THAMBWIRA, ni kitabu kyahi ekya wanzire kutsibu?— Abandi baana ibakendi sombolha ekikakanaya okwa bisoro. Abandi ibasombolha ekitabu ekiri mw’ebisasani binene. Kyangana tsemesya erisoma ebitabu ebyo.

Aliriryo ebitabu ebyuwene omwa kihugho kyosi bye bikathubwira ekwenene eyihambire oku Nyamuhanga. Ekighuma ky’okwa bitabu ebi kilengire ebindi ebyosi. Ekitabu eki ni kyahi?— Ye Biblia.

Busana naki e Biblia ni y’omughaso?— Kundi Nyamuhanga yuwathuhayo. Yikathubwira ebimuhambireko n’okwa bindu ebibuya ebyakendi syathukolera. Kandi yikathubwira ebya thutholere ithwakolha nuku thwanga mutsemesya. Yiri ng’ebaruha eyikalhua oku Nyamuhanga.

Nyamuhanga angana thwiremu erihandikira e Biblia eyosi y’elhubulha neryo iniaha y’abandu. Aliriryo mwathakolha ekyo. Nomwakine indi omwatsi owalimu alhua oku Nyamuhanga, mwakolesya abaghombe biwe ab’okwa kihugho erihandika e Biblia.

Nyamuhanga mwakolha ekyo kyathi?— Eriyitheghererya ngoku akolha eki, lengekanaya okwa kino. Omughulhu thukowa omulenge w’omundu okwa radio, omulenge oyo anganabya ini w’omundu oyuli hali kutsibu. Omughulhu thukalebaya etivi, thwangana lhangira ebisasani eby’abandu abali omwa bindi bihugho, kandi ithwangan’owa ebya bakabugha.

Nibya abandu bangana ghenda omwakyanya ibahika okwa kwezi, kandi ibathuma omwatsi w’okwa kihugho ibane eyo. Wunalhue wasi ekyo?— Abandu bamabya ibangana kolha ekyo, mbwino Nyamuhanga angana thuma omwatsi erilhua elhubulha?— Ee, angana thumagho! Kandi mwakolha ekyo kera abandu bathe babya n’eradio kutse etivi.

 Musa ni mughuma w’okw’abandu abowa Nyamuhanga akakania. Musa mwathalhangira Nyamuhanga, aliriryo iniakowa omulenge wa Nyamuhanga. Abandu bangyi babya ibaneho eki kikabya. Erithwalira haghuma, okwa kiro ekyo Nyamuhanga mwasuka-sukania ekithwe ekyosi, kandi muhabya emilhumo n’ehirabyo. Abandu mubaminya ngoku Nyamuhanga mwakakanaya, aliriryo mububaha kutsibu. Neryo mubabwira Musa bathi: ‘Nyamuhanga syabughe nethu thukasyaholha.’ Enyuma waho, Musa mwahandika emyatsi eya Nyamuhanga abugha. Kandi ebyo Musa ahandika bine omwa Biblia.—Eriluayo 20:18-21.

Musa mwahandika ebitabu bithano eby’erimbere omwa Biblia. Aliriryo siyo musa oyuwahandika. Nyamuhanga mwakolesya hakuhi abalhume 40 erihandika e Biblia. Abalhume aba babyaho kera, kandi e Biblia  muyaghunza emyaka mingyi iyine muhandikwa. Erithwalira haghuma, muhalhaba emyaka nga 1,600 iyine muhandikwa! Eky’eriswekya, nomwakine indi abaghuma b’okw’abalhume aba sibabya basene, ebyosi ebya bahandika bikalighirana ndeke-ndeke.

Abandi abo Nyamuhanga akolesaya erihandika e Biblia babya basibwe. Nomwakine indi Musa anabya mulisya, mwasondolha ekihanda kye Israeli. Solomono abya mwami oyuwabya awithe amenge manene omwa buthuku bwiwe kandi abya mughuda kutsibu omwa kihugho kyosi. Aliriryo, abandi bahandiki sibabya basibwe kutsibu. Amosi abya akalabirira emithi y’emithini.

Eryongera okw’ekyo, omuhandiki mughuma abya muthambiri. Wunasi erina liwe?— Abya ini Luka. N’owundi muhandiki abya musolesya. Abya akahulhwa mwa Matayo. N’owundi abya asi ndeke ebilhaghiro by’edini ey’Abayuda. Mwahandika ebitabu bingyi omwa Biblia kwilhaba abandi abosi. Wunasi erina liwe?— Abya ini Paulo. N’abigha ba Yesu, Petero na Yoane, nabu ababya bughuma b’okw’abahandiki be Biblia, babya basohi.

