ABANYWANI ba abandu abathukanza ithwabya ithunemukania nabu n’erisiba nabu. Aliriryo ni kikulhu eribya n’abanywani abatholere. Wukalengekanaya nindi oyuwangabya munywani wethu mubuya?— Ni Yehova Nyamuhanga.

Mbwino kyangana thokekana ithwe eribya banywani ba Nyamuhanga?— E Biblia yikabugha yithi Abrahamu, omulhume oyuwabyaho kera, abya ‘mwira’ kutse munywani wa Yehova. (Yakobo 2:23) Wunasi nga ni busana naki?— E Biblia yikasubiraya yithi Abrahamu mwowa Nyamuhanga. Mwabya mwowa n’omughulhu abwirawa indi akole ekindu ekikalire. Busana n’ekyo, eribya munywani wa Yehova, thutholere ithwakolha ebikamutsemesaya, ngoku Abrahamu akolha kandi ngoku Omukangirirya Mukulhu akabera erikolha.—Enzuko 22:1-14; Yoane 8:28, 29; Abaebrania 11:8, 17-19.

 Yesu mwabwira abakwenda biwe athi: ‘Nenyu muli bira baghe, mwamakolha ebyo ngabahana.’ (Yoane 15:14) Kundi ebyosi ebya Yesu abwira abandu byalhua oku Yehova, Yesu abya iniakamanyisaya athi banywani biwe ba abandu abakakolha ebya Nyamuhanga akababwira athi bakole. Omw’okwenene, banywani biwe abosi babya banzire Nyamuhanga.

Abaghuma b’okw’abanywani b’Omukangirirya Mukulhu ab’okwa ndungu babya ib’abakwenda biwe, kandi wangana lhangira ebisasani byabu okwa lhupapura 75 olhw’ekitabu kino. Ibakaghenda haghuma nayu n’erimuwathikya erikolha omubiiri w’erithulira. Yesu iniakaghunza buthuku bunene iniane n’abalhume aba. Ibakalya haghuma. Ibakakanaya oku Nyamuhanga ibane haghuma. Kandi mubakolha n’ebindi bindu ibane haghuma. Aliriryo Yesu anabya awithe n’abandi banywani bangyi. Iniakababungira neryo ibatsangira haghuma.

Eka nguma eya Yesu abya akabungira yabya omwa muyi muke owe Betania, omuyi owabya hakuhi n’omuyi munene owe Yerusalemu. Wangan’ibuka nga ni bahi?— Babya Maria, Marata, na mughalha wabu  Lazaro. Yesu mwahulha Lazaro mwa munywani wiwe. (Yoane 11:1, 5, 11) Enzumwa eyaleka Yesu inianza eka eyi n’eritsangira haghuma nabu yiri yithi babya banzire Yehova n’erimukolera.

Eki sikiri manyisaya kithi Yesu mwathatsomana abandu abathabya bakakolera Nyamuhanga. Mwabakangania olhukeri. Nibya mwaghenda omw’amanyumba wabu n’erirya haghuma nabu. Eki mukyaleka abandi ibabugha bathi Yesu ni ‘mwira w’abasolesya n’abakolha nabi.’ (Matayo 11:19) Si bugha indi Yesu abungira abandu aba kundi abya anzire ebya babya bakakolha. Ababungira nuku ababwire ebihambire oku Yehova. Mwalengesya eribawathikya erihindulha emibere yabu mibi n’erikolera Nyamuhanga.

Eki mukyabya kiro kighuma omwa muyi wa Yeriko. Yesu alhaba omwa muyi oyo akaghenda e Yerusalemu. Habya abandu banene, kandi omw’abandu abo mwabya imune omulhume oyukahulhawa mwa Zakayo. Abya anzire erilhangira Yesu. Aliriryo Zakayo abya mukuhi, neryo isyanga thoka erilhangira Yesu kundi abandu babya bangyi. Neryo mwaghenda embere amayasamba omwa muthi nuku angalhangira Yesu akalhaba.

