OMUNDU wosi-wosi ane athakukolha nabi?— Mwana kuhuthalya kutse erikubwira ekindu ekithuwene?— Wunatholere iwathuhulya?—

Abandu banene, omundu amabakolha nabi, nabu bakanza ibamukolera ekyo. Aliriryo Yesu mwathweghesya athi thutholere ithwa ghanyira abakathusoberaya. (Matayo 6:12) Kandi ibbwa omundu amathukolha nabi mirundi mingyi? Thwanga mughanyira mirundi mingahi?—

Ekyo kya Petero anza eriminya. Neryo kiro kighuma mwabulya Yesu athi: ‘Ngana tholere erimughanyira ngendo nyingyi erihika ngendo musanju?’ Emirundi musanju siyiri ghunza. Yesu mwabugha athi: ‘Wutholere iwaghanyira esyongendo makumi musanju ngendo musanju’ omundu amakusoberya emirundi mingyi ng’eyo.

Esyo ni ngendo nyingyi! Sithwanga thoka eryibuka ebisobyo ebyosi ebi kutse ebindu bibi eby’omundu athukolera, kwa bithe? Kandi ekyo kya Yesu athubwira: Sithutholere thuk’ibuka omuhendo w’ebisobyo ebya abandi bakathukolera. Bamathusaba ekighanyiro, thutholere ithwa baghanyira.

Yesu anza erikangania abigha biwe ngoku ni kikulhu erighanyira. Neryo abere abirisubirya ekibulyo kya Petero, mwabwira abigha biwe b’olhughano. Wunanzire eriowa lho?—

 Habya omwami mughuma oyuwabya mubuya. Abya w’olhukeri. Iniakabweka n’abaghombe biwe b’esyosente omughulhu bali omwa buyithawa. Aliriryo ekiro mukyahika omughulhu omwami anza abaghombe biwe abali n’esyosente siwe bamuthuhe. Mubaletha omughombe mughuma oyuwabya mw’omwinda w’omwami ow’esyosente esikahulhawa mwa dinari miliyoni 60. Esyo syabya sente nene!

Aliriryo, omughombe abya iniabirikolesya esyosente esyosi esy’omwami kandi isyangathoka erimuthuha.  Neryo omwami mwalhaghira athi omughombe aghulibawe. Kandi omwami mwabugha athi baghulhaye n’omukali w’omughombe n’abaana biwe n’ebyosi eby’abya awithe. Neryo esyosente esyanga lhuiremo banga sihere omwami. Wukalengekanaya eki mukyaleka omughombe iniayowa athi?—

Mwakukama embere sy’omwami n’erimusaba athi: ‘Kisi, thasyamba obuthuku, nasyakuthuha ebyosi ebya wukanyibanza.’ Kuwabya mwami, wanga kolere omughombe yaki?— Omwami mwakwira omughombe wiwe y’obulighe. Neryo omwami mwamughanyira. Mwabwira omughombe athi alek’ithuha n’enusu n’enguma ey’okwa syomiliyoni 60. Eki ka kyangabya imukyatsemesya omughombe ya kutsibu!

Aliriryo ni kyahi eky’omughombe oyo abya akolire? Mwaghenda neryo amasangana owundi mughombe oyuwabya mw’omwinda wiwe ow’esyosente kikumi. Mwawirira omughombe mulikyabu n’erimuha omughatsulhu, athi: ‘Wunyithuhe esyosente syaghe kikumi esya wulimu!’ Thalengekania omundu erikolha ekindu ekiri ng’eki, kwilhabirirya enyuma w’omwami erimughanyira omwinda munene?—

Omughombe oyuwabya mw’omwinda w’esyosente kikumi abya nzama. Isyanga thuha esyosente esyo aho n’aho. Neryo mwakukama embere sy’omughombe mulikyabu n’eriyilemba-lemba athi: ‘Kisi, thasyamba obuthuku, nasyakuthuha ebyosi ebya wukanyibanza.’ Omulhume anabya atholere erithasyaha omughombe mulikyabu y’obuthuku?— Wanga kolire ki?—

Omulhume oyu syabya w’olhukeri ng’omwami kwabya. Anza esyosente siwe aho n’aho. Neryo kundi omughombe mulikyabu syanga thokire erithuha esyosente esyo, mwabugha athi bamuhire omwa muliki. Abandi baghombe mubalhangira ebyosi ebi bikabya, kandi mukitha batsemesya. Mubakwira omughombe oyuwahirawa omwa muliki y’obulighe. Neryo mubaya bwira omwami ekyabere.

 N’omwami nayu mwathatsema busana n’ekyo. Mwahithana kutsibu okw’omughombe oyuthaghanyira. Neryo mwamubirikira n’eribugha athi: ‘Iwe mughombe mubi, mundakughanyira omwinda waghe wosi owa wulimu? Nawu siwanga ghanyire omughombe mulikyenyu?’

Omughombe oyuthaghanyira angasangirwe iniabir’ighira okwa mwami mubuya kw’erisomo. Aliwe mwath’igha ki. Neryo omwami mwabugha athi omughombe oyo aghusawe omwa muliki erihika aho akendi syathuhira esyosente siwe esyosi miliyoni 60. Kandi kilhangirikire ngoku syangabwene esyosente sy’erithuha omwami iniane omwa muliki. Busana n’ekyo angabere omwa muliki erihika okwa lhuholho.

Yesu abere akaghunza eribwira abigha biwe b’olhughano olhu, mwababwira athi: ‘Thatha waghe oyuli omwa lhubulha asyabakolha athya mwamathendi bughira obuli mundu mulikyabu erilhua omwa mithima yenyu.’—Matayo 18:21-35.

Wanamalhangira, ithwe abosi thuli mw’omwinda wa Nyamuhanga munene. Erithwalira haghuma, engebe yethu yikalhua oku Nyamuhanga!  Thwam’ingania-ngania omwinda owa thuwithe embere sya Nyamuhanga, ithukendi lhangira ngoku abandi bandu bawithe omwinda wethu muke. Ebya thukabathuhaya bingene n’esyosente kikumi esy’omughombe athuhaya omughombe mulikyabu. Aliriryo eribanza eryathuwithe embere sya Nyamuhanga busana n’amalholho awa thukakolha lingene-ngene n’esyosente miliyoni 60 esyo omwami abya akathuhya omughombe.

Nyamuhanga ni w’olhukeri lhunene. Nomuthwangabya ithwabiri sobya, akathughanyira. Syali bugha athi thuthuhe omw’ileka thukaholha erihika kera na kera. Aliriryo erisomo erya thutholere ithwibuka lya lino: Nyamuhanga akathughanyira thwamaghanyira abakathusoberaya. Eki ni kindu eky’erilengekaniako, kwa bithe?—

Neryo omundu amakukolha nabi neryo akabugha athi wumughanyire, ni kyahi ikya wangakolha? Wangana mughanyira?— Kandi ibbwa amakolha eki mirundi mingyi? Iwune mwendi mughanyira?—

Thwamabya in’ithwe thukasaba omundu y’ekighanyiro, ithukendi anza athughanyire, kwa bithe?— Kwesi nethu thutholere ithwakolha ekyo. Isithwa kwama kya bugha thuthi thwama mughanyira, aliriryo thutholere ithwamughanyira erilhua omwa muthima. Thwamakolha ekyo, ithwamakangania kwenene ngoku thwanzire eribya bigha b’Omukangirirya Mukulhu.