MUGHULHU mungyi wukabya wukanza eriminya omundu, ni kyahi ekya wukatsuka erimubulya?— Wukamubulhaya erina liwe. Ithwe abosi thuwithe amena. Nyamuhanga mwaha omundu w’erimbere okwa kihugho y’erina. Mwamulhuka mwa Adamu. Mukali wa Adamu mwalhukwa mwa Eva.

Aliriryo, si b’abandu basa abawithe amena. Thalengekania n’okwa bindi bindu ebiwithe amena. Omughulhu omundu akaghulha embwa akaha y’erina, kwa bithe?— Ni kwenene, eribya n’erina ni kikulhu kutsibu.

Thathungerera esyongununu sy’olhuhunda-hunda omwa kiro. Wukalengekanaya sinawithe amena?— Ee, Nyamuhanga mwaha obuli ngununu eyiri okwa lhubulha y’erina. E Biblia yikathubwira yithi: ‘Akaghanza omughanzo w’esyongununu, akabirikirasyo omw’amena wasyo.’—Esyonyimbo 147:4.

Wanga bugha wuthi nindi oyulengethukireyo omwa buhangwa bwosi?— Ni Nyamuhanga. Wukalengekanaya anawithe erina?— Yesu mwabugha athi anawitheryo. Kiro kighuma Yesu mwasaba Nyamuhanga athi: ‘Nabiriminyisya erina lyawu okw’abigha baghe.’ (Yoane 17:26, NW) Wunasi erina lya Nyamuhanga?— Nyamuhanga iyuwene-wene akathubwira nga ni ryahi. Akabugha athi: “Ingye indi Yehova. Eryo ly’erina lyaghe.” Kwesi erina lya Nyamuhanga ni YEHOVA.—Isaya 42:8, NW.

Wukayowa wuthi abandi bamathendi birirwa erina lyawu?— Wukatsema, kwa bithe?— Yehova nayu anzire abandu ibaminya erina liwe. Busana n’ekyo, thutholere ithwa kolesya erina Yehova thukakania oku Nyamuhanga. Omukangirirya Mukulhu mwakolesya erina lya Nyamuhanga, Yehova, akakania n’abandu. Kiro kighuma Yesu mwabugha athi: “Wutholere iwanza Yehova Nyamuhanga wawu n’omuthima wawu wosi.”—Mariko 12:30, NW.

 Yesu abya inianasi ngoku erina “Yehova” ni ry’omughaso munene. Busana n’ekyo mwabwira abigha biwe athi bakolesaye erina lya Nyamuhanga. Nibya mwabakangirirya athi bakolesaye erina lya Nyamuhanga omwa misabe yabu. Yesu abya inianasi ngoku Nyamuhanga anzire abandu abosi ibaminya erina Liwe, Yehova.

Kera-kera, Nyamuhanga mwakangania Musa, oyuwabya mughuma w’okw’abaana be Israeli y’omughaso w’erina liwe. Abaana be Israeli, ababya bakahulhwa mw’Abaisraeli, babya bikere omwa kihugho ekikahulhawa mwa Misiri. Abandu ab’omwa kihugho ekyo babya bakahulhwa mw’Abanya Misiri. Mubakolha Abaisraeli mw’abakobe n’eribakolha nabi. Musa abere abirikulha, mwalengesya eriwathikya omughuma w’okw’abandu biwe. Eki mukyaleka Farao, omwami we Misiri iniahithana. Mwanza er’itha Musa! Neryo Musa mwathibitha erilhua e Misiri.

Musa mwaghenda omwa kindi kihugho. Kyabya kihugho ekye Midiani. Musa abere  an’eyo, mwathahya neryo amabya n’amaka. Kandi mwakolha ng’omulisya ow’esyombuli. Kiro kighuma Musa abya iniane mulisya esyombuli siwe hakuhi n’ekithwe omughulhu alhangira ekindu ekikakukubalhaya. Ekisaka kyabya kikaka kw’omuliro, aliriryo isikirihya! Musa mwaseghera hakuhi erianza erikilhangira ndeke.

Wunasi ekyabya kyabereho?— Musa mwowa omulenge akabirikira erilhua omwakathi-kathi k’ekisaka ekikaka kw’omuliro ekyo. Omulenge mwabirikira athi, “Musa, Musa.” Oyuwamubirikira nindi?— Ni Nyamuhanga! Nyamuhanga abya awithe omubiiri mungyi owabya anzire Musa iniakolha. Nyamuhanga mwabugha athi: ‘Asa nga kuthume ewa Farao, omwami owe Misiri, erilhusya abandu baghe, abaana ba Israeli erilhua e Misiri.’ Nyamuhanga mwalhaghanisya eriwathikya Musa.

