WUNASI eriyipipa nga likamanyisaya ki?— Eky’erileberyako kya kino. Wune wathalengesya erikolha ekindu ekya wuthasi erikolha ndeke? Thubughe thuthi muwalengesya erisamba omupira. Kutse obundi muwalengesya erighulhuka ekihube bakakihungya. Omundu mwanabugha athi, “Aweee! Nga kusingire”?— Omundu oyo abya iniakayipipa.

Wukayowa wuthi abandi bamakubwira bathya? Wukana tsema?— Neryo ibbwa, wukalengekanaya abandi bakayowa bathi wamayipipa?— Nina kibuya eribwira owundi mundu wuthi, “Nga kusingire”?— Yehova akanatsemera abandu abakabugha bathya?—

Omukangirirya Mukulhu anabya asi abandu ababya bakalengekania bathi basingire abandi. Ibakayipipa, kutse eriyipanga n’erighaya abandi. Neryo kiro kighuma Yesu mwababwira olhughano olhukabakanganaya ngoku sikitholere eriyipipa. Thuhulikirire lho.

Olhughano olhu lhuhambire okw’Omufarisayo n’omusolesya w’emisolho. Wunasi, Abafarisayo babya bakangirirya b’edini, ababya bakayithwalha nga babuyirire kutsibu kwilhaba abandi. Omufarisayo oyuli omwa lhughano lhwa Yesu mwahethukira okwa hekalu ya Nyamuhanga e Yerusalemu akayasaba.

Yesu mwabugha athi n’omusolesya mwahethukira okwa hekalu eriyasaba. Abandu bangyi sibabya banzire abasolesya. Ibakalengekanaya bathi abasolesya bakabiba. Kandi ni kwenene abasolesya bangyi isibali kolha omw’okwenene.

 Babere bane omwa hekalu, Omufarisayo mwatsuka erisaba Nyamuhanga athi: ‘Nyamuhanga, ngakuha ewasingya kundi sindi mukolha nabi ng’abandi bandu. Sindi nyegha abandu kutse erikolha ebindi bindu bibi. Sindi ng’omusolesya olya. Indi muthunganene. Ngatsira akalyo ngendu ibiri obuli yenga neryo ngawithe endambi nene ey’erikulengekaniako. Ngaha ehekalu y’ekighuma ky’erikumi omwa byosi nga thunda.’ Omufarisayo mwayowa ngasingire abandi, kwa bithe?— Nibya mwabwira na Nyamuhanga ngoku asingire abandi.

Aliriryo omusolesya syabya athya. Nibya isyanga thoka n’erilholya obusu bwiwe bw’elhubulha akasaba. Mwimana hali inianunamire. Omusolesya mwayikubya bwomo busana n’ebibi biwe, n’erihumanga okwa kikuba kiwe busana n’obulighe obuli omwa muthima wiwe. Mwathalengesya eribwira Nyamuhanga okwa bibuya ebyabya akakolha. Aliwe mwasaba athi: ‘Nyamuhanga, wunyighanyire, ingye mukolha-nabi.’

Wukalengekanaya okw’abalhume babiri aba ni wahi oyuwatsemesaya Nyamuhanga? Mbwino y’Omufarisayo, oyuwalengekanaya athi ni mubuya kutsibu? Kutse y’omusolesya, oyuwayikubaya bwomo busana n’ebibi biwe?—

Yesu mwabugha athi omusolesya yuwatsemesaya Nyamuhanga. Busana naki? Yesu mwasoborera athi: ‘Kusangwa obuli mundu oyukayihamaya, asyakehibwa. Nikwa oyukayikehaya, asyahamibwa.’—Luka 18:9-14.

N’isomo lyahi erya Yesu akangiriraya omwa lhughano  olhu?— Abya akakangirirya ngoku ni kibi erilengekania thuthi thulengire abandi. Thwanganabya isithuli bugha thuthi thulengire abandi, aliriryo ebya thukakolha, byangana kangania eki. Wune wathakolha ekyo?— Thulengekanaye okwa ky’erileberyako eky’omukwenda Petero.

Yesu abere akabwira abakwenda biwe ngoku abosi banga musighanirye bakamuhamba, Petero mwayipanga athi: ‘Obuli mundu wosi nomwanga kusighania, ingye singendi syakusighania!’ Aliriryo Petero syabya ahikire. Mwayikethera omuthima wiwe wa kutsibu. Mwasighania Yesu. Aliriryo, mwayisubamu, ngoku thukendi sy’igha omwa Sura 30 ey’ekitabu kino.—Matayo 26:31-33.

