OMUGHULHU abaana bakakolha ebindu bibuya, ababuthi babu bakatsema. Omughulhu omusika akakolha ekindu kya ndeke, thatha wiwe akatsema akabwira abandi athi: “Oyu ni mwali waghe.” Kutse omulhwana amakolha ebyuwene, thatha wiwe akatsema eribugha athi: “Oyu ni mughalha waghe.”

Mughulhu wosi Yesu akakolha ebindu ebikatsemesaya Thatha wiwe. Busana n’ekyo, Thatha wiwe akayisyetha busana nayu. Wun’ibukire ekya Thatha wa Yesu akolha kiro kighuma omughulhu Yesu abya n’abigha biwe basathu?— Ee, Nyamuhanga mwakania iniane elhubulha eribabwira athi: ‘Oyu ni Mughalha waghe mwanze, namamutsemera ndeke.’—Matayo 17:5.

Mughulhu wosi Yesu akatsema akakolha ebindu ebikatsemesaya Thatha wiwe. Wunasi nga ni busana naki? Kundi anzire Thatha wiwe ya kutsibu. Omundu amakolha ekindu kundi akathekawa erikikolha, kyangana mukalira. Aliriryo amakikolha iniananzire, kikamwolhobera.

Nibya Yesu abere athe asa okwa kihugho, abya iniananzire erikolha ekyosi-kyosi ekya Thatha wiwe amubwira athi akole. Akolha eki kundi anzire Thatha wiwe, Nyamuhanga Yehova. Yesu abya awithe ekitsumbi kibuyanga elhubulha embere sya Thatha wiwe. Aliriryo, Nyamuhanga abyanzire eriha Yesu y’omubiiri ow’embaghane ow’erikolha. Erikolha omubiiri oyo, Yesu abya atholere inialhua elhubulha. Abya atholere iniabuthwa ng’olhumekeke okwa kihugho. Yesu abya anzire erikolha eki kundi Yehova abya anzire iniakikolha.

Yesu erithoka eributhwa okwa kihugho, habya hatholere ihabya omukali oyukamubutha. Wunasi ngabya inindi?— Abya akahulhwa mwa Maria. Yehova mwathuma malaika wiwe Gabrieli erilhua elhubulha erisyabwira Maria. Gabrieli mwamubwira athi akendi syabutha  omwana w’obulhume. Omwana anga lhukirwe mwa Yesu. Kandi nindi oyuwangabere thatha w’omwana?— Malaika mwabugha athi oyuwangabere Thatha w’omwana ni Nyamuhanga Yehova. Ky’ekyanga lekire Yesu iniahulhwa mwa Mughalha wa Nyamuhanga.

Wukalengekanaya Maria mwayowa athi akowa eki?— Mwanabugha athi, “Singanzire ngabya mama wa Yesu”? Eyihi, Maria mwanza erikolha ekya Nyamuhanga abya anzire. Nomwabine, Mughalha wa Nyamuhanga oyuli elhubulha anga buthirwe athi ng’olhumekeke okwa kihugho? Eributhwa lya Yesu lyabya lithi lya mbaghane okw’ibuthwa ery’abandi baana abosi? Wunasi?—

Nyamuhanga mwahangika ababuthi bethu ab’erimbere, Adamu na Eva, nuku banga mathanibwa haghuma omwa nzire ey’eriswekya. Enyuma waho, omwana anga tsukire erikulira omwanda ya mama wiwe. Abandu bakabugha bathi eki ni kithiko-thiko! Ngakyasi nawu wukalighirana n’eki.

Nyamuhanga mwakolha ekithiko-thiko ekirengire n’eki. Mwimya engebe ya Mughalha wiwe erilhua elhubulha n’erihira y’omw’ibunda lya Maria. Nyamuhanga abya isyali athakolha ekyo, kandi syali athakolha ekyo erilhwiririra n’aho. Busana n’ekithiko-thiko eki, Yesu mwatsuka erikulira omwanda ya Maria ng’abandi baana ngoku bakana kulira omwanda ya mama wabu. Enyuma waho, Maria mwaherukira Yozefu.

Obuthuku bw’eributhwa lya Yesu bwabere bwa hika, Maria na Yozefu babya ibane omwa muyi owe Betelehemu. Aliriryo abya aswire mw’abandu. Maria na Yozefu mubathabana n’ekisenge eky’eribyamu,  neryo mubakwama ky’ikalha omwa nyumba ey’ebisoro. Maria mwabuthira omwa nyumba eyo, neryo Yesu mwahiribwa omw’ithuba, ngoku wamalhangira hano. Erithuba ky’ekindu ekikahirawa mw’ebyalya by’esyonde n’ebindi bisoro bikalya.

