BUSANA naki ekibulyo, Nyamuhanga wawu nindi? ni kikulhu?— Kundi abandu bakaramaya esyonyamuhanga nyingyi. (1 Abanya Korinto 8:5) Omughulhu Yehova aha omukwenda Paulo y’obuthoki obw’erilhamya omulhume oyuwabya isyali athalyatha, abandu mubabugha n’omulenge munene bathi: ‘Esyonyamuhanga syabere ng’abandu kandi syabiri thwandaghalirako!’ Abandu mubanza eriramya Paulo na munywani wiwe Barnaba. Mubahulha Paulo mwa Herme na Barnaba mwa Zeu, awabya amena w’esyonyamuhanga sy’amabehi.

Aliriryo Paulo na Barnaba mubathalighira abandu bakabaramya. Mubayikulha omw’abandu n’eribugha bathi: ‘Muleke emyatsi mithya-mithya eyi, mubindukire Nyamuhanga oyuliho.’ (Emibiri 14:8-15) “Nyamuhanga oyuliho,” oyuwahangika ebindu ebyosi nindi?— Ni Yehova, oyuli “Endatha Kutsibu okwa kihugho kyosi.” Yesu mwabugha athi Yehova ni ‘Nyamuhanga mughuma ow’ekwenene.’ Busana n’ekyo, ni wahi oyutholere eriramibwa?— Ni Yehova musa!—Esyonyimbo 83:18, NW; Yoane 17:3; Eribisulirwa 4:11.

Abandu bangyi bakaramaya esindi nyamuhanga omwakanya k’eriramya ‘Nyamuhanga mughuma ow’ekwenene.’ Mughulhu mungyi bakaramaya ebindu ebikakolhawa omwa mithi, amabwe, kutse ekyuma. (Eriluayo 32:3-7; Abalawi 26:1; Isaya 44:14-17) Nibya n’abalhume n’abakali abakaminyawa kutsibu, okwa bundi buthuku bakapipawa n’eriramibwa. Nina kibuya eribaha olhukengerwa?—

Saulo abere abiribya mukwenda Paulo, mwahandika athi: ‘Nyamuhanga mubi w’ekihugho kino abiriliba ameso w’obulengekania’ bw’abathikirirye. (2 Abanya Korinto 4:4) Nyamuhanga oyu ni wahi?— Ni Sitani Diabolo! Sitani abirileka abandu ibaramya abandu n’ebindu bingyi.

 Sitani abere akanza Yesu amukukamire n’erimuramya, Yesu mwamusubirya athiki?— ‘Ni Yehova Nyamuhanga wawu oyo wutholere eriramya, kandi n’iyo musa oyo wutholere erikolera.’ (Matayo 4:10) Omwa nzira eyi, Yesu mwakikangania ndeke-ndeke ngoku Yehova yutholere eriramibwa. Thuthasoma okw’abalhwana ababya basi eki. Babya, Sadiraki, Mesaki, na Abedenego.

Abalhwana Abaebrania aba babya baghuma b’okwa kihanda kya Nyamuhanga ekye Israeli kandi babya ibabirithwalhwa omwa bunyewa mwe Babeli. Eyo, omwami oyukahulhawa mwa Nebukadeneza mwakokothya esanamu nene ey’esyamaghetse kutse ehoro. Kiro kighuma mwalhaghira athi omuziki akendibya akabugha, obuli mundu atholere iniakukamira esanamu eyo. Mwakunga athi: ‘Omundu wosi-wosi oyuthendiwa ahisi n’eriramya asyaghuswa omw’irunga ly’omuliro erikaghulhumira.’ Ni kyahi ekya wanga kolire?—

 Kutsibu-tsibu, Sadiraki, Mesaki, na Abedenego ibakakolha obuli kindu ekyo omwami akalhaghira. Lero lino mubaghana erikolha eki. Wunasi nga ni busana naki?— Kundi ekihano kya Nyamuhanga kyabya kikabugha kithi: ‘Susyebya n’esindi nyamuhanga kwihaho ingye. Susyeyikokotheraya esanamu eyikahesawa n’eryunamirayo.’ (Eriluayo 20:3-5) Busana n’ekyo Sadiraki, Mesaki, na Abedenego mubakenga ekihano kya Yehova omwakanya k’erikenga eky’omwami.

