WUNASI akasolholho nga niki?— Akasolholho ly’erithendianza omundu kundi omubiri wiwe ni w’eyindi rangyi kutse eribya iniakabugha omubughe ow’embaghane. Busana n’ekyo, eribya n’akasolholho ly’eribya n’amalengekania awathuwene okwa mundu wuthe wa muminya nibya.

Wukalengekanaya nina kibuya eripona omundu isiwuli wa muminya ndeke kutse kundi ni w’embaghane okw’iwe?— Eyihi, akasolholho sikatholere, kandi ni thendi kangania olhukeri. Sithutholere thukathendi kangania omundu y’olhukeri kundi ni w’embaghane okw’ithwe.

Thalengekania okwa kino. Wunasi omundu wosi-wosi oyuwithe omubiri ow’eyindi rangyi kutse oyukakanaya omubughe owathe ng’owawu?— Nibya wanganabya iwunasi abandu abasosire muhanda kundi mubahuthalibwa kutse imubahambwa obulhwere bulebe. Wukana kanganaya abandu abali mbaghane okw’iwe b’olhukeri n’olhwanzo?—

Thwamahulikirira Omukangirirya Mukulhu, Yesu Kristo, ithukendi kangania obuli mundu wosi y’olhukeri. Omundu erilhua omwa kindi kihugho kutse eribya n’omubiri ow’eyindi rangyi, isibya leka thukamulhangira mw’ow’embaghane. Thutholere ithwa mukangania olhukeri. Nomwakine indi abandu abosi sibali kolha eki, n’isomo erya Yesu akangiriraya. Leka thulikanayeko.

Omuyuda oyuwabya awithe akasolholho mwasa eyiri Yesu n’erimubulya, ‘Ni kyahi ekyanga tholere ingakolha eribana engebe y’erikotha?’ Yesu mwaminya ngoku obundu omulhume akanza akwame kya bugha athi atholere iniakangania abandu ab’omwa kihanda kiwe kisa b’olhukeri. Neryo omwakanya k’erikwama kya subirya okwa kibulyo ekyo, Yesu mwabulya omulhume oyo: ‘Emighambo ya Nyamuhanga yikathubwira yithi thukole ki?’

 Omulhume mwasubirya athi: ‘Wutholere iwanza Yehova Nyamuhanga wawu n’omuthima wawu wosi, kandi wutholere iwanza mulikyenyu ngoku wuyanzire.’ Yesu mwabugha athi: ‘Wamasubirya ndeke. Wubye wukakolha wuthya, wasyabana engebe y’erikotha.’

Aliriryo, omulhume syabya anzire akakangania abandu abali mbaghane okw’iyo b’olhukeri n’olhwanzo. Neryo mwatsuka eriyihambulya. Mwabulya Yesu: ‘Mulikyethu nindi kwehi?’ Anganabya inianza Yesu abughe athi: “Balikyenyu kutse abaliranwa bawu b’abanywani bawu” kutse, “B’abandu abakusosire okwa mubiri.” Erisubirya, Yesu mwamubwira olhughano olhuhambire okwa Muyuda n’Omusamaria. Lhwabya lhukabugha lhuthya.

Habya omulhume oyuwandaghalha erilhua omwa muyi we Yerusalemu akaya e Yeriko. Omulhume oyu abya Muyuda. Abere ane mughenda, abanyeyi mubamuwirira. Mubamukinda ahisi n’erimunyegha kw’esyosente siwe n’esyongyimba siwe. Abanyeyi mubamuswirya erihika okw’isindi holha n’erimusigha okwa nzira.

Habere halhaba kathambi kake, omuhereri mwasira omwa nzira eyo. Mwalhangira omulhume oyuwabiri huthalibwa kutsibu. Wanga kolire  ki kuwabya in’iwe?— Omuhereri mwakwama kyalhaba mahengo-hengo. Nibya mwath’imana. Mwathayira ekya akakolha eriwathikya omulhume oyu.

