ABANDU abali hano aba ni bigha ba Yesu. Babirimwowa n’eribya ibane omu Yerusalemu. Neryo abosi bamabya bane mulindirira haghuma, omulenge munene akabugha-bughana enyumba yosi. Akabugha ng’erihunga erikalire. N’ebirimi eby’omuliro bikatsuka eributhuka okwa muthwe owa buli mw’igha. Wanamalhangira omuliro okwa buli mughuma ow’okw’ibo? Ebi byosi bikamanyisaya ki?

Ni kithiko-thiko! Yesu abirisuba omwa lhubulha eyiri thatha wiwe, neryo akutha omulimu abuyirire wa Nyamuhanga w’okw’abigha biwe. Wunasi omulimu abuyirire ono ng’akaleka ibakolha ki? Abosi bakatsuka erikania omwa mibughe muthina-muthina.

Abandu bangi omu Yerusalemu bakowa etoko eyiri ng’erihunga erikalire, neryo bakasya lebaya ekyamabya. Abandi bandu balyalhua omwa awandi mahanga bakasa hano okwa bugheni bw’Abaisraeli obwa Pentekote. Abagheni aba ka bakasweka! Bakowa abigha bakabugha omwa mibughe yabu bakakania okwa bindu eby’eriswekya ebya Nyamuhanga abirikolha.

Abagheni bakabugha bathi: ‘Abandu abosi aba ni be Galilaya. Kikathokekana kithi ibo eribugha omwa mibughe muthina-muthina ey’amahanga awa thukalhwamu?’

Neryo Petero akimana eribasoborera. Akasumba omulenge wiwe n’eribwira abandu ngoku Yesu mw’ithibwa kandi Yehova mwa mulhubukya erilhua omwa baholi. Petero akabugha athi: ‘Lino Yesu ali elhubulha okwa lhuhandi lhw’amalya olhwa Nyamuhanga. Kandi abiryuthulha omulimu abuyirire ow’alhaghanisaya. Kyakilekire imwalhangira n’eryowa ebithiko-thiko ebi.’

Petero akabya abiribugha ebindu ebi, abandu bangi bakayikubaya bwomo busana n’ebyakolhawa oku Yesu. Bakabulhaya bathi: ‘Thukole eki?’ Petero akababwira athi: ‘Mutholere imwabindulha emibere yenyu n’eribatizibwa.’ Neryo okwa kiro ekyo kisa-kisa hakuhi abandu nga 3,000 bakabatizibwa n’eribya bigha ba Yesu.