WUNE wathowa omundu wosi-wosi akakania okwa nduli y’ekihugho?— Munabwire abandu bangyi bakakanaya kuyo. Abandi bandu bakalengekanaya bathi ekihugho kikendi syathoghothibwa omwa lhuhi olhw’esyobbomu esikalha-kalire. Wukalengekanaya Nyamuhanga ane mwendi syathoghothya ekihugho kyethu ekyuwene kino n’olhubulha olhubuyanga olhuli kw’esyongununu esikakangabasanaya?—

Ngoku thwabirigha, e Biblia yikakanaya okwa nduli y’ekihugho. Yikabugha yithi: ‘Ekihugho kyasyahwa.’ (1 Yoane 2:17)  Wukalengekanaya Ekihugho ekya thwikereko kino kya kikendi syathoghothibwa?— Eyihi, e Biblia yikabugha yithi Nyamuhanga mwahangika ekihugho nuku ‘kikalhawemo,’ kwenene, abandu erikalha mukyo n’eritsemera kyo. (Isaya 45:18) Esyonyimbo 37:29 hakabugha hathi: ‘Abathunganene basyikalha omwa kihugho mwa buholho, n’erisighalyakyo kera na kera.’ Eki kikaleka e Biblia iyathasya bugha yithi ekihugho kya syakotha.—Esyonyimbo 104:5; Omugambuli 1:4.

Neryo ekihugho kino kyamabya isikyendi syathoghothibwa, ni kyahi ekikendi syathoghothibwa?— Thwanganabana eky’erisubirya thwamalebya ndeke ebyabya omwa buthuku bwa Noa. E Biblia yikasoborera yithi: ‘Ekihugho ky’omughulhu oyo mukya heribwa omw’ighunga ly’amaghetse.’—2 Petero 3:6.

Muhanabya abandu abakalhama enduli y’ekihugho omwa biro bya Noa?— E Biblia yikabugha yithi Nyamuhanga ‘mwatheya Noa omuthuli w’erithunganene haghuma n’abandu musanju, mwabalyabo ekiro aletha erighunga ly’amaghetse okwa kihugho ky’abandu abathakenga Nyamuhanga.’—2 Petero 2:5.

Neryo ibbwa kwesi, ekihugho ekya thoghothibawa ni kyahi? Ky’ekya thwikereko kino, kutse b’abandu babi?— E Biblia yikabugha yithi kyabya ‘kihugho eky’abandu abathakenga Nyamuhanga.’ Kandi wanamalhangira, Noa akahulhawa mwa ‘muthuliri.’ Wukalengekanaya abya akathulira ki?— Noa abya akakunga abandu okwa nduli ‘ey’ekihugho eky’omughulhu oyo.’

Yesu abere akakania okw’Ighunga ly’amaghetse, mwabwira abigha biwe okwa ebya abandu babya bakakolha enduli eyo yithe yahika. Mwababwira athi: ‘Omwa biro ebyo embere w’erighunga ly’amaghetse, mubabya bakalya n’eripulya, mubabya bakahikya n’eriherukania, erihika okwa kiro ekyo Noa ingira omwa bwathu. Mubathaminya ekyabya erihika aho erighunga ly’amaghetse lyasira n’erithwalha bosi.’ Neryo Yesu mwabugha athi abandu ku bangabere bathya enduli y’omughulhu ono yithe yahika.—Matayo 24:37-39.

 Ebinywe bya Yesu bikakanganaya ngoku thwangan’igha omwatsi mukulhu omwa bindu ebya abandu babya bakakolha Erighunga ly’amaghetse lithe lyabya. Erikwamana n’ebya thw’igha omwa Sura 10 ey’ekitabu kino, wun’ibukire ebya abandu abo babya bakakolha?— Abandi balhume babya bakakolha abandi ba nabi n’erikolha ebindu by’obwithi. Aliriryo Yesu mwabugha athi, abandi bandu bangyi mubathahulikirira Nyamuhanga akathuma Noa eribathulira.

Neryo ekiro mukyahika Yehova amabwira Noa athi akendi thoghothya abandu babi omw’ighunga ly’amaghetse. Amaghetse anga hikire omwa kihugho kyosi, nibya n’omwa bithwe. Yehova mwabwira Noa athi ahimbe obwathu bunene. Bwabya ng’esanduko nene kandi nyiri-nyiri, ngoku wangana lhangira wamalebya ekisasani ekiri okwa lhupapura 238.

Nyamuhanga mwabwira Noa athi akole obwathu bunene obwanga mulhamirye haghuma n’eka yiwe, kuthya n’ebisoro bingyi. Noa n’eka yiwe mubakolha kutsibu. Mubathema emithi minene-minene, neryo bamakolesya yo erikolha obwathu. Mubaghunza emyaka mingyi ibane mukolha obwathu obu kundi bwabya bunene.

Wangan’ibuka nga ni kindi kyahi ekya Noa abya iniane mukolha omwa myaka eyosi eyi iniane muhimba obwathu?— Abya iniane muthulira, erikunga abandu erikwamana n’Erighunga ly’amaghetse erikayasa. Muhanabya abakamwowa? Muhathabya n’omughuma kwihaho eka ya Noa. Abandi abosi byabya omwa byabu. Wun’ibukire ebya Yesu abugha athi babya bakakolha?— Babya bakasiba okw’irya n’erinywa n’eriherukania. Mubathalengekania bathi ibo ni bandu babi, kandi mubathanza erihulikirira Noa. Neryo thulebaye ekyabya kya bahikireko.

