PETERO na Yoane bakabya babirilhua okw’isinda aho omubiri wa Yesu alhwe, Maria amasighalhaho iyuwene. Akatsuka eririra. Neryo akunama n’erikengemererya omw’isinda, ngokwa thulyalhangira omwa kisasani eky’enyuma. Eyo akalhangira abamalaika babiri! Bakamubulhaya bathi: ‘Busana naki wukalira?’

Maria akasubiraya athi: ‘Babirithwalha Omukama waghe, kandi singasi nga bamuhirire hayi.’ Neryo Maria akabinduka n’erilhangira omulhume. Akamubulhaya athi: ‘Nindi oyuwukarondaya?’

Maria akalengekanaya athi omulhume ni mutheya w’amalima, kandi athi anganabya inyabiri thwalha omubiri wa Yesu. Neryo akabugha athi: ‘Wamabya iwabiri muthwalha, nyibwire aho wamuhirire.’ Aliriryo ibbwa, omulhume oyu ni Yesu. Abiriambalha omubiri owa Maria athe angamuminyiramu. Aliriryo akabya mubirikira okw’erina, Maria akaminya athi oyu ni Yesu. Neryo akathibitha n’eribwira abigha athi: ‘Namabiri lhangira Omukama!’

Enyuma waho, omwa kiro ekya n’ekyo, abigha babiri bane mulendera omwa kyalhu kye Emau, omulhume akaghendenaya nabu. Abigha bali n’obulighe bunene kusangwa Yesu babirimwitha. Aliriryo bakabya bane mughenda, omulhume akabasoborera ebindu bingi erilhua omwa Biblia ebikaleka ibayowa ndeke. Erighunzerera, bakabya bimana ahabw’ebyalya, abigha bakaminya ngok’omulhume oyu ni Yesu. Neryo Yesu akabulirana, n’abigha babiri aba bakanguha erisuba e Yerusalemu eriyabwira abakwenda okw’iyo.

Ebyo bine mulholha embere, Yesu akabuthukira n’oku Petero. Abandi bakatsema bakowa eki. Neryo abigha babiri aba bakaghenda e Yerusalemu erirondya abakwenda. Bakababwira ngoku Yesu alyababuthukira omwanzira. Kandi bakabya banemuthulha eki, wunasi ekindu eky’eriswekya ekikabanika?

Thungerera ekisasani. Yesu akabuthukira omwa kisenge mw’aho, n’omwakine indi olhukyo lhukingire. Abigha ka bakatsema kutsibu! Eki si kiro ky’ebitsange? Wangana ghanza nga ni mirundi mingahi lino eya Yesu amathabuthukira okw’abigha biwe? Wanamaghanza emirundi ithanu?

Omukwenda Toma syali nabu Yesu akabuthuka. Neryo abigha bakamubwira bathi: ‘Thwabirilhangira Omukama!’ Aliriryo Toma akabugha athi akendi tsuka erisamalira Yesu iyuwene-wene imw’ikirirya. Enyuma w’ebiro munani abigha kandi babiri hindana haghuma omwa kisenge ekikingire, lero okwa ndambi eno Toma ane haghuma nabu. Omwa butsumbukirania, Yesu akabuthukira aho omwa kisenge. Toma lino akikiriraya.