Bane omwa bunyewa mwe Babiloni, erikirirya ery’Abaisraeli mulya lengwako omwanzira nyingi. Sadiraki, Mesaki, na Abedenego mubaghuswa omw’irunga ly’omuliro, aliriryo Nyamuhanga mwa bihamo ibaneho. Enyuma waho, e Babiloni yabere yabiri kindwa n’Abamedi n’Abapersia, Danieli mwaghuswa omwa kyuna ky’esyandale, aliriryo Nyamuhanga mwa mutheya omwi kumba amuno w’esyandale.

Erighunzerera, ya Kiro omwami w’Abapersia mwaboholha Abaisraeli. Mubasuba omwa kihugho kyabu enyuma w’ebirimo 70 bali thwalibirwe omwa bunyewa mwe Babiloni. Ekighuma ky’okwa bindu eby’erimbere babya bakolire omughulhu basuba e Yerusalemu, lyabya iry’eritsuka erihimba ehekalu ya Yehova. Aliriryo, esyanzighu mu sy’imania omubiiri wabu. Neryo mubaghunza erihimba ehekalu halhaba ebirimo nga 22 basubire e Yerusalemu.

N’ekindi, thuk’igha okwa lhughendo lhwa Ezera akasuba e Yerusalemu eriyuwania ehekalu. Habya ihamathalhaba ebirimo nga 47 ehekalu yihwere erihimbwa. Neryo, halhaba ebirimo 13 enyuma w’olhughendo lhwa Ezera, Nehemia mwawathikya erithasyahimba esyombimbo sye Yerusalemu esyathera. Omwa byosi, ebirimo ebya kera 152 bikanibwirweko omwa kitsweka ekya KATHANU.