OMUNDU ane athakubwira athi wukole ekithatholere?— Mwanakuhathikana erikolhakyo? Kutse mwana kubwira athi kikendi kutsemesya kandi athi sikyangabya kibi wamakikolha?— Omundu amathukolha athya, akabya iniakathulengako.

Ni kyahi ekya thutholere ithwakolha thwamalengwako? Thunatholere ithwaligha erikolha ekithatholere?— Ekyo sikyanga tsemesya Nyamuhanga Yehova. Aliriryo wunasi oyuwanga tsema?— Ee, ni Sitani Diabolo.

Sitani ni nzighu ya Nyamuhanga kandi ni nzighu yethu. Sithwanga mulhangira kundi ni mulimu. Aliriryo angana thulhangira. Kiro kighuma Diabolo mwakania na Yesu, Omukangirirya Mukulhu, n’erilengesya erimulengako. Thulebaye ekya Yesu akolha. Neryo thukendi minya ekya thutholere erikolha thwamalengwako.

Yesu mwanza erikolha erisonda lya Nyamuhanga mughulhu wosi. Mwakangania eki kinyamwisi akabatizibwa omwa Lhusi Yorodani. Yesu abere abibatizibwa Sitani kwanabya alengesirye athya erimulengako. E Biblia yikabugha yithi ‘olhubulha mulhwakyungukalha’ busana na Yesu. (Matayo 3:16) Eki kyangabya ikyamanyisaya kithi Yesu mwatsuka eryibuka engebe eyabya awithe elhubulha iniane na Nyamuhanga.

 Yesu abere abibatizibwa mwaghenda omwa mbwarara eriyaghanirya okwa bindu ebyabya iniabiritsuka eryibuka. Muhahwa ebiro makumi ani. Ebiro byosi ebi Yesu mwathalya kindu kyosi-kyosi, neryo mwakwa enzalha. Eyi y’endambi eya Sitani asiramu erilenga oku Yesu.

Diabolo mwabugha athi: ‘Wamabya iwuli mughalha wa Nyamuhanga, bwira amabwe aya abye byalya.’ Ebyalya ka byanga sihire okwa ndambi eyi! Aliriryo Yesu angana hindwire amabwe mw’ebyalya?— Ee. Busana naki? Kundi Yesu, Mughalha wa Nyamuhanga, abya awithe obuthoki obw’embaghane.

Wangana hindwire eribwe mw’ebyalya Diabolo kwa kubwira athi wukikole?— Yesu abya akwire enzalha. Neryo kyanganabere kibi erikwama kya kikolha murundi mughuma musa?— Yesu abya inianasi ngoku ni kibi erikolesya obuthoki bwiwe omwa nzira ng’eyi. Yehova amuha obuthoki obu eribukolesya erithunda abandu b’oku Nyamuhanga, butsira eribukolesya busana n’eriyighasira.

Neryo, omwakanya k’erikolha ekyo, Yesu mwabwira Sitani y’omwatsi owahandikire omwa Biblia ono: ‘Omundu syendi syabyaho busana n’ebyalha bisa, nikwa busana n’obuli kinywe ekikalhua omwa buno bwa Yehova.’ Yesu abya inianasi ngoku erikolha ebikatsemesaya Yehova ni ry’omughaso kwilhaba ebyalya.

 Aliriryo Diabolo mwatha lhuhirira. Mwathwalha Yesu ye Yerusalemu n’erimwimania okw’akasweswe ak’okw’ehekalu. Neryo Sitani mwabugha athi: ‘Wamabya iwuli mughalha wa Nyamuhanga wuyighuse ahisi; kusangwa amasako athi Nyamuhanga asyahamulha abamalaika biwe nuku siwuhuthale.’

Ekyaleka Sitani iniabugha eki niki?— Abugha ekyo erianza Yesu akole ekindu ky’obukiru. Aliriryo kandi Yesu mwathahulikirira Sitani. Mwabwira Sitani athi: ‘Amasako athi, Siwusyelenga oku Yehova Nyamuhanga wawu.’ Yesu abya inianasi ngoku ni kibi erilenga oku Yehova omw’ihira engebe yiwe y’omw’akabi.

