KIKANA kutsemesaya omundu amakukolera ekindu kibuya?— Abandi bandu nabu bakatsema omundu akabakolera ekindu kibuya. Ithwe abosi thukatsema. Omukangirirya Mukulhu abya inianasi ekyo, kandi mughulhu mungyi iniakakolera abandi. Mwabugha athi: ‘Mungathasa erikolerwa, nikwa erikolha.’—Matayo 20:28.

Neryo thwamabya thwanzire eribya ng’Omukangirirya Mukulhu, thutholere ithwakolha ki?— Thutholere ithwakolera abandi. Thutholere ithwa bakolera ebibuya. Ni kwenene abandu bangyi sibali kolha eki. Erithwalira haghuma, abandu bangyi bakanza abandi ibabakolera. Muhanabya obuthuku abigha ba Yesu bamayowa bathya. Obuli mundu mwanza abye mukulhu kutse ow’ekitsumbi.

Kiro kighuma Yesu abya iniane omwa lhughendo n’abigha biwe. Babere bane omwa muyi owe Kapernaumu, hakuhi n’Engetse eye Galilaya, mubingira omwa nyumba. Bane eyo, Yesu mwababulya: “Mulyakuba buhaka ki omo nzira kwehi?” Mubabya bukuthu kundi omughulhu babya omwa nzira babya bakakuba obuhaka omukulhu nga nindi omw’ibo.—Mariko 9:33, 34.

 Yesu abya inianasi ngoku omw’abigha biwe simwabya mutholere mukabya n’omughuma oyukalengekanaya athi ya mukulhu. Neryo, ngoku thw’igha omwa sura y’erimbere ey’ekitabu kino, mwaletha omwana mulere omwakathi-kathi kabo n’eribabwira athi batholere ibayikehya ng’omwana omulere oyo. Nomwabine, mukithabeghesya ki. Neryo abere akisiya iniaholha, Yesu mwabakangirirya erisomo erya bathe bang’ibirirwa. Mwakolha ki?—

Babere bane mulya, Yesu mwalhua okwa meza n’erilhusya olhukimba lhwiwe olhw’eyihya. Mwimya ekisanguliryo, amayihangakyo omwa mbindi. Enyuma waho mwimya erithuba kutse ebbafu n’erihira mw’amaghetse. Abigha biwe bangabya imubayibulya ng’akayakolha kyahi. Banathungerere, Yesu mwathimba omw’abosi, amasunama, n’erinabya ebisandu byabu. Enyuma waho, amasangulha ebisandu byabu omwa kisanguliryo. Thalengekania okw’eki! Kandi ibbwa ku wabyaho? Wanga yowire wuthi?—

Abigha biwe mubayowa nga sikitholere Omukangirirya Mukulhu eribakolera omwa nzira eyi. Mubayowa ibabirihemuka. Erithwalira haghuma, Petero abya isyanzire Yesu akamukolera ekindu ekikakolhawa n’omundu owahisi eki. Aliriryo, Yesu mwabugha athi ni kikulhu iyo erikolhakyo.

Sithuli nabaya ebisathu by’abandi munabwire. Aliriryo eki kyabya kikakolhwa omwa buthuku Yesu abya okwa kihugho. Wunasi nga ni busana naki?— Omwa kihugho ekya Yesu n’abigha biwe babyamu, abandu babya bakambalha ebiryathu ebithaswika ebisandu. Neryo omughulhu babya bakalhaba omwa syonzira esiri mw’engungu, ebisandu byabu ibikusulha kw’etsutsu. Kyabya kindu ky’olhwanzo erinabya ebisandu by’omundu oyukakubungira eka wawu.

Aliriryo okwa ekiro ekyo sihabya n’omughuma w’okw’abigha ba Yesu oyukayihayo erinabya ebisandu by’abandi. Busana n’ekyo, Yesu mwakolha kyo iyuwene-wene. Omw’ikolha eki, Yesu mweghesya abigha biwe b’erisomo likulhu. Babya batholere ibigha erisomo eri. Kandi nethu n’isomo erya thutholere ithw’igha munabwire.

