OMUKALI mubuyanga oyu ni Maria. Ni mukali Omuisraeli, oyuw’ikere omwa muyi we Nazareti. Nyamuhanga anasi kwa ni mundu mubuya kutsibu. Kyakireka Nyamuhanga inyathuma malaika wiwe Gabrieli erikania nayu. Wunasi ebya Gabrieli akasyabwira Maria? Leka thulebaye.

Gabrieli akabugha nayu athi: ‘Wabukire, iwe mutsumulhwa. Yehova ali haghuma nawu.’ Maria syali athabana omundu oyu. Amubaha, kusangwa syasi eky’akamanyisaya. Aliriryo aho n’aho Gabrieli akamuhumu likanaya.

Gabrieli akabugha athi: ‘Sighubahe, Maria. Yehova abiri kutsemera kutsibu. Kya kikendi leka inyakukolera ekindu ky’eriswekya. Wukendi butha omwana. Kandi wasyamwahulha mwa Yesu.’

Gabrieli akalholha embere n’erisoborera athi: ‘Omwana oyu asyabya mukulhu, kandi asyahulhwa mwa Mughalha wa Nyamuhanga ow’Endatha Kutsibu. Yehova asyamuyira mw’omwami, nga Dawudi kw’abya. Aliriryo Yesu asyabya mwami kera na kera, kandi n’obwami bwiwe sibwendi syahwa!’

Maria akabulhaya athi: ‘Eki kyanga thokekana kithi? Singwithe mulhume nibya. Sindi nathabana na mulhume, neryo nangabutha nyithi omwana?’

Gabrieli akasubiraya athi: ‘Obuthoki bwa Nyamuhanga bwasyakuhikako. Neryo omwana asyahulhwa mwa Mughalha wa Nyamuhanga.’ Neryo akabwira Maria athi: ‘Wibuke mwali wenyu ya Elizabeti. Abandu mubabugha bathi akulire kutsibu eributha omwana. Aliriryo akisiya inyabutha omwana ow’obulhume. Neryo wanamalhangira, ngoku sihali kindu ekyangalema Nyamuhanga.’

Aho n’aho Maria akabugha athi: ‘Ingye indi mukobe wa Yehova! Kinyibyeko ngoku wabiri bugha.’ Neryo omumalaika akaghenda.

Maria akanguha eriyalebya Elizabeti. Elizabeti akabya owa omulenge wa Maria, omwana oyuli omwanda yiwe akayisumba n’ebitsange. Elizabeti akusulibawa n’omulimu wa Nyamuhanga, neryo akabugha na Maria athi: ‘Wuli mutsumulhwa omwa kathi-kathi k’abakali.’ Maria akabya na Elizabeti ahabw’emikera esathu, neryo kandi akasuba eka e Nazareti.

Maria akisiya inyathahibwa n’omulhume oyukahulhawa mwa Yozefu. Aliriryo Yozefu akabya aminya athi Maria akaya butha omwana, akaleka erithasya lengekania erimuthahya. Neryo malaika wa Nyamuhanga akabugha nayu athi: ‘Sighubahe eriherukya Maria eribya mukali wawu. Kusangwa ni Nyamuhanga oyuwamuhere omwana.’ Neryo Maria na Yozefu bakaherukanaya, n’erilinda aho Yesu akendi buthirwa.