NGOKU wanganabya iwunasi, munabwire abandu bakakekelhuha, ibalhwalha, n’eriholha. Nibya n’abaana bakaholha. Wunatholere iwubaha olhuholho kutse omundu oyuwabiriholha?— Wunasi ekikabya thwamaholha?—

Sihali omundu oyuliho munabwire oyuwabiriholha neryo akalhubuka n’erithubwira ekikabya. Aliriryo omughulhu Yesu, Omukangirirya Mukulhu abya okwa kihugho, hanabya omundu oyuli ng’oyo. Erisoma omwatsi owamuhambireko lyangana thuwathikya eriminya ekikabya. Omundu oyo abya munywani wa Yesu kandi abya ikere e Betania, omuyi muke owabya hakuhi ne Yerusalemu. Abya akahulhwa mwa Lazaro, kandi abya awithe bali babu babiri, Marata na Maria. Thulebaye ekye Biblia yikabugha yithi mukyabya.

Kiro kighuma, Lazaro akalhwalha kutsibu. Okwa ndambi eyo, Yesu ali hali. Neryo Marata na Maria bakathuma omundu eriyabwira Yesu ngoku mughalha wabu, Lazaro alhwere. Bakakolha eki kundi bakyasi ngoku Yesu anganasa n’erilhamya mughalha wabu. Yesu si muthambiri, aliriryo awithe amaaka erilhua oku Nyamuhanga aw’erilhamya obuli mulingo wosi ow’obulhwere.—Matayo 15:30, 31.

Aliriryo, Yesu akabya athe ayalebya Lazaro, Lazaro akathoha n’eriholha. Aliwe Yesu akabwira abigha biwe athi Lazaro abirighotsera kandi athi akendi ghenda eriyamubukya. Abigha sibali yitheghereraya ekya Yesu akamanyisaya. Neryo Yesu akabasoborera athi:  ‘Lazaro abiriholha.’ Eki kikakanganaya ki erikwamana n’olhuholho?— Olhuholho lhuli ng’erihwera omwa thulho. Ni thulho thunene indi omundu syanga lhotha nibya.

Neryo Yesu akasa erisyalebya Marata na Maria. Abanywani bangyi ab’eka eyi babirihika. Balyasyabawako kundi mughalha wabu abiriholha. Marata akabya akowa ngoku Yesu ane mwasa, akaghenda eyali eriyamubandana. Enyuma waho Maria nayu akahulhuka eriyalebya Yesu. Maria ali n’obulighe bunene kandi ane mulira, neryo akawa okwa bisandu biwe. Abandi banywani abakakwama Maria nabu bane mulira.

Omukangirirya Mukulhu akabulhaya nga ni hayi aha batsikire Lazaro. Neryo, abandu bakathwalha Yesu ahali omwangalhu owa Lazaro atsikiremu. Yesu akabya alhangira abosi ibane mulira, nayu akatsuka erilira. Anasi ngoku kikitha obulighe bunene eriholerwa.

Eribwe linaswikire olhukyo lhw’omwangalhu, neryo Yesu akabugha athi: ‘Mulhusayeho eribwe.’ Banalilhusayeho?— Marata akalengekanaya athi sikitholere. Akabugha athi: ‘Mukama, okwa ndambi eno amabirikumba. Hamathakya biro bbini aholire.’

Aliriryo Yesu akamubwira athi: ‘Mundakubwira nyithi wamikirirya wasyalholha okwa lhukengerwa lhwa Nyamuhanga kwehi?’ Yesu akamanyisaya athi Marata akendi lhangira ekindu ekikendiha Nyamuhanga y’olhukengerwa. Ni kyahi ekya Yesu akayakolha? Bakabya balhusya h’eribwe, Yesu akasaba Yehova omwa mulenge owakowika. Neryo Yesu akabugha omwa mulenge munene athi: ‘Lazaro, hulhuka!’ Angana hulhukire? Mwanahulhuka?—

Mbwino wangana bukya omundu oyughotsere?— Ee, wamamubirikira omwa mulenge munene, iniakendi buka. Aliriryo wangana bukya omundu oyuholire?— Eyihi. Nomuwanga birikira kutsibu, oyuholire syang’owa. Sihali ekindu ekyo omundu wosi-wosi  ow’okwa kihugho angakolha eribukya oyuholire.

