ABANDI bandu bakabugha bathi bakikiriraya ebya bakalhangira bisa. Aliriryo ekyo ni ky’obukiru. Hali ebindu bingyi ebya thuthe thwatha lhangira. Wangana hulha kighuma ky’okw’ibyo?—

Kandi ibbwa omuka owa thukahumulha? Thwangan’owa gho?— Sanzulha ebyalha byawu, wanabibuhako. Wanamowa ekindu kyosi-kyosi?— Muwukakyowa, aliriryo muwuthalhangira omuka, kwa bithe?—

Thwabirikania okw’abandu b’ekirimu, abathuthe thwanga lhangira. Muthukan’igha ngoku abandi buwene aliriryo ngoku abandi ni babi. Thahulha abandu b’ekirimu abuwene abathuthe thwanga lhangira.— Hali Yehova Nyamuhanga, Yesu, n’abamalaika abuwene. Mbwino hane n’abamalaika ababi?— E Biblia yikabugha yithi baneho. Thanyibwira okwa ebya wamabirith’igha okw’ibo.—

Ekindu kighuma ekya thwasi kiri kithi abamalaika ababuya n’ababi bawithe amaaka kwilhaba ithwe. Omukangirirya Mukulhu abya asi bingyi ebihambire okw’abamalaika. Abya asi bingyi kundi anabya malaika athe abuthwa ng’olhumekeke okwa kihugho. Anabya ikere n’abandi bamalaika elhubulha. Abya inianasi esyomiliyoni esy’abamalaika. Abamalaika abosi aba banawithe amena?—

Muthw’igha ngoku Nyamuhanga mwaha esyongununu sy’amena. Busana n’ekyo thwangana kiminya ngoku abamalaika abosi nabu banawithe amena. Kandi thunakyasi ngoku bangana kanirania kundi e Biblia yikakanaya okwa ‘mubughe ow’abamalaika.’ (1 Abanya Korinto 13:1) Wukalengekanaya abamalaika bakakanaya okuki? Bakana thukanayako?—

 Thunasi ngoku abamalaika ba Sitani, esyombinga, bane mulengaho erilhangira bathi sithwowe Yehova. Busana n’ekyo bakathekawa eribya ibane mukania ngoku banga kolha eki. Banzire ithwabya ng’ibo nuku nethu Yehova syathwanze. Kandi ibbwa abamalaika ba Nyamuhanga abathaleghulha? Wukalengekanaya nabu bakana thukanayako?— Ee. Banzire erithuwathikya. Leka nga thakubwira ngoku abandi bamalaika ba Nyamuhanga bawathikaya abandu ababya banzire Yehova n’erimukolera.

Ng’eky’erileberyako, habya omulhume oyukahulhawa mwa Danieli oyuwabya ikere e Babeli. Abandu bangyi sibabya banzire Yehova. Nibya abandu mubahira h’ekilhaghiro eky’erisuyira omundu wosi-wosi oyuwasaba Nyamuhanga Yehova. Aliriryo Danieli mwathaleka erisaba Yehova. Wunasi ekya bakolha oku Danieli?—

Abandu babi mubaleka Danieli iniaghuswa omwa kyuna ky’esyondale. Omwa kyuna mw’eyo, Danieli mwabyayo iyuwene n’esyondale esikwire enzalha. Wunasi ekyabya kyabere?— Danieli mwabugha  athi, ‘Nyamuhanga abirithuma omumalaika wiwe, abirikumba amuno w’esyondale.’ Esyondale musitha mukolha kw’ekindu kyosi-kyosi! Abamalaika bangana kolera abakakolera Yehova b’eby’eriswekya.—Danieli 6:18-22.

Kandi muhanabya obuthuku Petero amahiribwa omwa muliki. Wibuke ngoku Petero abya munywani w’Omukangirirya Mukulhu, Yesu Kristo. Abandi bandu mubatha tsema Petero akababwira athi Yesu abya Mughalha wa Nyamuhanga. Neryo mubahira Petero y’omwa muliki. Abasirikali mubabya ibanalhambire Petero nuku syatswe. Hanabya omundu wosi-wosi oyuwanga muwathikirye?—

Petero abya iniana ghotsere ahakathi-kathi k’abatheya babiri, kandi abya iniana bohire omw’amahulhulha. Aliriryo e Biblia yikabugha yithi:  ‘Lebaya, omumalaika wa Yehova mwabuthukiraho, n’ekyakakalha mukya kolerya omwa kyumba ekyo. Neryo omumalaika mwabbanda oku Petero okwa lhukanga, mwamubukya athi, Hangana lhuba!’