Aliriryo Musa mwabwira Nyamuhanga athi: ‘Omughulhu nasyahika eyiri abaana ba Israeli e Misiri n’eribabwira nyithi Nyamuhanga amanyithuma, ibbwa bamanyibulya bathi, “erina liwe yondi?” Nasyabwirabo ki kwehi?’ Nyamuhanga mwabwira Musa athi abwire abaana ba Israeli athi: ‘[Yehova, NW] amanyithuma okw’inywe. Yehova ly’erina lyaghe erihika  kera na kera.’ (Eriluayo 3:1-15) Eki kikakanganaya kithi Nyamuhanga angabere n’erina Yehova erihika kera na kera. Syanga hindwireryo. Nyamuhanga abya anzire iniaminywa omwa lina liwe, Yehova, erihika kera na kera.

Musa abera akasuba e Misiri, Abanya Misiri mubalengekania bathi Yehova ni nyamuhanga enge ey’Abaisraeli. Mubathalengekania bathi ya Nyamuhanga ow’ekihugho kyosi. Neryo Yehova mwabwira omwami we Misiri athi: ‘Ngendi minyisya erina lyaghe omwa kihugho kyosi.’ (Eriluayo 9:16) Yehova mwaminyisya erina liwe. Wunasi ngoku akolha ekyo?—

Mwaha Musa y’olhukwamirwa olhw’erisondolha abandu be Israeli erilhua e Misiri. Babere bahika okwa Ngetse y’Engulha, Yehova mwathulha mw’enzira. Abaisraeli mubalhaba omwa ngetse okwa kithaka ekyumire. Aliriryo Farao n’abasirikali biwe abosi babere babiringira omwa nzira iyaneyo, amaghetse awasangawa iniabirikumirwa okwa syombande ibiri mwasanukalira okw’Abanya Misiri, neryo abosi bamaholha.

Habere halhaba buthuku buke, abandu abosi omwa kihugho mubatsuka eriowa ebya akolire okwa Ngetse ey’Engulha. Thukaminya thuthi ngoku mubowa omwatsi oyu?— Habere habirilhaba emyaka 40, Abaisraeli mubahika e Kanana, ekihugho ekya Yehova asangawa  iniabiribalhaghanisya. Bane eyo, omukali mulere ya Rahabu mwabwira abalhume babiri Abaisraeli athi: ‘Thwabiriowa ngoku Yehova umaya amaghetse w’Engetse y’Engulha embere syenyu, omughulhu mwalhua e Misiri.’—Yosua 2:10.

Munabwire abandu bangyi bali ng’Abanya Misiri abo. Sibali ligha ngoku Yehova ya Nyamuhanga ow’ekihugho kyosi. Busana n’ekyo, Yehova anzire abandu biwe ibabwira abandi ebimuhambireko. Eki kya Yesu akolha. Abere akisiya iniaholha, mwamubwira omwa musabe athi: “Nabiribaminyisya erina lyawu.”—Yoane 17:26, NW.

 Wunanzire eribya nga Yesu? Wamabya wanzire, bwira abandi wuthi erina lya Nyamuhanga ni Yehova. Wangana bana abandu bangyi isibasi ekyo. Enzumwa nguma eyikaleka ibathaminya yiri yithi abandu balebe abakahindulha e Biblia ahangabere erina lya Nyamuhanga bakahira ha Mwami Mukulhu kutse Mukama. Aliriryo omwa syo Biblia nyingyi wangana bana mw’erina lya Nyamuhanga omwa Esyonyimbo 83:18. Erisako eri wamalisubya omwa Lhukonzo likabugha lithi: “Neryo abandu baminye bathi iwe, erina lyawu ni Yehova, n’iwe musa wuli Endatha Kutsibu okwa kihugho kyosi.”

Ni kyahi ekya thukigha thukasoma omulhondo oyu?— Thuk’igha ngoku erina Yehova ly’erina erisingireyo. Ni rina lya Nyamuhanga Omuthoki w’Ebyosi, Thatha wa Yesu kandi oyuwahangika ebindu ebyosi. Kandi wibuke ngoku Yesu mwabugha athi thutholere ithwanza Nyamuhanga Yehova n’omuthima wethu wosi. Wunanzire Yehova?—

Thwanga kangania thuthi ngoku thwanzire Yehova?— Enzira ey’erimbere ly’erimuminya ng’Omunywani. Eyindi nzira ly’eribwira abandi b’erina liwe. Kandi thwangana babwira okwa bindu by’eriswekya n’ebibuya ebya Yehova abirikolha. Eki kikaleka Yehova iniatsema kutsibu kundi akanza abandu ibaminya ebimuhambireko. Thwangana sangira omw’ikolha ekyo, kwa bithe?—

Si bugha indi obuli mundu wosi akendi hulikirira thukakania oku Yehova. Nibya abandu banene mubathahulikirira omughulhu Yesu, Omukangirirya Mukulhu, amukanayako. Aliriryo ekyo mukithaleka Yesu akathendi kania oku Yehova.

Busana n’ekyo thubye nga Yesu. Thulhole embere erikania oku Yehova. Thwamakolha ekyo, Yehova Nyamuhanga iniakendi thusima kundi thwanzire erina liwe.