Abangyi b’okw’abahandiki be Biblia mubahandika emyatsi eyihambire okwa bindu ebya Nyamuhanga akendi syakolha omwa buthuku bw’embere. Mubaminya bathi ebindu ebyo isibiri byabya nibya?— Nyamuhanga asangawa iniabiriha abalhume abo b’omwatsi. Abya iniabiribabwira ebikendi syabya.

Yesu, Omukangirirya Mukulhu, abera akasa okwa kihugho, ebitabu bingyi ebye Biblia byabya ibyabiri handikwa. Wibuke ngoku Omukangirirya Mukulhu abya iniane elhubulha. Abya inianasi ebya Nyamuhanga abya niabirikolha. Mwanaligha ngoku e Biblia yalhua oku Nyamuhanga?— Ee, mwaligha.

Yesu abere akabwira abandu b’okwa mibiiri ya Nyamuhanga, mwasoma emyatsi eyo erilhua omwa Biblia. Okwa bundi buthuku mwababwira ebiri omwa Biblia isyathasomabyo. Kandi Yesu mwathulethera omwatsi mungyi erilhua oku Nyamuhanga. Yesu mwabugha athi: ‘Ngabwira ekihugho emyatsi eyo ng’owa erilhua okw’iyo.’ (Yoane 8:26) Yesu abya iniabiriowa  emyatsi mingyi erilhua oku Nyamuhanga kundi abya ikere nayu. Wamanza erisoma omwatsi owa Yesu akanaya, wangabana wahi?— Omwa Biblia. Yahandikawa nuku thusomeyo.

Ni kwenene, omughulhu Nyamuhanga akolesaya abandu erihandika, mubakolesya omubughe ow’omwa buthuku obo bakahandika. Busana n’ekyo, omwatsi mungyi kutsibu owali omwa Biblia mwahandikwa omwa Kihebrania, owundi omwa Aramaiki, n’owundi mwatsi mungyi omwa Kigiriki. Kundi abandu bangyi munabwire sibasi erisoma emibughe eyo, e Biblia yabirihindulhwa omwa yindi mibughe. Munabwire ebitsweka ebye Biblia byangana somwa omwa mibughe eyilhabire omu 2,260. Thalengekania okwa kindu ng’eki! E Biblia ni baruha erilhua oku Nyamuhanga busana n’abandu abosi. Aliriryo nomuyangabya iyabirilhusibwa mw’esyokopi nyingyi, omwatsi owalimu akalhua oku Nyamuhanga.

 Ebye Biblia yikabugha bikathughasira. Yahandikawa kera. Aliriryo yikathubwira okwa bindu ebine mubya munabwire. Kandi yikathubwira ebya Nyamuhanga akendi kolha omwa buthuku obuthe bwahali. Ebya yikabugha bikatsemesaya! Yikathuha amaha awuwenenga.

Kandi e Biblia yikathubwira ngoku Nyamuhanga akanza ithwakolesya engebe yethu. Yikathubwira ekihikire n’ekithahikire. Wutholere iwaminya eki, naghe kuthya. Yikathubwira okw’abandu abakolha ebithuwene n’ebyalhwiririramu, nuku thulik’ibana ebitsibu ebya babana. Kandi yikathubwira okw’abandu abakolha ebyuwene, n’ebibuya ebyalhwiririramu. Eyosi muyahandikwa busana n’erithughasira.

Aliriryo, ebiri omwa Biblia erithughasira ndeke, thutholere ithwaminya ekikasubiraya okwa kibulyo. Ekibulyo kya kino: Oyuwathuha e Biblia nindi? Wanga subirya wuthi ki?— Inga, e Biblia yosi yilhuire oku Nyamuhanga. Neryo ibbwa, thwanga kangania thuthi kwenene ngoku thuli b’amenge?— Omw’ihulikirira Nyamuhanga n’erikolha ebya akathubwira.

Busana n’ekyo, thutholere ithwabana obuthuku obw’erisomera e Biblia ya haghuma. Oyuthwanzire kutsibu amathuhandikira ebaruha, sithuli somayo murundi mughuma musa. Ni y’obughuli eya thuli. Ku thutholere ithwalhangira e Biblia ya thuthya kundi ni baruha eyikalhua okw’Oyo oyuthwanzire kutsibu. Ni baruha erilhua oku Nyamuhanga ow’olhwanzo.