Yesu abere akahika ahali omuthi oyo, mwasamalira eyighulhu n’eribugha athi: ‘Anguha, wukime, kusangwa ngendiasa ewawu munabwire.’ Aliriryo Zakayo abya  mulhume mughuda oyuwabya iniabirikolha ebindu bibi. Ekyaleka Yesu iniaghenda omwa nyumba y’omulhume oyuli ng’oyu niki?—

Si bugha indi Yesu abya anzire ebyo omulhume oyo abya akakolha. Aghendayo eriyabwira Zakayo ebihambire oku Nyamuhanga. Yesu Mwalhangira ngoku omulhume oyo mwalengaho kutsibu erimulhangira. Busana n’ekyo mwaminya ngoku obundi Zakayo angana hulikirira. Eyi yabya ndambi yuwene ey’eribwira Zakayo okwa nzira eya Nyamuhanga akabwira abandu athi bakwame.

Neryo ni kyahi ekikabya?— Zakayo akanza erikangirirya lya Yesu. Akayikubaya bwomo busana n’eritheba abandu, kandi akayilhaghanisaya erisubulya esyosente esya anyegha okw’abandu. Enyuma waho amabya mwigha wa Yesu. Neryo eki mukyaleka Zakayo iniabya munywani wa Yesu.—Luka 19:1-10.

Thwamakwama eky’erileberyako eky’Omukangirirya Mukulhu, ithwangana bungira abandu abathe banywani bethu?— Ee. Aliriryo sithwendi babungira kundi thwanzire ebya bakakolha. Kandi sithwendi kolha ebindu bibi ebya bakakolha. Thukendi babungira nuku thubabwire ebihambire oku Nyamuhanga.

 Aliriryo abanywani bethu ab’okwa ndungu b’abo abathukanza ithwasiba nabu. Eribya banywani abatholere, bakathekawa eribya abandu abo Nyamuhanga anzire. Abandi banganabya isibasi Yehova nga nindi. Aliriryo bamabya banzire erimw’ighako, thwangana bawathikya. Kandi bakabya babirianza Yehova ngoku thumwanzire, ibanganabya banywani bethu ab’okwa ndungu.

Hane eyindi nzira eyanga thuwathikya eriminya omundu nga anganabya munywani mubuya. Thungerera ebindu ebya akakolha. Akanakolha abandi ba nabi kandi iniathatsomana? Ekyo sikitholere, kwa bithe?— Nina mundu oyukabera eriyilethera ebitsibu? Sithwanzire thukabana ebitsibu habw’erisiba nayu, kwa bithe?— Kutse akanakolererera ebindu bibi neryo inialengekania athi awithe amenge manene kundi sibathamuhamba? Omundu oyo nomwangabya isyathahambwa, Nyamuhanga akabya iniabirilhangira eby’alyakolha, kwa bithe?— Wukalengekanaya abandu abakakolha ebindu ng’ebi banganabya banywani bethu babuya?—

Imaya e Biblia yawu thwanalebya ekya yikabugha ngoku abanywani bethu bakahamba okwa syongebe syethu. Erisako liri omwa 1 Abanya Korinto sura 15, omulhondo 33. Wabirihikaho?— Hakasoma hathya: ‘Simuthebibawe, kundi abira babi bakatsandaya omuthima mubuya.’ Eki kikamanyisaya kithi thwamalendera n’abandu babi, nethu ithwanganabya babi. Kandi kwa bine bithya thwamalendera n’abandu ababuya, ithukendibya n’emitse mibuya.

Isithw’ibirirawa ngoku Omundu mukulhu omwa syongebe syethu ni Yehova. Sithwanzire thukatsandya obughuma bwethu nayo, kwa bithe?— Busana n’ekyo, thutholere ithwa lhangira thuthi thukanywana abandu abanzire Nyamuhanga basa.