OMWA syosura ibiri esy’enyuma, ni bandu bangahi abathwasomako abalhubukibawa?— Babya bathanu. Abaana babya bangahi?— Basathu. Kandi owakani abya mulhwana. Wukalengekanaya eki kikakanganaya ki?—

Kikanganaya ngoku Nyamuhanga anzire abalere. Aliriryo akendi syalhubukya n’abandi bandu bangyi. Mbwino Nyamuhanga akendi syalhubukya abakolha ebibuya basa?— Ithwangana kithwalha thuthya. Aliriryo abandu bangyi mubath’igha ekwenene eyihambire oku Yehova Nyamuhanga na Mughalha wiwe. Busana n’ekyo, mubakolha ebibi kundi mubakangiriribwa ebindu ebithuwene. Wukalengekanaya Yehova anemwendi syalhubukya abandu ng’aba?—

E Biblia yikabugha yithi: ‘Hasyabya erilhubuka ly’abathunganene n’ababi.’ (Emibiri 24:15) Busana naki ababi, kutse abakolha ebithathunganene, bakendi syalhubukibwa?— Kundi mubathathunga akaghisa  ak’erigha oku Yehova n’ebya akanza abandu bakole.

Wukalengekanaya abandu bakendi syalhubukibwa mughulhu wahi?— Wibuke omughulhu Lazaro aholha neryo Yesu amalhaghanisya mwali wabu, Marata athi: ‘Mughalha wenyu akendi lhubuka.’ Marata mwasubirya athi: ‘Nyinasi kwa syalhubuka okw’ilhubuka ery’ekiro ky’enyuma-nyuma.’ (Yoane 11:23, 24) Marata amanyisaya ki akabugha athi Lazaro akendi syalhubuka okwa ‘kiro ky’enyuma-nyuma’?—

Erithwalira haghuma, Marata abya iniabiriowa omulhaghe wa Yesu ono: ‘Abosi abali omw’amasinda wabu basyalhua mugho.’ (Yoane 5:28, 29) Kwesi, “ekiro ky’enyuma-nyuma” w’omughulhu Nyamuhanga akendi syalhubukya abosi abo ibukire. Ekiro ky’enyuma-nyuma eki si kiro eky’esyosaha 24. Bukendi syabya buthuku obw’emyaka rukumi. Okwa kiro eki, e Biblia yikabugha yithi, ‘Nyamuhanga asyatswera abandu b’ekihugho.’ Abakendi syatswera mwamuli abakendi syabya ibabirilhubukibwa.—Emibiri 17:31; 2 Petero 3:8.

Thalengekania okwa butseme obukendi syabya okwa kiro eki! Omwa buthuku obw’ekiro eky’emyaka rukumi eki, esyomiliyoni nyingyi esy’abandu ababiriholha bakendi syalhubukibwa. Yesu akahulha omwanya owabakendi sy’ikalhamu bakalhubuka mwa Paradiso. Thulebaye aha Paradiso yikendi syabya n’emibere eyikendi syabyamu.

Ihakisiya saha ng’isathu Yesu iniaholera okwa muthi w’eriaghalya, Yesu akabwira omulhume oyuhanikirwe okwa muthi hakuhi nayu okwa Paradiso. Omulhume oyo ak’ithibawa busana n’ebindu bibi ebya akolire. Aliriryo omukolha-nabi oyu akabya akathungerera  Yesu n’eriowa ebya abandu bakamukanayako, akatsuka erikirirya Yesu. Neryo omukolha-nabi oyo akabugha athi: “Wunyibuke wukingira omw’Obwami bwawu.” Yesu akasubiraya athi: “Kwenene ngakubwira munabwire, Wukendi syabya naghe omwa Paradiso.”—Luka 23:42, 43, NW.

Yesu akamanyisaya ki akabugha eki? E Paradiso yiri hayi?— Thakilengekaniako. Erimbere e Paradiso yabya hayi?— Wibuke ngoku Nyamuhanga mwaha omulhume w’erimbere, Adamu, na mukali wiwe be paradiso ey’er’ikalhamu hano okwa kihugho. Yabya yikahulhwa mw’eririma lye Edeni. Omw’irima eryo mwabya ebisoro, aliriryo isibiri huthalhaya omundu wosi-wosi. Kandi mwabya emithi mingyi n’ebighuma ebisihire kutsibu, n’olhusi lhunene. Abya mwanya owuwene kutsibu ow’er’ikalhamu!—Enzuko 2:8-10.

