ESYONKUMI nyingyi esy’abandu bakaghenda lhughendo lhuli kutsibu erilhua e Babiloni erihika e Yerusalemu. Aliriryo erihika e Yerusalemu, iyabiri thoghothibwa kutsibu. Sihali mundu na mughuma oyuw’ikereyo. Abaisraeli batholere iba himba obuli kindu kandi.

Ekighuma eky’okwa bindu ebya bakatsuka erihimba ky’ekiherero. Eki ky’ekitsweka aha banga herera ebihongo by’ebisoro, kutse ebihembo, oku Yehova. Emikera mike enyuma waho, Abaisraeli bakatsuka erihimba ehekalhu. Aliriryo esyanzighu esikere omwa bihugho ebihererenie nabo si syanzire Abaisraeli bakahimbayo. Neryo bakalengesaya eribubahisya bang’imania omubiiri. Erighunzerera, esyanzighu esi sikaleka omwami muhya-muhya owe Persia inyakolha ekiraghiro eky’erimania omubiiri ow’obuhimbe.

Ebirimo bingi bikalhaba. Lino byamathabya birimo 17 ah’Abaisraeli bakathalhwira e Babiloni. Yehova akathuma abaminyereri biwe Hagai na Zekaria eribwira abandu batsuke erihimba kandi. Abandu bakayikethera obuwathikya bwa Nyamuhanga, n’eriowa abaminyereri. Bakatsuka erihimba kandi, nomwakine indi ekiraghiro kikabugha kithi si bahimbe.

Neryo omuthabali we Persia oyukahulhawa mwa Tatenai akasa n’eribulya Abaisraeli nga bawithe obuthoki bwahi obw’erihimba ehekalhu. Abaisraeli bakamubwira bathi omughulhu babya e Babiloni, Omwami Kiro mwababwira athi: ‘Mughende, lino, e Yerusalemu n’erihimba ehekalu ya Yehova, Nyamuhanga wenyu.’

Tatenai akathuma enyawaliho ye Babiloni akabulya kwenene Kiro, oyuwabya inyabiriholha, nga mwanabugha athya. Neryo-neryo enyawaliho erilhua okw’omwami muhya-muhya owe Persia yikasa. Yikabugha yithi kwenene Kiro mwabugha athya. Neryo omwami akasakanga athi: ‘Muleke Abaisraeli bahimbe ehekalhu ya Nyamuhanga wabu. Kandi nga balhaghira eribawathikya.’ Omwa birimo nga bbini ehekalhu yikahwa, n’Abaisraeli bali n’obutseme bunene.

Ebindi birimo bingi bikalhaba. Lino ni birimo hakuhi nga 48 ehekalu yihwere. Abandu omu Yerusalemu ni basama, neryo omuyi n’ehekalu ya Nyamuhanga sibithasosa ndeke. E Babiloni, omu Israeli Ezira amaminya ekiyithawa eky’erihimba ehekalu ya Nyamuhanga. Neryo wunasi eky’akakolha?

Ezira akaghenda eriyalebya Artasasta, omwami we Persia, n’omwami mubuya oyu akaha Ezira y’ebihembo bingi erithwalhabyo e Yerusalemu. Ezira akasaba Abaisraeli omwa Babiloni erimuwathikya eriheka ebihembo ebi eribithwalha e Yerusalemu. Hakuhi abandu nga 6,000 bakabugha bathi bakendi ghenda. Bawithe esy’ebitsipa n’esy’amaghetse n’ebindi bindu bingi eby’obughuli eby’eriheka.

Ezira ali n’obuba, kusangwa omwanzira muli abalhume babi. Abalhume aba banganimya esy’ebitsipa n’esyamaghetse syabu, n’eribitha. Neryo Ezira akabirikira abandu bahaghuma, ngoku wanamalhangira omwa kisasani. Neryo bakasaba Yehova eribatheya omwa lhughendo lhwabu lhuli-lhuli olhw’erisuba e Yerusalemu.

Yehova akabatheghaya. Neryo enyuma w’emikera ini yahwere banemughenda, bakahika buholho e Yerusalemu. Eki sikirikanganaya kithi Yehova anganatheya abo abakamuyikethera eribawathikya?