OMULHWANA mulere oyo wulhangire hano na Paulo ni Timoteo. Timoteo ikere haghuma n’erihiika liwe e Listra. Erina lya mama wiwe ni ya Euniki na mukaka wiwe ya Loisi.

Eno y’engendo eyakasathu Paulo akabalhamira e Listra. Ekirimo kighuma ekilhabire kutse enyuma waho, Paulo na Baranaba mubatsuka eryasa hano okwa lhughendo lhw’erithulhughania engulhu. Kandi lino Paulo amasubulha na munywani wiwe Sila.

Wunasi ekya Paulo akabwira Timoteo? Akamubulhaya athi: ‘Wunanzire erikolha haghuma naghe na Sila? Wanga thuwathikya erithulhughania engulhu okw’abandu abali omwa bitsweka by’ahali.’

Timoteo akasubiraya athi: ‘Eee, ngananzire erighenda.’ Enyuma waho, Timoteo akasigha erihiika liwe n’erighenda na Paulo na Sila. Aliriryo thuthe thw’igha okwa lhughendo lhwabu, leka thutsuke eriminya ekilhwe kikahika oku Paulo. Hamabirithalhaba ebirimo nga 17 Yesu abuthukire Paulo okwa lhughendo lhwiwe lhwe Damasiki.

Wibuke, Paulo asa e Damasiki erisya higha-highania abigha ba Yesu, aliriryo lino nayu ni mw’igha! Enyuma waho esyanzighu sikathegheka eritha Paulo kusangwa sisyanzire erikangirirya liwe erihambire oku Yesu. Aliriryo abigha bakawathikaya Paulo eritswa. Bakamuhira omwa kithiri n’erimuthogherya eyikwa eyihya sy’olhuhimbo lhw’omuyi.

Enyuma waho Paulo akaghenda e Antiokia eriyakangirirya. Hano h’abigha ba Yesu batsuka eryahulhwa mw’Abakristayo. Paulo na Baranaba neryo bakathumawa erilhua e Antiokia okwa lhughendo lhw’erikangirirya omw’amahanga awa hali. Omughuma okwa miyi eya bakabalhamira ye Listra, ewabu Timoteo.

Neryo, enyuma w’ekirimo nga kighuma, Paulo akasuba e Listra okwa lhughendo olhwa kabiri. Timoteo akabya aghenda haghuma na Paulo na Sila, wunasi aha bakaya? Thungerera okwa mapu, kandi leka thuminye okwa bindi bitsweka.

Erimbere, bakaghenda e Ikonio eyiri hakuhi, neryo n’okwa muyi owa kabiri owakahulhawa mwa Antiokia. Enyuma waho bakaghenda e Troa, n’erikyurukira e Filipi, e Tesalonika ne Beroya. Wanamalhangira Atene okwa mapu? Paulo akakangiriraya eyo. Enyuma waho bakaghunza kirimo kighuma n’engegha bakakangirirya e Korinto. Erighunzerera bak’imana e Efeso ya hake. Neryo bakasuba e Kaisaria omwa lyathu, n’erighenda e Antiokia, eya Paulo ak’ikalha.

Lithya Timoteo akaghenda ebikumi n’ebikumi by’esyamayiro akawathikya Paulo erithulhughania “engulhu yuwene” n’eritsukisya ebithunga bingi eby’Ekikrisitayo. Wasyabya wa kulha, wunamwendi syabya mughombe wa Nyamuhanga omuthaleghulha nga Timoteo?