Neryo omughulhu thukasoma okwa mukolha-nabi oyu eribya omwa Paradiso, thutholere ithwa thera akasasani ngoku ekihugho kino kikendi syahindulhwa eribya bwikalho obuwenenga. Mbwino Yesu anemwendi syabya okwa kihugho n’omukolha-nabi oyo omwa Paradiso?— Eyihi. Wunasi ekikendi syaleka iniathabya okwa kihugho kwa hano?—

Kundi Yesu akendi syabya elhubulha akathabalha ng’Omwami okwa kihugho Paradiso. Neryo Yesu eribya iniakendi syabya n’omulhume oyo kikamanyisaya kithi akendi syamulhubukya n’erimuha ebya akayithagha. Aliriryo ni kyahi ekikendi syaleka Yesu inialighira oyuwabya mukolha-nabi eribya omwa Paradiso?— Thulebaye nga thwangana bana eky’erisubirya.

 Omukolha-nabi abere athe akania na Yesu, anabya asi ebighendererwa bya Nyamuhanga?— Eyihi, syabya asi. Mwakolha ebithuwene kundi syabya asi ekwenene eyihambire oku Nyamuhanga. Omwa Paradiso akendi syakangiriribwa ebighendererwa bya Nyamuhanga. Enyuma waho iniahebwa akaghisa ak’erikangania kwenene ngananzire Nyamuhanga omw’ikolha erisonda Liwe.

Mbwino obuli mundu wosi oyukalhubukibawa akendi sy’ikalha okwa kihugho Paradiso?— Eyihi. Wunasi nga ni busana naki?— Kundi abandi bakendi syalhubukibwa eribya haghuma na Yesu elhubulha. Bakendi syathabalha haghuma nayu ng’abami okwa kihugho Paradiso. Thulebaye nga thukaminya eki kya thuthi.

Omw’ithumbi Yesu athe aholha, mwabwira abakwenda biwe athi: ‘Omwa nyumba ya Thatha muli byumba bingyi eby’er’ikalhamu, nga yakokothaya aha wenyu.’ Neryo mwabalhaghanisya athi: ‘Nasyasa n’eribathwalha ewaghe; neryo imwathoka eribya aho nyiri.’—Yoane 14:2, 3.

 Yesu abere abirilhubuka mwaya hayi?— Mwasuba eyiri Thatha wiwe elhubulha. (Yoane 17:4, 5) Ni bugha mbu, Yesu alhaghanisaya abakwenda n’abigha biwe athi akendi syabalhubukya nuku bangabya nayu elhubulha. Bakendi syayakolhayo ki ibane na Yesu?— E Biblia yikabugha yithi abigha biwe abakasangira ‘omw’ilhubuka ly’erimbere’ bakendi sy’ikalha elhubulha n’erithabalha okwa kihugho ng’abami ‘haghuma nayu emyaka rukumi.’—Eribisulirwa 5:10; 20:6; 2 Timoteo 2:12.

Ni bangahi abakendi syasangira ‘omw’ilhubuka ly’erimbere’ n’erithabalha haghuma Yesu ng’abami?— Yesu mwabwira abigha biwe athi: ‘Ekihyo kike, simubahe kusangwa kikatsemesaya Thatha wenyu yo ndeke, eribaha obwami.’ (Luka 12:32) Omughanzo ‘ow’ekihyo kike’ eki, ekikalhubukibawa eribya haghuma na Yesu omw’Obwami bw’elhubulha, abiribohwa. E Biblia yikakanganaya yithi ‘emithwalho ikumi n’ini n’esyonkumi ini’ b’abakalhubukibawa erighenda elhubulha.—Eribisulirwa 14:1, 3.

Ni bangahi abakendi sy’ikalha okwa kihugho Paradiso?— E Biblia siyiri kanganaya nga ni bangahi. Aliriryo Nyamuhanga abya iniabiribwira Adamu na Eva ibakine omw’irima lye Edeni athi babuthi abaana n’erisulya ekihugho. Erithwalira haghuma, mubalemwa erikolha ekyo. Aliriryo Nyamuhanga akendi syalhangira athi ekighendererwa kiwe eky’erisulya ekihugho mw’abandu ababuya kikaberereribawa.—Enzuko 1:28; Isaya 45:18; 55:11.

Thalengekania nga bukendi syabya butseme bungahi eribya omwa Paradiso! Ekihugho ekyosi kikendi syabya ng’eririma eryuwene. Mukendi syabya ebinyonyi n’ebisoro n’emithi eyuwene n’ebimole muthina-muthina. Sihali oyukendi syowa obulhumi busana n’erilhwalha. Abandu abosi bakendi syanzana. Thwamabya ithwanzire erisyabya kera na kera omwa Paradiso, buno bw’obuthuku obw’eriyitheghekera yo.