EKITSWEKA 5
Erighunga ly’Amaghetse—Ni Bahi Abahulikirira? Ni Bahi Abaghana?
Abangyi omwa buthuku bwa Noa mubakolha ebindu bibi. Enzuko 6:5
Adamu na Eva mubabutha abaana, neryo abandu mubabya bangyi okwa kihugho. Obuthuku mubwahika, abandi bamalaika bamayiyunga oku Sitani omw’iyisamambulha.
Mubasa okwa kihugho n’eriambalha emibiri y’abandu nuku banga thahya abakali. Abakali mubabutha abaana abathe ba buli kiro ababya batsururu n’abawithe akaghalha kanene.
Ekihugho mukyosulha mw’abandu abakakolha ebindu bibi. E Biblia yikabugha yithi: ‘Obubi bw’abandu mubwabya bungyi omwa kihugho, na kandi obuli bulengekania bw’erighanirya ly’omuthima wabu bwabya bubi busa-busa okwa mighulhu yosi.’
Noa mwahulikirira Nyamuhanga n’erihimba obwathu. Enzuko 6:13, 14, 18, 19, 22
Noa abya mulhume mubuya. Yehova mwabwira Noa athi akendi thoghothya abandu babi omw’ighunga linene ly’amaghetse.
Kandi Nyamuhanga mwabwira Noa athi ahimbe obwathu bunene, neryo an’ingirya mw’eka yiwe n’obuli musindo wosi w’ebisoro.
Noa mwakunga abandu okw’Ighunga ly’amaghetse erikayasa, aliriryo mubathahulikirira. Abandi mubasekerera Noa; abandi mubamupona.
Noa abere abirighunza erihimba obwathu, mw’ingirya mw’ebisoro.