Aliriryo Yesu ni w’embaghane. Awithe amaaka w’embaghane erilhua oku Nyamuhanga. Neryo Yesu akabya akabirikira Lazaro, ekindu ekikathikaya kikabya. Omundu oyuwabirighunza biro bbini inianaholire akalhua omw’omwangalhu! Akathasyabya n’engebe kandi! Akahumulha n’erilyatha n’erikania kandi! Inga, Yesu amalhubukya Lazaro.—Yoane 11:1-44.

Lino kilengekanayeko: Ni kyahi ekya hika oku Lazaro akaholha? Mwanalhua mw’ekirimu kutse akalimu eriyabya ikaneho bulebe? Ekirimu kiwe mukyana ghenda elhubulha? Anabya iniane na Nyamuhanga n’abamalaika ababuyirire ahabw’ebiro bbini inianeho?—

Eyihi. Wibuke ngoku Yesu mwabugha athi Lazaro aghotsere. Wukabya omwa mibere ki wamaghotsera? Wamabya iwuli omwa  thulho thunene, siwuli minya ebikabya, kwa bithe?— Kandi wukabya wukabuka, siwuli minya nga wamaghunza saha singahi iwunaghotsere wuthe thalebya okwa saha.

Kwa bine bithya n’okw’abandu abaholire. Sibawithe ekya basi. Sibali kolha ekindu kyosi-kyosi. Lazaro kwabya athya omughulhu aholha. Olhuholho lhuli ng’othulho thunene othukaleka omundu iniath’ibuka ekindu kyosi-kyosi. E Biblia yikabugha yithi: “Abaholi sibasiki.”—Omugambuli 9:5, 10.

Thalengekania n’okwa kino: Lazaro kwabya elhubulha ahabw’ebiro bbini ebyo, syanga kanirye okwa by’abanayo?— Kandi kwabya elhubulha, Yesu angana mulhusirye omw’omwanya owuwene oyo neryo iniamusubya okwa kihugho?— Eyihi nahake!

Nomwabine bithya, abandu bangyi bakabugha bathi thuli mw’akandu akatheholha akakathulhuamu thukaholha. Bakabugha bathi Lazaro abya inianeho omw’omwanya mulebe. Aliriryo e Biblia kwa yithabugha yithya. Yikabugha yithi Nyamuhanga mwahangika omundu w’erimbere eribya ‘omundu oyuliho.’ E Biblia kandi yikabugha yithi Adamu abere abirikolha ekibi, mwaholha. Abere abiriholha, mwathayira ekya akathasyaminya. Mwasuba  omwa lhuthuthu olhwa akolhawamu. Kandi e Biblia yikabugha yithi abaana ba Adamu abosi nabu mubasighalya ekibi n’olhuholho.—Enzuko 2:7; 3:17-19; Abanya Roma 5:12.

Abandi bandu bakasagha abaholi. Sibanga hika hakuhi n’eyisinda kundi bakalengekanaya bathi abaholi bawithe emirimu eyikalhua omwa mibiri yabu eyanga huthalya abaliho. Aliriryo omundu oyuholire angana ghalya omundu oyuliho?— Eyihi na hake.

Nibya abandi bandu bikirirye bathi abaholi bangana subulha ng’emirimu eribungira abaliho. Busana n’ekyo bakabikira abaholi b’ebyalya. Aliriryo abandu abakakolha ekyo sibali ikiriraya ebya Nyamuhanga akabugha ebihambire okw’abaholi. Thwam’ikirirya ebya Nyamuhanga akabugha, isithwendi sagha abaholire. Kandi thwamabya kwenene ithukasima Nyamuhanga busana n’engebe eya thuwithe, ithukendi kikangania omw’ikolha ebya Nyamuhanga akasima.

Aliriryo wangana yibulya: ‘Nyamuhanga anemwendi syasubya abaana ababiriholha? Ananzire erikolha ekyo? Thukendi syakania okw’ekyo omwa sura eyikakwamako.