Neryo amahulhulha awabya okwa byalha bya Petero mwayithoghera! Neryo omumalaika mwamubwira athi: ‘Wambale esyongyimba, n’ebiryathu byawu, wunyikwame.’ Abatheya mubatha yira ekya bakakolha kundi omumalaika yuwabya akawathikya Petero. Neryo mubahika okwa lhuyi olhw’ekyuma, n’ekindu ky’eriswekya mukyabya. Olhuyi olho mulhwa yikingulha! Omumalaika oyo mwalhamya Petero nuku anga lholha embere erithulhughania.—Emibiri 12:3-11.

Mbwino nethu abamalaika ba Nyamuhanga bangana thuwathikya?— Ee. Mbwino eki kikamanyisaya kithi bakendi thutheya okwa buli kitsibu?— Eyihi, abamalaika sibali kakiraya ekitsibu ekyanga thuhikako busana n’erikolha eby’obukiru. Aliriryo nomuthwangabya isithuthakolha eby’obukiru, thwangana bana ekitsibu. Abamalaika sibali lhaghirawa erithutheya okwa buli kitsibu. Aliriryo, Nyamuhanga abiribaha omubiiri w’embaghane ow’erikolha.

E Biblia yikakanaya oku malaika oyukabwira abandu ehosi-hosi athi baramaye Nyamuhanga. (Eribisulirwa 14:6, 7) Omumalaika akababwira eki kyathi? Mbwino akabirikira iniane elhubulha nuku obuli mundu amwowe?— Eyihi, aliwe, abigha ba Yesu abali okwa kihugho ba bakabwira abandi oku Nyamuhanga, neryo abamalaika ibabasondolha omwa mubiiri oyu. Abamalaika bakalhangira bathi abandu abanzire eriminya Nyamuhanga bakabana akaghisa ak’eribwirwa. Thwangana sangira omwa mubiiri w’erithulira oyu, neryo abamalaika ibathuwathikya.

Kandi ibbwa abandu abathanzire Nyamuhanga bamathulyambya? Kandi ibbwa bamathuhira omwa muliki? Abamalaika ibane mwendi thulhusya omwa muliki?— Bangana thulhusyamu. Aliriryo sibali kolha ekyo mughulhu wosi.

Omwigha wa Yesu ya Paulo mwanahiribwa omwa muliki. Abya omwa bwathu ekihunga kinene kikahitha. Aliriryo abamalaika mubatha mulhamya aho-n’aho. Bakolha eki kundi mwabya imune abandi ababya  batholere ibowa oku Nyamuhanga. Omumalaika mwabugha athi: ‘Paulo siwubahe! Litholere iwahangana embere sya Kaisari.’ Wanamalhangira, Paulo abya atholere iniathwalhwa ewa Kaisari, omuthabali w’ekihugho kyosi nuku amuthulire engulhu. Abamalaika babya ibanasi aha Paulo abya, kandi mubamuwathikya. Nethu bangana thuwathikya thwamakolera Nyamuhanga.—Emibiri 27:23-25.

Hane owundi mubiiri munene owa abamalaika bakendi syakolha, kandi bakisiya ibakolha gho. Obuthuku bwa Nyamuhanga obw’erithoghothya abandu babi buli hakuhi-kuhi. Abosi abatharamaya Nyamuhanga ow’ekwenene bakendi thoghothibwa. Abakabugha bathi sibikirirye abamalaika kundi sibali balhangira bakendi syaminya ngoku amalengekania wabu syahikire.—2 Abanya Tesalonika 1:6-8.

Ekyo kikendi thughasira kithi?— Thwamabya okwa lhuhandi olhw’abamalaika ba Nyamuhanga, ibakendi thutheya. Aliriryo thune okwa lhundi lhwabu?— Ee, thwamabya ithune mukolere Yehova. Kandi thwamabya ithukakolera Yehova, ithukendi bwira abandi thuthi nabu bamukolere.