OKWA bundi buthuku Yehova akakolha ebindu eby’eriswekya eritheya abalere n’abathe banga thoka eriyitheya. Wamayibungya-bungya, wangana lhangira Yehova kw’akakolha eki. Aliriryo erimbere wangana ghana eriyitheghererya ekikakoleka.

Wangana lhangira ekinyonyi kikikira ahisi hakuhi nawu. Kikabya nga kihuthere. Kikathoghoya ekipupa kyakyu kighuma neryo ikyatsuka erighenda wukanza eriseghera hakuhi nakyu. Wukabya wukakwama ekinyonyi, ikyabya ikine mulholha embere. Wune aho iwalhangira kikaghulhuka. Ekipupa kyakyu sikilhue kihuthere nahake! Wunasi ekiryaleka ekinyonyi ikyakolha ekyo?—

Hakuhi naho ekinyonyi kirikira, halhue ihane ebyana byakyu. Ekinyonyi ekyo mukikubaha kithi wangana bana ebyana byakyo neryo iwabitha. Neryo mukikayikolha nga kihuthere. Wunasi nga nindi oyuwanga thutheya ng’ekinyonyi ekyo kwa kikatheghaya ebyana byakyo?— Omwa Biblia, Yehova akakanibawako ng’ekinyonyi ekyasibwe ng’erisamba, ekikawathikaya ebyana byakyo.—Eryibuka Ebihano 32:11, 12.

Omwana oyo Yehova anzire kutsibu ni Mughalha wiwe mwanzwa, Yesu. Nga Thatha wiwe, Yesu abya  mundu ow’ekirimu n’oyuwithe akaghalha iniane elhubulha. Iniakayilabirira. Aliriryo, Yesu abere abibuthwa okwa kihugho ng’olhumekeke, abya isyanga yilabirira. Mwayithagha obuwathikya.

Erithoka eriberererya erisonda lya Nyamuhanga okwa kihugho, Yesu abya atholere iniakulha, eribya mulhume mukulhu oyuhikene. Aliriryo, Sitani mwalengaho er’itha Yesu eki kithe kyabya. Omwatsi ow’erianza er’itha Yesu iniakine mwana n’esyonzira esya Yehova akolesaya erimutheya, akasisimulha. Wunanzire eriowa omwatsi oyo?—

Hakabya hathe halhaba buthuku buuli Yesu abuthirwe, Sitani akaleka ekindu ekiri ng’engununu ikya kangabasania omwa kyanya omwa kitsweka eky’Ebulhua Lyuba. Abalhume abakasoma esyongununu, bakaghenda olhughendo erihika e Yerusalemu bakakwama engununu eyo. Bakabya bahika eyo, bakabulhaya oyukendibya mwami w’Abayuda nga kendi buthirwa hayi. Bakabya bakabulya abalhume abasi ebye Biblia yikabugha bakasubiraya bathi: ‘E Betelehemu.’—Matayo 2:1-6.

 Herode, omwami mubi omwa Yerusalemu, akabya akowa ngoku omwami muhya-muhya abiributhirwa e Betelehemu omuyi owali hakuhi, akabwira abalhume abakasoma esyongununu athi: ‘Mukwese ndeke n’eribana omwana oyo, neryo musyasubulha n’erinyibwira.’ Wunasi ekikaleka Herode inianza eriminya ah’angabana Yesu?— Kundi Herode akwire erihali kandi akanza erimwitha!

Nyamuhanga akatheghaya Mughalha wiwe yathi?— Abalhume abakasoma esyongununu bakabya bakabana Yesu, bakamuha ebihembo. Enyuma waho, Nyamuhanga akakunga abalhume abo erilhabira omwa kilhotho athi sibasube eyiri Herode. Neryo bakasuba ewabu omw’ikolesya eyindi nzira ahathe erisuba e Yerusalemu. Herode akabya abiriminya ngoku abakasoma esyongununu abo babirisuba ewabu, akahithana kutsibu. Akanza er’itha Yesu, Herode akalhaghira athi abaana bosi ab’obulhume abali ahisi sy’emyaka ibiri bithawe! Aliriryo okwa buthuku obu, Yesu syakiriyo.

Wunasi ngoku Yesu akatswa?— Abakasoma esyongununu bakabya babirighenda, Yehova akabwira mwira wa Maria ya Yozefu athi bathibithe hali, e Misiri. Yesu aneyo akatheghibawa oku Herode omubi. Hakabya hahwa myaka mirebe, Maria na Yozefu bakalhua e Misiri ibane na Yesu, Nyamuhanga akathasyabwira Yozefu y’ekindi kindu. Akamubwira omwa kilhotho athi baghende e Nazareti, eyo Yesu akendi theghibirwa.—Matayo 2:7-23.

