OBUNDI buthuku wukanayowa iwuli omwa bulighe n’erikwa embwera?— Wukanabulha nga hane omundu wosi-wosi oyukwanzire?— Abandi baana kwa bakayowa bathya. Aliriryo Nyamuhanga akalhaghanisaya athi: ‘Ingye singendi syakwibirirwa.’ (Isaya 49:15) Eki sikindu kibuya eky’erilengekaniako?— Ee, kwenene Nyamuhanga Yehova athwanzire!

Omusakangyi mughuma owe Biblia mwabugha athi: ‘Thatha na koyo bangana nyirekerania, nikwa Omwami Mukulhu asyanyirembera.’ (Esyonyimbo 27:10) Eriminya ekyo lyangana thuhumulikania, kwa bithe?— Ee, Yehova akathubwira athi: ‘Si wubahe, kusangwa indi haghuma nawu. Kwenene ngendi kuwathikya.’—Isaya 41:10.

Aliriryo, okwa bundi buthuku, Yehova akana lekerera Sitani erithulyambya. Nibya Yehova akalekerera Sitani erilenga okw’abaghombe Biwe. Diabolo mwanaleka Yesu iniaghalhwa kutsibu erihika n’okwa kiika eky’erilhakira Yehova athi: ‘Nyamuhanga waghe, Nyamuhanga waghe, busana naki wukanyisighanaya?’ (Matayo 27:46) Nomwakine indi Yesu abya akaghalhwa, abya inianasi ngoku Yehova amwanzire. (Yoane 10:17) Aliriryo, kandi Yesu abya inianasi ngoku Nyamuhanga akalekerera Sitani erilenga okw’abaghombe Biwe n’erilekerera Sitani abaghalhaye. Omwa yindi sura thukendi syasoborera ekikaleka Nyamuhanga inialekerera Sitani erikolha eki.

Omughulhu thuli balere, okwa bundi buthuku thukubaha. Ng’eky’erileberyako, wune wathathalha?— Muwanakwa obuba?— Abaana banene ibakendikwa obuba. Omukangirirya Mukulhu mwakania okw’omwatsi owahambire okw’ithalha. Aliriryo ekyathalha syabya mwana. Yabya mbuli.

 Omwa sindi nzira wuli ng’embuli. Busana naki? Enzumwa yiri yithi, esyombuli si bisoro binene-nene kutse ebiwithe akaghalha. Kandi bikayithagha omundu iniabilabirira n’eribitheya. Omundu oyukalabirira esyombuli akahulhawa mwa mulisya w’esyombuli.

Omw’omwatsi wiwe, Yesu mwakania okwa mulisya oyuwabya awithe esyombuli kikumi. Aliriryo enguma y’okwa syombuli muyahera. Yanganabya imuyanza eriyalebya ebiri okwa lhundi lhuhandi olhw’ekithwe. Habere hathe hahwa ndambi nene, embuli eyo yabya iyamabirighenda hali okwa sindi. Wangana lengekania embuli eyo nga muyayowa yithi yikayimagha n’erilhangira iyiri iyiyene?—

Omulisya anga kolire ki abiriminya ngoku embuli nguma yabirihera? Angana tswebire embuli n’eribugha athi syendi sondyayo? Kutse angasighire esyombuli 99 omwa kitsweka ekithe mw’obutsibu n’eriyasondekania enguma nyisa? Embuli nguma yanganalekire iniahira h’akaghalha akosi ako?— Kuwabya in’iwe mbuli eya thalha eyo, wangananzire omulisya iniakusondya?—

Omulisya abya anzire esyombuli siwe syosi sya kutsibu, n’enguma eya hera. Neryo mwayasondekania eya thalha. Thalengekania embuli nga muyabya n’obutseme bungahi yikalhangira omulisya akasa! Kandi Yesu mwabugha athi omulisya mwatsema  busana n’eribana embuli yiwe. Mwatsema kutsibu busana n’embuli eyo kwilhaba esyombuli 99 esithahera. Neryo ibbwa, nindi oyuli ng’omulisya oyukakanibawako omw’omwatsi wa Yesu? Nindi oyukathutsomana kutsibu ng’omulisya oyuwatsomana esyombuli siwe?— Yesu mwabugha athi Thatha wiwe ow’elhubulha yukakolha ekyo. Na Thatha wiwe oyu ni Yehova.

