Malaika Gabrieli mwathumwa okwa mumbesa mubuyanga oyukahulhawa mwa Maria. Malaika mwa mubwira athi akendi syabutha omwana oyukendi syathabalha ng’omwami kera na kera. Omwana, Yesu, mwa buthirwa omwa nyumba y’ebisoro, aho abalisya bamubungira. Enyuma waho, engununu muya sondolha abalhume erilhua Ebulhua lyuba erihika okwa mwana mulere. Thukaminya oyuwaleka ibalhangira engununu eyo, kandi ngokwa Yesu alhamibawa okw’akaghalha ak’erimwitha.

Erikwamako, thukabana omughulhu Yesu, aby’awithe birimo 12 eby’obukulhu, akakania n’abakangirirya omwa hekalu. Enyuma w’ebirimo ikumi na munani, Yesu mwabatizibwa, neryo mwatsuka omubiiri ow’erithulhughania n’erikangirirya Obwami, owa Nyamuhanga amuthuma athi ase akole okwa kihugho. Erimuwathikya omwa mubiiri oyu, Yesu mwasombolha abalhume 12 neryo mwabakolha mw’abakwenda biwe.

Yesu kandi mwakolha n’ebithiko-thiko bingi. Mwalisya abandu esyankumi n’esyankumi b’esiswe nge n’emiggati mike. Mwalhamya abalhwere n’erilhubukya abaholi nibya. Erighunzerera, thuk’igha okwa bindu bingi ebya banika oku Yesu omwa biro by’erighunzerera eby’engebe yiwe, kandi ngokw’ithibawa. Yesu mwathulhughania engulhu omwa birimo bisathu n’engegha, neryo EKITSWEKA ekya 6 kika kanaya okwa buthuku obulhabire ebirimo 34.