Enyuma waho, owundi mulhume omunya dini kutsibu mwandaghalha omwa nzira eyo. Abya Mulawi oyuwabya akakolera omwa hekalu mwe Yerusalemu. Mwan’imana eriwathikya omulhume oyu?— Eyihi. Nayu mwakolha ekyo omuhereri akolha.

Erighunzerera, Omusamaria mwasa. Wanamamulhangira akasira omwa kona y’enzira mw’erya?— Mwalhangira Omuyuda iniana naghire, iniabirihuthalha kutsibu. Wunasi, Abasamaria bangyi n’Abayuda sibabya banzene nahake. (Yoane 4:9) Neryo Omusamaria oyu mwanakwama kya lhaba okwa mulhume isyatha muwathikya? Mwanalengekania athi: ‘Busana  naki inga wathikya Omuyuda oyu? Syanga nyiwathikya namahuthalha’?

Omusamaria mwathungerera omulhume iniana naghire okwa nzira, neryo mwamukwira obulighe. Mwathathoka erimusigha nuku anga holera aho. Neryo mwalhua okwa punda yiwe, amaseghera hakuhi n’omulhume, n’eritsuka erimubuya-buya. Mutha okwa bironda biwe kw’amaghutha n’ebinyu. Eki kyanga lekire ebironda ibya lhama. N’enyuma waho amaboha ebironda biwe.

Omusamaria mwasumbira lyolho-lyolho omulhume oyuhuthere y’okwa punda yiwe. Neryo mwamuthwalha lyolho-lyolho erimuhikya omwa huteri. Omusamaria mwamupangisirya ah’erimutheka, n’erimuthwanira ndeke.

Neryo Yesu mwabulya omulhume oyo abya akakania nayu athi: ‘Wukalengekanaya okw’abalhume basathu aba oyuwabya mulikyabu kutse muliranwa mubuya yuwahi?’ Mbwino abya iy’omuhereri, Omulawi, kutse Omusamaria?—

Omulhume mwasubirya athi: ‘Omulhume oyuw’imana n’eribuya-buya omulhume oyuwahuthalha yuwabya muliranwa mubuya.’ Yesu mwabugha athi: ‘Wuhikire. Wughende wukole wuthya.’—Luka 10:25-37.

Olhu ka lhwabya lhughano lhubuya? Lhukakanganaya  ndeke-ndeke omuliranwa nga ni wahi. Si b’abanywani bethu b’okwa ndungu basa. Kandi si b’abandu abawithe omubiri ow’erangyi ng’eyethu basa kutse abakabugha omubughe wethu. Yesu mwathukangirirya eribya b’olhukeri okw’abandu abosi, nomubangabya ibakalhua hayi, ibasosire bathi, kutse ibakabugha mubughe ki.

Nyamuhanga Yehova kwali athya. Syawithe akasolholho. Yesu mwabugha athi, ‘Thatha wenyu oyuli elhubulha akahulhukaya eryuba liwe okw’ababi n’okw’ababuya.’ Busana n’ekyo, thutholere ithwakangania abandu abosi b’olhukeri, nga Nyamuhanga.—Matayo 5:44-48.

Neryo wamalhangira abandu ibabirihuthalha, iwukendi kolha ki?— Kandi ibbwa omundu amabya iniakalhua omwa kindi kihugho kutse erangyi ey’omubiri wiwe isi yisosire eyawu? Akabya ini mulikyenyu kutse muliranwa, kandi wutholere iwamuwathikya. Wamayowa isiwanga thoka eriwathikya kundi wuli mulere, iwangana bwira omundu mukulhu wuthi awathikaye. Kutse iwangana bwira omupolisi kutse omusomesya w’esukuru. Erikolha ekyo, wukabya iwamakangania olhukeri, ng’omulhume Omusamaria.

Omukangirirya Mukulhu anzire ithwabya b’olhukeri. Anzire ithwa wathikya abandi, nomubangabya ini bahi. Ekyo ky’ekyaleka iniaha olhughano olhuhambire okwa Musamaria.