Nomwabine, Sitani mwathabihwako. Mwathasya thwalha Yesu y’okwa kithwe kiri-kiri. Ban’eyo, mwamukangania amami wosi kutse amathabali aw’ekihugho n’olhukengerwa lhwawu. Neryo Sitani mwabwira Yesu athi: “Ebyosi ebi nasyakuhabyo wamanyikukamira n’erinyiramya.”

Thalengekania okwa ekya Diabolo anza eriha Yesu. Kwenene amami wosi aya, kutse amathabali w’abandu anabya wa Sitani?— Yesu mwathaghana athi si wa Sitani. Anga ghanire kwabya isi wa Sitani. Omwa kwenene, Sitani ya muthabali ow’ekihugho kyosi. Nibya e Biblia yikabugha yithi ni ‘muthabali w’ekihugho kino.’—Yoane 12:31.

Ni kyahi ekya wanga kolha Diabolo amakulhaghanisya erikuha ekindu wamamuramya?— Yesu abya inianasi ngoku ni kibi eriramya Diabolo nomwanga muhere ekindu ekisosire kithi. Neryo Yesu mwabugha athi: ‘Ulhuaho, iwe Sitani! Kusangwa e Biblia yikabugha yithi, wasyaramya Yehova Nyamuhanga wawu kandi wasyamukolera iyuwene.’—Matayo 4:1-10; Luka 4:1-13.

Nethu thukalengawako. Wunasi nga thukalengawako omu nzira syahi?— Eky’erileberyako kya kino. Mama wawu angana tsumba amandazi awasihire awa mukendirya bolho. Angana kubwira athi wulikirya kugho esaha ey’erirya gho yithe yahika. Aliriryo enzalha iyalhuma kutsibu, neryo iwalengwako erirya kugho. Wune mwendi ghendera  okwa bya mama wawu alya kubwira?— Sitani anzire iwaghana eriowa mama wawu.

Wibuke Yesu. Nayu abya akwire enzalha. Aliriryo abya inianasi ngoku eritsemesya Nyamuhanga lirengire erirya. Wukakanganaya ngoku wuli nga Yesu wukakolha ebya mama wawu akakubwira.

Abandi baana bangana kubwira bathi wunywe ebbanji. Ibangana kubwira bathi erinywayo likendi leka iwayowa ndeke. Aliriryo, ebbanji yangana  tsandya engebe yawu. Kutse omundu angana kuha omunwe w’ethaba, neryo iniakuhathikana athi wunywe gho. Iwukendi kolha ki?—

Wibuke Yesu. Sitani mwanza Yesu atsame engebe yiwe omw’imubwira athi aghulhuke erilhua okwa hekalu. Aliriryo Yesu mwaghana. Ni kyahi ekya wukendi kolha omundu amakubwira athi wukole ekikendi kuhira omw’akabi?— Yesu mwatha kolha ebya Sitani abugha. Nawu isiwahulikirira omundu oyukakubwira athi wukole ebindu bibi.

Hangana yira ibakubwira bathi wuramaye esanamu, ekindu ekye Biblia yikathubwira yithi isithwakolha. (Eriluayo 20:4, 5) Kyanganabya ikikendi kolhwa okwa mukonga owali okwa sukuru. Nibya bangana kubwira bathi wamathendi kikolha iwukendi bingwa okwa sukuru eyo. Iwukendi kolha ki?—

Kyolhobire erikolha ekihikire omughulhu obuli mundu wosi akakolha kyo. Aliriryo erikolha ekihikire kyangana kalha omughulhu abandi bakanza thukole ebithuwene. Bangana bugha bathi ebya bakakolha si bibi. Aliriryo ekibulyo kikulhu kiri kithi, Nyamuhanga akabugha athiki okw’omwatsi oyu? Yuwasi ekitholere.

Busana n’ekyo abandu n’omubanga bugha bathiki, isithwakolha ekya Nyamuhanga akabugha athi ni kibi. Omwa nzira eyi, ithukendi bera eritsemesya Nyamuhanga, kandi isithwendi syatsemesya Diabolo nahake.