HANO Yesu asosire ng’abirihithana kutsibu, kwabithe? Wunasi ekikaleka inyahithana kutsibu? Ni busana abalhume aba omwa hekalu ya Nyamuhanga e Yerusalemu ni b’omururu munene. Bakalengesaya erikolha esyambulho nene erilhua okw’abandu abali asa hano erisyaramya Nyamuhanga.

Wanamalhangira eminyana eyosi eyi ey’esyande n’esyambuli n’amalikuku? Abalhume bano bakaghuliraya omwa hekalu mwa hano mw’ebisoro ebyo. Wunasi nga ni busana naki? Ni busana Abaisraeli bakayithagha ebisoro n’ebinyonyi eby’eriherera Nyamuhanga.

Ekiraghiro kya Nyamuhanga kyabya kikabugha kithi omughulhu Omuisraeli angakolha ekibi, atholere inya herera Nyamuhanga. Hanabya n’obundi buthuku nibya obw’Abaisraeli babya bakahongeramu. Aliriryo omu Israeli inyakabana athi esyonyonyi n’ebisoro eby’eriherera Nyamuhanga?

Abandi Abaisraeli babya bathungire esyonyonyi n’ebisoro. Neryo ibakahonga ebi. Aliriryo Abaisraeli bangi si babya bathungire ebisoro byosi-byosi kutse esyonyonyi. Kandi n’abandi babya bikere hali kutsibu erilhua Yerusalemu neryo isibangathoka eriletha n’ekighuma eky’okwa bisoro byabu omwa hekalu. Neryo abandu ibakasa hano erisyaghulha ebisoro kutse ebinyonyi ebya bakayithagha. Aliriryo abalhume bano ibakatswera abandu b’esyambulho nene. Ibaka libathanganaya abandu. Eriha kw’ekyo, sibatholere bakaghulirya hano omwa hekalu ya Nyamuhanga.

Eki kya kikahithanaya Yesu. Neryo akathiningira esyameza sy’abalhume esiri kw’esyambulho n’eritsatsanga ebinusu byabu. Kandi, akakolha omunyamba omwa bikoba n’eribingira ebisoro byosi by’eyihya sy’ehekalu. Akalhaghira abalhume abakaghulhaya amalikuku athi: ‘Mubuthwale eyihya! Muleke erikolha enyumba ya Thatha waghe mwa kathali ak’erikoleramu esyambulho nyingi.’

Abaghuma b’okwa bigha ba Yesu bane nayo hano omwa hekalu mwe Yerusalemu. Bakasweka bakalhangira ebya Yesu akakolha. Neryo bak’ibuka ekitsweka omwa Biblia aha yikabughira yithya oku Mughalha wa Nyamuhanga: ‘Eryanza ly’enyumba ya Nyamuhanga lyasyaka omwa muthima wiwe ng’omuliro.’

Yesu ane okwa bugheni obw’Erikyuruka hano e Yerusalemu, akakolha ebithiko-thiko bingi. Enyuma waho, Yesu akalhua e Yudea n’eritsuka olhughendo lhwiwe olhwe Galilaya. Aliriryo omwa lhuyira lhwiwe, akalhaba e Samaria. Thulebaye ekyabanika yo.