Nyamuhanga Yehova ya Mulisya Mukulhu ow’abandu biwe. Anzire abosi abakamukolera, imwamuli n’abalere ng’iwe. Syanzire n’omughuma w’okw’ithwe akahuthalha kutse erithoghothibwa. Ahathe erithika-thika ka kikahumulikanaya eriminya ngoku Nyamuhanga athutsomene kutsibu athya!—Matayo 18:12-14.

Kwenene wun’ikirirye Yehova Nyamuhanga?— Wukana muthwalha nga thatha wawu kutse ng’omundu oyukutsomene?— Ni kwenene sithwanga lhangira Yehova, kundi ni Mulimu. Awithe omubiri owathalhangirawa n’ameso wethu. Aliriryo aneho, kandi akathulhangira. Akabya inianasi omughulhu thukayithagha obuwathikya. Kandi  thwangana kania nayu erilhabira omwa misabe, ngoku thukanakanaya n’owundi mundu okwa kihugho. Yehova anzire ithwakolha eki.

Neryo obuthuku bwamahika wukayowa iwuli omwa bulighe kutse iwuli iwuwene, wutholere iwakolha ki?— Bwira Yehova. Yithunde hakuhi nayu, akendi kuhumulikania n’erikuwathikya. Wibuke ngoku Yehova akwanzire, n’omughulhu wanga yowa iwuli iwuwene. Thusukule esyo Biblia syethu. Hano omwa Esyonyimbo 23, eritsuka n’omulhondo 1, hakathubwira hathi: ‘Yehova ni Mulisya waghe; singendi syabulha kindu. Akaleka ingalhuhuka omwa lhulisiryo lhw’ebithi bibisi, akanyisondolha ahali amaghetse awathekire.’

Hulikirira ekyo omuhandiki akathasyongerako, omwa mulhondo 4: ‘Nomunanga lhaba omwa musya w’omwirimya owakalire, singendi syubaha ebibi, kusangwa wuli haghuma naghe; omwigho wawu ow’omulisya, n’ekibingyo kyawu byasyanyibika omwa buholho.’ Abandu ku bakayowa bathya Nyamuhanga wabu amabya ini Yehova. Bakabana erihumulikana omughulhu bali omwa bitsibu. Nawu kwa wukayowa wuthya?—

Ngoku omulisya w’olhwanzo akalabirira ekihyo kiwe, Yehova kwa kanalabirira athya ndeke abandu biwe. Akabakanganaya enzira mbuya eya batholere erikwama, kandi bakatsema erimukwama. Nomubangabya omwa bitsibu bingyi, sibali ubaha. Omulisya akakolesaya omwigho wiwe kutse ekibingyo kiwe eritheya esyombuli okwa bisoro ebyanga  sihuthalya. E Biblia yikathubwira ngoku omulisya mulere ya Dawudi atheghaya esyombuli siwe okwa ndale n’edubu. (1 Samweli 17:34-36) N’abandu ba Nyamuhanga banasi Yehova ngoku akendi batheya. Bangana yowa buholho kundi Nyamuhanga ane haghuma nabu.

Omwa kwenene Yehova anzire esyombuli siwe, kandi akasibuya-buya ndeke. E Biblia yikabugha yithi: ‘Asyalisya esyombuli siwe ng’omulisya, asyabaghalira ebyana by’esyombuli omwa byalha biwe.’—Isaya 40:11.

Eriminya Yehova kwali athya, likanaleka iwayowa ndeke?— Wunanzire eribya mughuma w’okwa syombuli siwe?— Esyombuli sikahulikirira omulenge w’omulisya wasyo. Sikayithunda hakuhi nayu. Wukanahulikirira Yehova?— Wune hakuhi na Yehova?— Byamabya ikwa biri bithya, isiwubaha. Yehova asyabya haghuma nawu.