Thulebaye eky’erileberyako eky’omwa biro ebya munabwire. Obundi bakababulhaya ebibulyo imune omwa kitebe. Kandi ibbwa wamabya iwunasi eby’erisubirya aho n’aho, aliriryo abandi isibasi? Ni kwenene, wukayowa ndeke wamabya iwunasi eby’erisubirya. Aliriryo nina kibuya eriyilinganisya n’abo abakathwalha buthuku buuli imubasubirya?— Nina kibuya erilengesya eriyithwalha mw’ow’endatha okw’abandi?—

Ekyo ky’Omufarisayo akolha. Mwayipipa athi alengire omusolesya. Aliriryo Omukangirirya Mukulhu mwabugha athi syahikire. Ni kwenene omundu angana kolha ndeke ebindu birebe kwilhaba owundi. Aliriryo ekyo sikiri manyisaya kithi alengire abandi.

Neryo thwamabya thwasi bingyi kwilhaba owundi mundu, eyo nina nzumwa mbuya eyanga leka ithwa yipipa?— Thalengekania okwa kino. N’ithwe thwa yikolera obwongo bwethu?— Eyihi, Nyamuhanga yuwaha obuli mundu y’obwongo. N’emyatsi mingyi eya thwasi, thw’ighirayo okwa wundi mundu. Obundi thwasomayo omwa kitabu. Kutse obundi omundu yuwathubwirayo. Nomuthwanga yikolera ekindu ahabwethu, ekiryathuthokesaya ni kyahi?— Bw’obwongo obwa Nyamuhanga athuha.

Omundu amalengaho kutsibu erikolha ekindu kirebe, ekindu ky’olhukeri ly’erimubwira ekyanga leka iniayowa ndeke.  Mubwire wuthi wamatsemera eky’alyakolha. Nibya wangana muwathikya erikikolha ndeke. Ekyo kya wanzire abandu ibakukolera, kwa bithe?—

Abandi bandu bawithe akaghalha kwilhaba abandi. Kandi ibbwa wamabya iwuwithe akaghalha kwilhaba mughalha wenyu kutse mwali wenyu? Eyo nina nzumwa eyanga leka iwayipanga?— Eyihi, si nzumwa. Ebyalya ebya thukalya bya bikaleka ithwabana akaghalha. Kandi Nyamuhanga akaha ebirimwa by’omwisi n’embulha n’obuli kindu kyosi-kyosi ekikayithaghisibawa nuku thubane ebyalya, kwa bithe?— Busana n’ekyo, thutholere ithwasima Nyamuhanga thwamabya n’akaghalha.—Emibiri 14:16, 17.

Sihali omundu oyukatsema omundu akayipipa, kwa bithe?— Thwibuke ebinywe bya Yesu: ‘Ngoku mwanzire abandi ibabakolera, nenyu kwa munakolerebo muthya.’ Thwamakolha ekyo, isithwendi syabya ng’Omufarisayo oyuwayipipa oyuli omwa lhughano olhw’Omukangirirya Mukulhu athulha.—Luka 6:31.

Kiro kighuma, omundu mwahulha Yesu mwa mubuya. Omukangirirya Mukulhu mwanabugha athi, ‘Ee, indi  mubuya’?— Eyihi. Aliwe, mwabugha athi: “Sihali mubuya, nina Nyamuhanga iyowene.” (Mariko 10:18) Nomwakine indi Omukangirirya Mukulhu abya ahikene, mwathayipipa. Aliwe, mwaha olhukengerwa lhwosi lhwa Thatha wiwe, Yehova.

Busana n’ekyo, hane omundu wosi-wosi oyo thwanga pipa?— Ee, aneho. Thwangana pipa Omuhangiki, Yehova Nyamuhanga. Thwamalhangira amalengetsa awuwene aw’eryuba, kutse ebindi bihangikwa by’erithikya, thwangana bwira omundu thuthi, ‘Yehova, Nyamuhanga wethu omubuya, yuwakolha eki!’ Mughulhu wosi thubye ithunayitheghekire erikania okwa bindu by’erithikya ebya Yehova abirikolha n’ebya akendi syakolha omwa buthuku bw’embere.