BUTHUKU buke enyuma w’erilhamya esyandimethime ibiri esika sabiriraya, Yesu akasa omwa kalu kake hakuhi ne Yerusalemu. Akabwira ababiri b’okw’abakwenda biwe athi: ‘Mughende omwa kyalu neryo mukendi banayo enyana y’epunda. Muhanguleyo n’erinyiretherayo.’

Bakabya bamulethera epunda, Yesu ak’ikalha kuyo. Neryo akaghenda e Yerusalemu ni kaghendo kake. Akabya ahika hakuhi n’omuyi, endeko nene y’abandu yikasyamwangirira. Abangi bakalhusaya esyakoti syabu n’erisihira omwanzira. Abandi bakathwa ebisanza by’amabondo. Nabyo bakabihira omwanzira, n’eribirikira bathi: ‘Nyamuhanga wutsumule omwami oyukasa omwa lina lya Yehova!’

Kera omwa Israeli, omwami muhya-muhya inyakaghenda e Yerusalemu okwa nyana y’epunda eriyikangania okw’abandu. Eki kya Yesu akakolha. N’abandu aba bakakanganaya bathi banzire Yesu eribya mwami wabu. Aliriryo abosi si bamwanzire. Thukalhangira eki Yesu akaghenda omwa hekalu.

Omwa hekalu Yesu akalhamaya abandu esyandimethime n’ebirema. Abana bakabya balhangira eki, bakalhaka bakapipa Yesu. Aliriryo eki kikahithanaya abahereri, neryo bakabwira Yesu: ‘Wanamwowa eby’abana bakabugha?’

Yesu akasubiraya athi: ‘Inga, namwowa. Si mwethasoma omwa Biblia aha yikabughira yithi: “Nyamuhanga asyabana eripipa erikalhua omwa bunu bw’abana balere?”’ Neryo abana bakalholha embere bakapipa omwami wa Nyamuhanga.

Thwanzire ithwabya ng’abana abo, kwabithe? Abandi bandu bangana lengesya erithukakirya erikania okw’obwami bwa Nyamuhanga. Aliriryo thukendi lholha embere thukabwira abandi okwa bindu bibuya ebya Yesu akendisya kolera abandu.

Si bwabya buthuku bwa Yesu eritsuka erithabalha ng’omwami omughulhu abya hano okwa kihugho. Obuthuku obu bwa syahika mughulhu wahi? Abigha ba Yesu banzire eriminya. Thukendi igha okw’eki embere.