ITHWE abosi thwanzire ithwa tsema, kwa bithe?— Aliriryo abandu bangyi sibali n’obutseme. Wunasi nga ni busana naki?— Enzumwa yiri yithi sibali bathaminya embiitha ey’eribana obutseme. Bakalengekanaya bathi eribya n’ebindu bingyi ky’ekyanga balethera etseme. Aliriryo bakabya babiribana ebindu ebi, etseme yabu siyiri ghunza mughulhu muuli.

Embiitha ey’eribana etseme yeno. Omukangirirya Mukulhu mwabugha athi: ‘Erihithya likaletha obutseme kwilhaba erihebwa.’ (Emibiri 20:35) Busana n’ekyo, ni kyahi ekyanga leka ithwabya n’etseme?— Ly’erihithya n’erikolera abandi. Wunalhue wasi ekyo?—

Thuthalengekania okw’eki kwa buuli. Yesu mwanabugha athi omundu oyukahebawa ekihembo syangabya n’obutseme?— Eyihi, mwathabugha ekyo. Wukanza iwahebwa ebihembo, kwa bithe?— Obuli mundu akanza  ekyo. Thukatsema thukahebwa ebindu ebyuwene.

Aliriryo Yesu mwabugha athi erihithya likaletha obutseme bungyi. Neryo wukalengekanaya nindi oyuwabiriha abandu b’ebindu bingyi kwilhaba omundu wosi-wosi?— Ni Yehova Nyamuhanga.

E Biblia yikabugha yithi Nyamuhanga ‘akaha engebe n’omuka n’ebindu ebyosi okw’abandu abosi.’ Kandi akathuha embulha n’omwisi, nuku ebirimwa byanga lhasa neryo ithwabana ebyalya. (Emibiri 14:17; 17:25) Yehova ni Nyamuhanga oyutsemire! Erihererya abandi ni kighuma ky’okwa bindu ebikaleka Nyamuhanga iniatsema. Nethu thwamahithya, ithukendi tsema.

Neryo ibbwa, ni kyahi ekya thuwithe ekya thwangaha abandu? Wanga bugha wuthi ni kyahi?— Okwa bundi buthuku ekihembo kikaghulhawa. Kyamabya ini kihembo ekya wukalhusaya omwa duka, iwukendi kighulha. Neryo wamanza eriha omundu y’ekihembo ng’ekyo, ikyangana kuyithaghisya eribya iwune mubika esyosente erihika aha wukendi syabanira esyanga ghulha ekihembo.

Aliriryo si bugha indi ebihembo ebyosi bikaghulhawa. Ng’eky’erileberyako, ekiro omwisi akolire kutsibu, ekikopo eky’amaghetse awahuhirire kyangana humulikania omundu. Neryo wamaha ekihembo eki ky’omundu oyukwire enyotha, iwangana tsema busana n’erihithya.

Hanganabya ekiro iwe na mama wawu imwatsumba emiggati. Ekyo ikikendi kutsemesya. Aliriryo ni kyahi ekya wanga kolha nuku wuthasyabana etseme nene kwilhaba erirya emiggati eyosi iwuwene?— Iwanganaha kuyo kw’abanywani bawu ng’ekihembo. Wangana kolha eki?—

 Omukangirirya Mukulhu n’abakwenda biwe abosi babya ibanasi etseme eyikalhwiririra omw’ihithya. Wunasi ekya bahereraya abandi bandu?— Kyabya kindu ekisingireyo omwa kihugho kyosi! Babya basi ekwenene eyihambire oku Nyamuhanga, neryo mubatsema bakabwira abandi b’engulhu yuwene eyi. Mubakolha eki ahathe erisaba omundu y’esyosente.

Kiro kighuma omukwenda Paulo na munywani wiwe mubuya ya Luka mubeya omukali oyuwabya anzire eribana etseme ey’erihithya. Mubamweya okwa lhusi. Paulo na Luka baghendayo kundi mubowa ngoku abya mwanya w’erisabiramu. Kandi kwenene, babere bahikayo, mubeya y’abakali ibane musaba.

Paulo mwatsuka eribwira abakali aba b’engulhu yuwene eyihambire oku Nyamuhanga Yehova n’Obwami bwiwe. Omughuma w’okw’ibo abya ini Ludia, kandi mwahulikirira ndeke. Enyuma waho, Ludia mwanza erikolha ekindu kirebe erikangania kwenene ngoku mwanza engulhu yuwene eya owa. Neryo mwabwira Paulo na Luka athi: ‘Mwamaghanirya muthi nabirikirirya Yehova, mwase omwa nyumba yaghe mwikale.’ Kandi mwabahathikana eryasa ewiwe.—Emibiri 16:13-15.

Ludia mwatsema eribya n’abaghombe ba Nyamuhanga aba eka wiwe. Mwabanza kundi mubamuwathikya erigha oku Yehova na Yesu kandi ngoku abandu banga banire engebe y’erikotha. Mukya mutsemesya erithoka erihererya Paulo na Luka b’ebyalya n’omwanya ow’erilhuhukiramu. Busana n’ekyo, Ludia erihithya mukyaleka iniatsema kundi mwaha iniananzire. Ekyo ni kindu ekya thutholere ithw’ibuka. Omundu angana thubwira athi thukathekawa eriha ekihembo. Aliriryo thwamabya isithwanzire eriha omundu y’ekihembo, erimuhakyo isiryendi leka thukatsema.

Ng’eky’erileberyako, wanga kolha ki wamabya iwuwithe epipi eya wukanza erirya? Namakubwira indi wukathekawa eritahuririra owundi mwana, iwune mwendi tsema wukamuhererya?— Kandi ibbwa wamasangana munywani wawu ow’okwa ndungu iwuna withe esyopipi?  Wamathwamu ahabwawu erimuha kusyo, ekyo ikine mwendi leka iwatsema?—

Okwa bundi buthuku, erianza omundu ya kutsibu kikanaleka ithwanza erimuha ekyosi-kyosi ekya thuwithe. Thune mwongera erianza Nyamuhanga, kwa thutholere ithwa yowa thuthya embere Siwe.

Omukangirirya Mukulhu mwaminya omukali omwera oyuwayowa athya. Mwamulhangira omwa hekalu mwe Yerusalemu. Omukali oyo abya awithe esyosenge kutse ebinusu bibiri; esyo syabya awithe nyisa. Aliriryo mwasihira omw’akasanduko ng’ebihembo ebye hekalu. Sihali oyuwamukaka athi akole ekyo. Nibya abandu bangyi sibabya basi eky’omukali oyo akolire. Akolha ekyo kundi abya anzire erikikolha n’erianza Yehova ya kutsibu. Erihithya mulyaleka iniatsema.—Luka 21:1-4.

Hali nzira nyingyi esya thwanga hithiryamu. Wangana hulha esyonzira nge sy’okw’isyo?— Thwamahithya ithunanzire, ithukendi tsema. Kya kikaleka Omukangirirya Mukulhu iniathubwira athi: ‘Muhithaye.’ (Luka 6:38) Thwamakolha ekyo, ithukendi leka abandi ibatsema. Nethu ithukendi tsema kutsibu!