WUNASI oyukesirye okwa kithaka nga nindi? Ni Saulo. Wibuke, yuwatheghaya esyakoti esy’abalhume ab’itha Setefano y’omw’amabwe. Thungerera ekyakakalha ekikangabasenie! Ekyamabya niki?

Setefano akabya abir’ithibwa, Saulo akabya musondoli omwihigha-highania abigha ba Yesu banga bitha. Akaghenda nyumba okwa nyumba inyanemubihamo n’eribaghusa omwa muliki. Abangi ab’okw’abigha bakathibitha omwa yindi miyi n’eritsuka erithulhughania “engulhu yuwene” yeyo. Aliriryo Saulo akaghenda omwa yindi miyi akarondekania abigha ba Yesu. Lino akaghenda okwa lhughendo lhwiwe kwe Damasiki. Aliriryo, ane omwanzira, eki ky’ekindu eky’eriswekya ekikabya:

Aho n’aho ekyakakalha kikalhua omwa kyanya n’eripalirya oku Saulo. Akawa okwa kithaka, ngokwa thwamalhangira hano. Neryo omulenge akabugha athi: ‘Saulo, Saulo! Ekikaleka iwanyihuthalya niki?’ Abalhume ababya haghuma na Saulo bakalhangira ekyakakalha n’eriowa omulenge, aliriryo sibali yitheghereraya ekya mabuwa.

Saulo akabulhaya athi: ‘Wulindi Mukama?’

Omulenge akabugha athi: ‘Indi Yesu oyo wukahuthalhaya.’ Yesu akabugha eki kusangwa omughulhu Saulo akahuthalhaya abakwenda biwe, Yesu akayowa ng’akamuhuthalhaya.

Neryo Saulo akabulhaya athi: ‘Nga kole ki, Mukama?

Yesu akabugha athi: ‘Hangana wughende e Damasiki. Eyo wukendi bwirwa ekya wutholere erikolha.’ Saulo akabya akahangana n’erilibulha ameso iwe, syangalhangira kindu kyosi-kyosi. Ni ndimethime! Neryo abalhume abali haghuma nayu bakamuhamba okwa byalha n’erimusondolha erihika e Damasiki.

Neryo Yesu akabwira omughuma w’okw’abigha biwe omwa Damasiki, athi: ‘Hangana, Anania. Wughende omwa mbalhu eyikahulhawa mwa Lithunganene. Okwa nyumba ya Yuda wubulhaye omulhume oyukahulhawa mwa Saulo. Nabirimusombolha eribya mughombe waghe w’embaghane.’

Anania amowa. Akabya sanga-sangana na Saulo, neryo akamuhira kw’ebyalha biwe n’eribugha athi: ‘Omukama amanyithuma athi wanga thasyalhangira kandi n’erisulibwa n’omulimu abuyirire.’ Neryo-neryo ekindu ekisosire ng’ebikora kikathogha kikalhua okwa meso wa Saulo, neryo akathoka erithasyalhangira.

Saulo akakolesibawa omwanzira oy’obuthoki erikangirirya abandu ab’ebihanda bingi. Akaminyawa ng’omukwenda Paulo, oyo thukendi igha kwa bingi. Aliriryo, thutsuke erilebya ekya Nyamuhanga akathuma Petero erikolha.