WUKALENGEKANAYA ni mwana wahi okwa kihugho oyuwatsemesaya Yehova ya kutsibu?— Abya ini Mughalha wiwe, Yesu. Thukanaye okwa ebya Yesu akolha ebyaleka Thatha wiwe ow’elhubulha iniatsema.

Eka eyabu Yesu yabya omwa kitsweka eky’olhughendo olhw’ebiro bisathu erilhua e Yerusalemu, eyabya ehekalu ya Yehova eyuwenenga. Yesu mwahulha ehekalu eyo mwa ‘enyumba ya Thatha waghe.’ Iyo n’ab’omw’eka yabu ibakaghenda e Yerusalemu obuli mwaka eriyahindana okwa kiro eky’Erikyuruka.

Omw’omwaka mulebe, omughulhu Yesu abya awithe emyaka 12, mubatsuka olhughendo olhw’erisuba eka bakalhua okw’ibuka ekiro ky’Erikyuruka. Babere bakahika aha bakendi ghotsera, mubabya baminyire ngoku Yesu syali haghuma n’abandi. Neryo aho n’aho Maria na Yozefu mubasuba e Yerusalemu eriyasondya Yesu. Wukalengekanaya Yesu abya hayi?—

Mubeya Yesu iniane omwa hekalu. Abya iniane muhulikirira abakangirirya, kandi abya iniane mubabulya ebibulyo. Kandi ibakabya bamamubulya, iniakasubiraya. Mubasweka busana n’eby’erisubirya biwe ebyuwene. Wanamalhangira ekyaleka Nyamuhanga iniatsemera Mughalha wiwe?—

Ni kwenene, Maria na Yozefu babere babiribana Yesu mubayowa ndeke. Aliriryo Yesu syabya ayilhalikirire. Abya inianasi ngoku ehekalu ni mwanya owuwene ow’eribyamo. Neryo mwabulya athi: ‘Simwabya mwasi ngoku lyabya litholere ingabya omwa nyumba ya Thatha waghe  kwehi?’ Abya inianasi ngoku ehekalu ni nyumba ya Nyamuhanga, kandi mwatsema eribya muyo.

Enyuma waho, Maria na Yozefu mubasubya Yesu ow’emyaka 12 y’eka e Nazareti. Wukalengekanaya Yesu mwayithwalha athi embere sy’ababuthi biwe?— E Biblia yikabugha yithi ‘mwabya akowa ebyo bamubwira.’ Wukalengekanaya ekyo kikamanyisaya ki?— Kikamanyisaya kithi Yesu mwabakenga. Kwenene, mwakolha ebyo ababuthi biwe babya bakamubwira bathi akole, nomukyangabya imukyamanyisya eriyenda amaghetse w’elhusi.—Luka 2:41-52.

Neryo thalengekania okwa kino: Nomwakine indi Yesu abya ahikene, mwakenga ababuthi biwe abathahikene. Eki mukyanaleka Nyamuhanga iniatsema?— Ahathe erithika-thika, mukya mutsemesya, kundi Ekinywe kya Nyamuhanga kikabwira abaana kithi: ‘Mwowe abathatha n’abakoyo wenyu.’ (Abanya Efeso 6:1) Nawu wukendi tsemesya Nyamuhanga wamowa ababuthi bawu, ngoku Yesu akolha.

Eyindi nzira eya wanga tsemeserya mwa Nyamuhanga ly’eribwira abandi b’okw’iyo. Aliriryo abandi bandu bangana bugha bathi abaana balere sibatholere bakakolha  eki. Aliwe omughulhu abandu balengesaya erikakirya abalhwana erikolha eki, Yesu mwabugha athi: ‘Simwathasoma Amasako athi, Wabiritheghekania eripipa busana nawu erikalhua omwa muno w’abaana kwehi?’ (Matayo 21:16) Busana n’ekyo, ithwe abosi thwangana bwira abandi b’oku Yehova kandi ngoku ni Nyamuhanga mubuya, thwamabya ithunanzire erikolha ekyo. Kandi thwamakolha ekyo, ithukendi tsemesya Nyamuhanga.