Wanamalhangira ngoku Yehova atheghaya Mughalha wiwe?— Wukalengekanaya nindi oyuli ng’ebyana by’ekinyonyi ebibisire kutse oyuli nga Yesu omughulhu abya iniakine mulere? Mbwino si wuli ng’ibyo kutse nga Yesu?— Hane abandu abanzire erikuhuthalya. Wunasi nga ni bahi?—

 E Biblia yikabugha yithi Sitani ali ng’endale eyikaruruma eyikanza erithulya. Kandi ngoku endale mughulhu mungyi yikanza erighendera ehisoro ehike-hike, mughulhu mungyi Sitani n’esyombinga siwe sikaghendera abalere. (1 Petero 5:8) Aliwe Yehova awithe akaghalha akalengire aka Sitani. Yehova angana theya abaana biwe kutse erighunza h’ebindu ebibi ebya Sitani akabakolera.

Wun’ibukire ekya thw’igha omwa Sura 10 ey’ekitabu kino ekya Diabolo n’esyombinga siwe bakanza thukole?— Ee, bakanza thukole emyatsi ey’engyingo eya Nyamuhanga akabugha athi siyitholere. Aliriryo ni bahi abatholere erikolha emyatsi y’engyingo?— Y’omulhume n’omukali ababiriherukania.

Aliriryo eky’obulighe, abandi bandu abakulire bakanza erikolha emyatsi y’engyingo n’abaana balere. Bamakolha ebi, abalhwana n’abasika bakatsuka erikolha ebindu bibi ebya bakighira okw’abandu abakulire aba. Nabu bakatsuka erikolesya nabi ebitsweka byabu eby’olhubutho. Ekyo ky’ekyakolhawa omwa buthuku bwa kera omwa muyi we Sodomo. E Biblia yikabugha yithi abandu abo, ‘abalhwana n’abandu bakulhu,’ mubanza erikolha emyatsi y’engyingo n’abalhume abasyalebaya Loti.—Enzuko 19:4, 5.

Ngoku Yesu ayithagha eritheghibwa, kuthya, nawu wutholere iwatheghibwa okw’abandu bakulhu—nibya n’okw’abandi baana—abanganza erikolha emyatsi y’engyingo nawu. Kutsibu-tsibu, abandu aba bakendi yithwalha nga ni banywani bawu. Nibya bangananza erikuha ekindu nuku siwubwire abandi okwa ebya bakanza erikukolhako. Aliriryo abandu aba bayitsomene nga Sitani n’esyombinga siwe, kandi banzire eriyitsemesya ibobene. Kandi bakanza babane etseme eyi omw’ikolha emyatsi y’engyingo n’abaana. Eki ni kibi kutsibu!

Wunasi ekya banga kolha erianza eriyitsemesya?— Bangana hamba-hamba ebitsuku byawu eby’olhubutho. Kutse ibamathirya ebitsuku byabu eby’olhubutho by’okwa byawu. Aliriryo isiwalighira omundu wosi-wosi akasatha-satha omwa bitsuku byawu eby’olhubutho. Nomwangabya  ini mughalha wenyu kutse mwali wenyu kutse mama wawu kutse thatha wawu. Ebitsuku eby’okwa mubiri wawu ebi ni by’embiitha.

Wanga theya wuthi omubiri wawu okw’abandu abakakolha ebindu bibi ebi?— Eky’erimbere, isiwalighira omundu n’omughuma akasatha-satha omwa bitsuku byawu eby’olhubuthu. Omundu amanza erikolha eki, bugha omwa mulenge muuli wuthi: “Nyireke! Nga yathulhagho!” Kandi omundu oyo amabugha athi niwe wulya leka iniakikolha, isiwaligha ekyo. Ekyo si kwenene. Kwama kya ghenda n’eriyathulhagho nomwangabya inindi! Wutholere iwakolha ekyo, nomwanga bugha athi ekya mukakolha ni mbiitha yenyu babiri. Omundu oyo nomwanga kulhagha erikuha ebindu ebyuwene kutse erikubahisya, wutholere iwalhua ahali n’eriyathulhagho.

Siwutholere wukubaha, aliriryo wutholere iwayitheya. Ababuthi bawu bamakubwira bathi isiwasatha n’abandu balebe kutse erighenda omwa bitsweka birebe ebyangaleka iwawa omw’akabi, wutholere iwabowa. Wamakolha eki, omundu mubi isyanga bana akaghisa ak’erikuhalyako.