Noa n’eka yiwe babere babiringira omw’obwathu, Yehova mwakinga olhuyi. Erihika n’okwa ndambi eyi, abandu ababya eyihya mubath’ikirirya bathi Erighunga ly’amaghetse likendibya. Aliriryo kitsumbukirania, amaghetse mwatsuka erithoghonga omwa kyanya! Siyabya mbulha eya buli kiro. Yabya mbulha nene kutsibu! Buthuku buke amaghetse  mwabya nyusi nene-nene esikahuma kutsibu. Amaghetse mwasendya emighogha n’erikumbaghalya amabwe manene-manene nga ni mabwe make-make. Kandi ibbwa abandu ababya eyihya sy’obwathu?— Yesu akabugha athi: ‘Erighunga ly’amaghetse mulyasa n’erithwalha abosi.’ Abandu abosi ababya eyihya mubaholha. Busana naki?— Ngoku Yesu abugha, ‘mubathaminya,’ ni bugha mbu mubathatsomana. Mubathahulikirira!—Matayo 24:39; Enzuko 6:5-7.

Wibuke ngoku Yesu mwabugha athi ebyahika okw’abandu abo bikathweghesaya erisomo munabwire. Ni somo lyahi?— Abandu mubathoghothibwa si busana n’eribya babi lisa, aliriryo kundi n’abangyi b’okw’ibo mubasulhusutha kutsibu erileka ibathabana obuthuku obw’erigha oku Nyamuhanga n’ebyabya iniakayakolha. Thutholere ithwa yitheya nuku sithubye ng’ibo, kwa bithe?—

Wukalengekanaya Nyamuhanga anemwendi syathoghothya ekihugho omwa maghetse kandi?— Eyihi, Nyamuhanga mwalhaghanisya athi syendi syasakolha ekyo. Mwabugha athi: ‘Nga kanda ekima kyaghe omwa bithu, nakyo kyasyabya kiminyikalho.’ Yehova mwabugha athi ekima kyangabere kiminyikalho ekikakanganaya ngoku ‘amaghetse syendi syaswabya akaghunga, kandi n’eriherya emibiri yosi.’—Enzuko 9:11-17.

Busana n’ekyo, thwangana kakasya ngoku Nyamuhanga syendi syaswathoghothya ekihugho omwa maghetse. Nomwabine, ngoku thwabirilhangira, e Biblia yikakanaya okwa nduli y’ekihugho. Nyamuhanga akendi syabya  akathoghothya ekihugho, nindi oyukendi syalhama?— Mbwino b’abandu abanzire ebindi bindu bya kutsibu neryo ibyaleka ibathanza erigha oku Nyamuhanga? Mbwino b’abandu abakasulhusutha kutsibu indi sibangabana n’obuthuku obw’erigha e Biblia? Wukalengekanaya wuthi ki?—

Thwanzire ithwabya baghuma b’okw’abandu abo Nyamuhanga akendi syalhamya, kwa bithe?— Sikyanga thutsemesya eka yethu yamabya ng’eya Noa nuku Nyamuhanga athulhamaye ithwe abosi?— Ithwe erisyalhamibwa okwa nduli y’ekihugho, thutholere ithwa yitheghererya ngoku Nyamuhanga akendi syathoghothya kyo n’eriletha ekihugho kiwe kihya-kihya ekithunganene. Thulebaye ngoku akendi syakolha eki.

E Biblia yikathuha eky’erisubirya omwa Danieli sura 2, omulhondo 44. Omulhondo oyu akakanaya okwa buthuku bwethu akabugha athi: ‘Okwa biro by’abami abo, Nyamuhanga w’elhubulha asyahangania obwami obuthendi syaheribwa na kera; kutse erithabalha lyabo siryendi syasighirwa abandi bandu. Nikwa bwasyathulhanga mwa bihandi-bihandi, n’eribugha amami wosi aya; nabo bwasyahangana kera na kera.’

Wanamayitheghererya omulhondo oyu?— E Biblia yikabugha yithi obuthabali bwa Nyamuhanga bukendi syathoghothya amathabali wosi aw’ekihugho. Busana naki?— Kundi sibali kenga oyo Nyamuhanga abirisombolha eribya Mwami. Kandi omwami oyo ni wahi?— Ni Yesu Kristo!

Yehova Nyamuhanga awithe obughabe obw’erithwamu nga ni buthabali bwahi obutholere erithabalha, kandi abirisombolha Mughalha wiwe, eribya Mwami. Yesu Kristo, Omuthabali oyo Nyamuhanga abirisombolha, akisiya iniakolha omubiiri ow’erithoghothya amathabali wosi aw’ekihugho. Eribisulirwa sura 19, omulhondo 11 erihika okwa 16, hakamukanayako iniane mukolha ekyo, nibya ngoku ekisasani eki kikakanganaya. Omwa Biblia, olhuhi lhwa Nyamuhanga olhukendi syathoghothya amami wosi w’ekihugho lhukahulhawa mwa Harmagedoni.

Nyamuhanga akabugha athi Obwami bwiwe bukendi syathoghothya amathabali w’abandu. Mbwino nethu akathubwira athi thuthoghothaye  gho?— Eyihi, omwa Biblia, e Harmagedoni yikahulhawa mwa ‘amalhwa w’ekiro kinene kya Nyamuhanga Omuthoki w’Ebyosi.’ (Eribisulirwa 16:14, 16) Inga, e Harmagedoni ni lhuhe lhwa Nyamuhanga, kandi akakolesaya Yesu Kristo erisondolha amahe w’elhubulha omw’amalhwa. Mbwino olhuhi lhwe Harmagedoni lhuli hakuhi? Thulebaye ngoku thwangabana eky’erisubirya.