghondera ebiraghiro ebisakangire omwa kitabu kino.’

Yosia akalhaghira omuhereri mukulhu Hilikia erirondya ekya Yehova akendi bakolera. Hilikia akaghenda eyiri Hulda, omuminyereri w’obukali, n’erimubulya. Na Hulda akamuha omwatsi owakalhua eyiri Yehova athwaliregho Yosia athi: ‘E Yerusalemu n’abandu abosi bakendi suyirwa kusangwa babiriramya esyanyamuhanga sy’amabehi n’ekihugho kyabiri sulha mw’obubi. Aliriryo iwe Yosia, kusangwa wabiri kolha ekibuya, erisuyirwa eri siryendi asa wuthe waholha.’