 Wunasi erisomo eri nga ni ryahi?— Yesu abere abirithasyayisubya kw’olhukimba lhwiwe olhw’eyihya n’erisuba ahalhue ikere, mwasoborera athi: ‘Mwanamaminya ekyo ngabibakolera kwehi? Mukanyahulha mw’Omukangirirya n’Omukama, mukabugha ndeke, kusangwa ingye kwa nyine nyithya. Ingye indi Mukama n’Omukangirirya, neryo namabiribanabya okwa bisandu byenyu. Nenyu mutholere imwanabania okwa bisandu byenyu.’—Yoane 13:2-14.

Omukangirirya Mukulhu akanganaya ngoku abya anzire abigha biwe ibakolerana. Syabya anzire bakayilengekaniako ibo basa. Syabya anzire bakalengekania bathi ibo ni bakulhu neryo abandi batholere ibabakolera. Abya anzire ibanza erikolera abandi.

Eryo si ryabya isomo libuya?— Wune mwendibya ng’Omukangirirya Mukulhu omw’ikolera abandi?— Ithwe abosi thwangana kolera abandi. Eki kikendi leka ibatsema. Aliriryo ekikulhu kutsibu, kikendi leka Yesu na Thatha wiwe ibatsema.

Sikikalire erikolera abandi. Wamathungerera ndeke, iwukendibana ihane bindu bingyi ebya wanga kolera abandi. Thalengekania okwa kino: Hane ekyosi-kyosi ekyanga wanga kolha eriwathikya mama wawu?  Wunasi ngoku akakukolera ebindu bingyi n’abandi abosi ab’omw’eka. Wangana muwathikya?— Busana naki iwuthamusaba eky’erikolha?

Obundi iwangana sangwa wathegheka ah’eririra ebyalya. Kutse wangana teghura ebindu mukaghunza erirya. Abandi baana bakaghenda okwa lhusi buli kiro. Ekyosi-kyosi ekya wanga kolha, wukendibya iwukakolera abandi, nga Yesu kw’akolha.

Wunawithe baghalha benyu n’abali benyu abakusubireko abawanga kolera? Wibuke ngoku Yesu, Omukangirirya Mukulhu, mwakolera abigha biwe nibya. Omw’ikolera abakusubireko, iwukendibya iwukagherereraya Yesu. Ni byahi ebya wanga bakolera?— Obundi iwangana beghesya ngoku banga yinabya bakalhua okw’isatha. Kutse wangana bambalya. Kutse wangana bawathikya erisesa engyingo yabu. Wangana lengekania  nga ni kindi kyahi ekya wanga bakolera?— Ibakendi kwanza busana n’eribakolera ebi, ngoku abigha ba Yesu bamwanza.

Okwa sukuru wangana kolera abandi bandu. Banganabya ib’abawukasoma nabu kutse omusomesya wawu. Omundu amathoya ebitabu biwe, iwukendibya iwamakangania olhukeri wamamusongeryabyo. Wangana yihayo erisangulha orubbahu kutse iwakolera omusomesya wawu y’ekindi kindu. Nibya n’eriwathikya omundu n’ekalamu ni kindu kibuya.

Okwa bundi buthuku, abandu bangana ghana erithusima busana n’ebya thukabakolera. Wukalengekanaya eki kinatholere ikyaleka ithutha kolha ebibuya?— Eyihi! Abandu bangyi mubathasima Yesu busana n’ebibuya ebya akolha. Aliriryo ekyo mukithaleka akaghana erikolha ebibuya.

Kwesi, isithwaleka erikolera abandi bandu. Thwibuke Omukangirirya Mukulhu, Yesu, n’erilengaho mughulhu wosi erikwama eky’erileberyako kiwe.