Ebindu ebikatsemesaya mubyabyaho omwa kiro ekya Yesu abuthirawamu. Hakuhi ne Betelehemu, omumalaika mwabuthukira okw’abalisya. Mwababwira athi Yesu ni mundu w’ekitsumbi. Malaika mwabugha athi: ‘Ngabalethera engulhu yuwene eyikendi leka abandu ibatsema. Munabwire omundu abiributhwa oyukendi lhamya abandu.’—Luka 2:10, 11.

Omumalaika mwabwira abalisya athi bakendyeya Yesu ye Betelehemu, inianaghotsere omw’ithuba. Neryo, neryo, abandi bamalaika mubayiyunga oku malaika ow’erimbere n’eritsuka eripipa Nyamuhanga.  Abamalaika mubimba bathi, ‘olhukengerwa oku Nyamuhanga, n’obuholho okwa kihugho okw’abandu abakamutsemesaya.’—Luka 2:12-14.

Abamalaika babere babirisubayo, abalisya mubaghenda e Betelehemu n’eribana Yesu. Neryo mubabwira Yozefu na Maria ebibuya ebyosi ebya basangawa ibabiriowa. Wangana thera akasasani ngoku Maria ayowa kundi mwaligha eribya mama wa Yesu?

Enyuma waho, Yozefu na Maria mubathwalha Yesu y’omwa muyi owe Nazareti. Eyo ya Yesu akulira. Abere ane mukulha, mwatsuka omubiiri wiwe mukulhu ow’erikangirirya. Oyu abya mubiiri ow’okwa mibiiri eya Nyamuhanga Yehova abya anzire Mughalha wiwe iniakolha okwa kihugho. Yesu abya  anzire erikolha omubiiri oyo kundi abya anzire Thatha wiwe w’elhubulha ya kutsibu.

Yesu abere athe atsuka omubiiri wiwe ng’Omukangirirya Mukulhu, Yoane Mubatizya mwamubatizirya omwa Lhusi lhwa Yorodani. Neryo muhabya ekindu ekikaswekaya! Yesu abere akalhua omw’amaghetse, omulenge wa Yehova mwalhua elhubulha, athi: ‘Oyu ni Mughalha waghe mwanze, namamutsemera ndeke.’ (Matayo 3:17) Wukanayowa ndeke ababuthi bawu bakakubwira bathi bakwanzire?— Thwangana kikakasya ngoku Yesu nayu mwayowa ndeke.

Mughulhu wosi Yesu mwakolha ebihikire. Mwathayihererya ekitsumbi ekithe kiwe. Mwathabwira abandu athi n’iyo Nyamuhanga. Malaika Gabrieli abya iniabiribwira Maria athi Yesu angabere Mughalha wa Nyamuhanga. Yesu iyuwene-wene mwabugha athi ni Mughalha wa Nyamuhanga. Kandi mwathabwira abandu athi asi bingyi kwilhaba Thatha wiwe. Mwabugha athi: ‘Thatha andengire.’—Yoane 14:28.

Nibya n’omwa lhubulha, omughulhu Thatha wa Yesu amuha omubiiri ow’erikolha, Yesu mwakolha gho. Mwathabugha athi akendi kolha gho neryo akayakolha owundi mubiiri. Abya anzire Thatha wiwe. Busana n’ekyo, mwahulikirira ebya Thatha wiwe amubwira. Neryo omughulhu Yesu asa okwa kihugho, mwakolha ekya Thatha wiwe ow’elhubulha amubwira athi ase akole. Mwathakolesya obuthuku bwiwe erikolha eyindi mibiiri. Kwesi kyakikaleka Yehova iniatsemera Mughalha wiwe!

Nethu thwanzire ithwa tsemesya Yehova, kwa bithe?— Neryo thutholere ithwa lhangira thuthi thukahulikirira Nyamuhanga ya ndeke, nga Yesu kwa kolha. Nyamuhanga akakanaya nethu erilhabira omwa Biblia. Sikyuwene eribya nga thunahulikirire Nyamuhanga neryo ithw’ikirirya kandi ithwa kolha ebindu ebye Biblia yikathanga, kwa bithe?— Kandi wibuke ngoku thukendi anza eritsemesya Yehova thwamamwanza kundu.