Ni hayi aha thwang’ighira emyatsi eyihambire oku Nyamuhanga eya thwanga bwira abandi?— Ly’erilhabira omw’igha e Biblia ithune eka. Aliriryo thuk’igha bingyi ithune aha abandu ba Nyamuhanga bakahindanira. Aliwe thwanga minyerera thuthi abandu biwe?—

Ni byahi ebya abandu bakakolha omwa mihindano yabu? Kwenene bakana kangiriraya ebiri omwa Biblia? Bakana somayo n’erikania kuyo? Kwa thukahulikirira thuthya Nyamuhanga, kwa bithe?— Okwa mihindano ey’Ekikrisitayo thukabya ithunalindirire eriowa ebya Nyamuhanga akabugha, kwa bithe?— Kandi ibbwa abandu bamakubwira bathi si kikulhu erighendera okwa ebye Biblia yikabugha? Iwune mwendi bugha wuthi ni bandu ba Nyamuhanga?—

Ekindi kindu eky’erilengekaniako kya kino. E Biblia yikabugha yithi abandu ba Nyamuhanga bangabere “abandu busana n’erina liwe.” (Emibiri 15:14) Kundi erina lya Nyamuhanga ni Yehova, wangana bulya abandu Yehova nga nina Nyamuhanga wabu. Bamabugha bathi eyihi, neryo ithwaminya ngoku si bandu biwe. Kandi abandu ba Nyamuhanga batholere ibabya ibane mubwira abandi okw’Obwami bwa Nyamuhanga. Kandi batholere ibakangania ngoku banzire Nyamuhanga omw’ighendera okwa bihano biwe.—1 Yoane 5:3.

Wamabya iwunasi abandu abakakolha ebyosi ebi, wutholere iwaramya haghuma nabu. Omwa mihindano eyi, wutholere iwahulikirira ndeke n’erisubirya ebibulyo bikabulibwa. Ekyo kya Yesu akolha omughulhu abya omwa nyumba ya Nyamuhanga. Kandi wamakolha ebindu ebi, iwukendi tsemesya Nyamuhanga, ngoku Yesu akolha.

 Wangana lengekania okw’abandi baana abakanibweko omwa Biblia abatsemesaya Nyamuhanga?— Timoteo ni ky’erileberyako eky’embaghane. Thatha wiwe syabya ikirirye Yehova. Aliriryo mama wiwe, Euniki, na mukaka wiwe, Loisi babya bikirirya. Timoteo mwabahulikirira neryo amaminya Yehova.

Timoteo abere abirikulha, omukwenda Paulo mwabungira omwa muyi owa Timoteo abya ikeremu. Mwalhangira ngoku Timoteo anzire iniakolera Yehova ya kutsibu. Neryo mwakokya Timoteo athi baghende haghuma nuku angakolha bingyi omwa mubiiri wa Nyamuhanga. Ehosi-hosi eya babungira, ibakabwira abandu okw’Obwami bwa Nyamuhanga n’oku Yesu.—Emibiri 16:1-5; 2 Timoteo 1:5; 3:14, 15.

Aliriryo, abalhwana basa by’eby’erileberyako ebiri omwa Biblia eby’abatsemesaya Nyamuhanga?— Eyihi nahake. Lengekanaya okwa mwana-mutho Omuisraeli oyuwatsemesaya Nyamuhanga. Omwa buthuku obw’eribyaho liwe, ekihanda kye Suria n’ekye Israeli byabya nzighu. Kiro kighuma, Abaasuria mubarwanisya Abaisraeli neryo bamathwalha omwana-mutho oyo ng’omunyewa. Mubamuthwalha omw’eka  ey’omukulhu w’abasirikali, oyuwabya akahulha mwa Namani. Eyo, mwabya mughombe wa muka Namani.

Namani abya akwire ebihagha. Muhathabya omuthambiri oyukathoka erimulhamya. Aliriryo omwana-mutho Omuisraeli abya inianasi ngoku omuminyereri, omughombe w’embaghane wa Nyamuhanga, anga wathikirye Namani. Namani na mukali wiwe sibabya bakaramya Yehova. Mbwino omwana-mutho anabya w’eribabwire eby’abya asi? Wanga kolire ki?—

Omwana-mutho mwabugha athi: ‘Namani kwa ghenda eyiri omuminyereri wa Yehova e Israeli, ebihagha biwe byanga lhamibirwe.’ Namani mwahulikirira omwana-mutho, neryo amaghenda eyiri muminyereri wa Yehova. Abere abirikolha ekyo omuminyereri amubwira athi akole, Namani mwalhama. Eki mukyaleka Namani inabya muramya wa Nyamuhanga ow’ekwenene.—2 Abami 5:1-15.

Wangananza eriwathikya omundu erigha oku Yehova n’ebya angakolha, ngoku omwana-mutho oyo akolha?— Ni bahi abawukalhangira wuthi wanga wathikya?— Obundi bangana tsuka erilengekania bathi sibali yithagha obuwathikya. Aliriryo wangana babwira okwa bindu bibuya ebya Yehova akakolha. Neryo obundi ibangana hulikirira. Wutholere iwakiminya ngoku eki kikendi tsemesya Nyamuhanga.