Omwami mwahithana kutsibu, neryo mwalhua inialhaghira athi abalhwana basathu Abaebrania abo balethawe embere siwe. Mwabulya athi: ‘Ni kwenene simuli kolera esyonyamuhanga syaghe? Ngendi thasyabaha akandi kaghisa. Neryo lino, mukendibya mukowa eriimba, muwe ahisi n’eriramya esanamu eya nakokothaya. Nikwa mwamathendi ramyayo, mwasyaghuswa omw’irunga erikaka mw’omuliro. Kandi ni nyamuhanga wahi oyuwasyabalhamya omwa byalha byaghe kwehi?’

Lino, ni kyahi ekya abalhwana aba bangakolire? Nawu ni kyahi ekya wanga kolire?— Mubabwira omwami bathi: ‘Nyamuhanga wethu oyo thukakolera angana thoka erithulhamya. Nomwathe angakolha ekyo, sithwendi syakolera esyonyamuhanga syawu. Sithwendi ramya esanamu yawu ey’esyamaghetse.’

 Omwami mwakarama kutsibu. Mwalhaghira athi: ‘Mwakaye erirunga ngendo musanju kwilhaba ngoku lilhue!’ N’enyuma waho mwahamulha abalhume biwe abakaghalha athi babohe Sadiraki, Mesaki, na Abedenego n’eribaghusa omw’irunga erikaka mw’omuliro! Erirunga ly’omuliro lyabya likaka kutsibu indi ebirimi by’omuliro muby’itha abalhume b’omwami abo! Kandi ibbwa Abaebrania basathu?

Sadiraki, Mesaki, na Abedenego mubawa ahakathi-kathi k’omuliro. Aliriryo mubahangana! Mubathakwa ki. Babya isibakibohire. Eki mukya thokekana kithi?— Omwami mwathungerera omw’irunga, n’ekya alhangira mukyaleka iniasweka. Omwami mwabulya athi: ‘Muthutha ghusa abalhume basathu b’omwa muliro?’ Abaghombe biwe mubasubirya bathi: ‘Ee, mwami.’

Omwami mwabugha athi: ‘Lebaya, namalhangira abandu bbani ibane mulendera omwa muliro, kandi omuliro syali bathimaya.’ Wunasi omundu owa kani oyo ng’abya inindi?— Abya malaika wa Yehova. Mwatheya Abaebrania basathu okw’ithendihya omwa muliro.

Omwami abere abirilhangira eki, mwasa okwa lhukyo lhw’erirunga ly’omuliro n’eribirikira athi: ‘Sadiraki, Mesaki,  na Abedenego, inywe abaghombe ba Nyamuhanga ow’Endatha Kutsibu, mulhuemu, mwase hano!’ Babere balhuamu obuli mundu mwalhangira ngoku omuliro syatha bathimya. Nibya mubathabeha kw’omubebo. Neryo omwami mwabugha athi: ‘Apipawe Nyamuhanga wa Sadiraki, Mesaki, na Abedenego, oyuwathuma omumalaika wiwe erilhamya abaghombe biwe kundi isibanga ramya owundi nyamuhanga kwihaho Nyamuhanga wabu.’—Danieli, sura 3.

Omwatsi oyu angana thweghesya erisomo. Na munabwire abandu bakokothaya esyosanamu, kutse ebisasani eby’eriramya. Ekitabu Encyclopedia Americana kikabugha kithi: “Ebbendera, yibuyirire ng’omusalaba.” Esyosanamu syangana kolhwa omwa muthi, eribwe, ekyuma, kutse olhukimba. Abigha ba Yesu abakera isibanga ramya omuthabali owe Roma, ekindu ekya Daniel P. Mannix oyusomire ebya kera abugha athi kyangana sosekanibwa “n’erighana eriramukya ebbendera n’eriimba olhwimbo lhw’erihanga.”

Neryo wukalengekanaya Nyamuhanga akalhangira athi esyosanamu sy’edini esikakolhawa omwa lhukimba, omuthi, eribwe, kutse ekyuma?— Mbwino kyanganabya kibuya omughombe wa Yehova eriramya ebisasani ng’ebi?— Sadiraki, Mesaki, na Abedenego sibanga kolire ekyo, kandi mubatsemesya Yehova. Wanga gherererya wuthi eky’erileberyako kyabu?—