WUNE walya ebyalya munabwire?— Wunasi oyulya bitsumba?— Obundi mama wawu kutse owundi mundu yulya bitsumba, aliriryo busana naki ithwa sima Nyamuhanga busana n’ebyalya ebyo?— Kundi Nyamuhanga yukaleka ebirimwa ebyalhasa neryo ithwabana ebyalya. Aliriryo thutholere ithwasima n’oyulya bitsumba kutse oyulya thuhukulirabyo.

Okwa bundi buthuku thuk’ibirirawa eribugha thuthi wasingya abandi bakathukolera ebibuya, kwa bithe? Omughulhu Omukangirirya Mukulhu abya okwa kihugho, habya abahagha balebe abibirirawa eribugha bathi wasingya.

Wunasi ebihagha nga niki?— Ni bulhwere obwangana leka omubiri w’omundu iniatotongoka. Omughulhu Yesu abya okwa kihugho, abahagha sibabya batholere bak’ikalha omw’abandi bandu. Kandi omuhagha inakabya akalhangira owundi omundu akasa, iniakabirikira omundu oyo athi aseghere. Babya bakakolha eki nuku abandi bandu balikibya hakuhi nabu neryo bakahambwa obulhwere bw’ebihagha.

Yesu mwakwira abahagha b’olhukeri. Kiro kighuma, abere ane mughenda e Yerusalemu, Yesu mwalhaba omwa kayi kake. Abere akahika hakuhi na kayi ako, abahagha ikumi mubasa erisyamulebya. Babya ibabiriowa ngoku Yesu awithe obuthoki erilhua oku Nyamuhanga obw’erilhamya amalhwere wosi.

Abahagha mubathahika hakuhi na Yesu. Mubimana hali kutsibu. Aliriryo babya bikirirye ngoku Yesu akendi lhamya ebihagha byabu. Neryo abahagha babere balhangira Omukangirirya Mukulhu, mubamubirikirako bathi: ‘Yesu, Omukangirirya, thuwathikaye.’

 Wukana kwira abalhwere b’obulighe?— Yesu mwakolha ekyo. Abya inianasi ngoku ni ky’obulighe eribya muhagha. Neryo mwabasubirya athi: ‘Mughende muyikanganaye okw’abahereri.’—Luka 17:11-14.

Ekyaleka Yesu iniababwira athi bakole eki niki? Ababwira eki busana n’ekihano ekya Yehova abya iniabiriha abandu Biwe ekihambire okw’abahagha. Ekihano eki kyabya kikabugha kithi omuhereri wa Nyamuhanga atholere iniayitheghererya ndeke omubiri w’omuhagha. Omuhereri iniakabwira omuhagha athi obulhwere biwe bwabirilhama. Iniakabya abirilhama, iniakathasyikalha n’abandu abatha lhwere.—Abalawi 13:16, 17.

Aliriryo abahagha aba ibakabya ibakine n’obulhwere bwabu. Neryo mubana ghenda eyiri omuhereri ngoku Yesu ababwira?— Ee, mubalhua  ibaghenda aho n’aho. Abalhume aba bangabya ibabya bikirirye ngoku Yesu akendi lhamya obulhwere bwabu. Ni kyahi ekyabya kyabere?

Babere bane mughenda eyiri omuhereri, obulhwere bwabu mubwalhama. Omubiri wabu mwasuba-subana. Mubabya ndeke! Ibo erikirirya obuthoki bwa Yesu mulyaleka ibahembwa. Ka mukyabatsemesya kutsibu! Aliriryo ni kyahi ekya babya batholere erikolha erikakangania ngoku bamasima? Ni kyahi ekya wanga kolire?—

Omughuma w’okw’abalhamibawa mwasuba eyiri Yesu. Mwatsuka eriha Yehova y’olhukengerwa, erikania ebindu bibuya ebihambire oku Nyamuhanga. Ekyo ky’ekyabya kindu ekitholere erikolhwa kundi obuthoki obw’erimulhamya bwalhua oku Nyamuhanga. Kandi omulhume oyu mwakukama embere sy’Omukangirirya Mukulhu n’erimuha ewasingya. Mwatsema kutsibu busana n’ekya Yesu akolha.

Kandi abandi balhume mwenda? Yesu mwabulya athi: ‘Balhue bahagha ikumi abalyalhamibawa, kwa bithe? Abandi mwenda bali hayi? Omughuma musa yulya subulha erisyaha Nyamuhanga y’olhukengerwa?’

 Ee, ni kwenene. Omughuma musa ow’okw’abalhume ikumi aba yuwaha Nyamuhanga y’olhukengerwa, kutse erimupipa, kandi mwasubulha erisyasingya Yesu. Kandi omundu oyu abya Musamaria erilhua omwa kindi kihugho. Abandi balhume mwenda mubathasingya Nyamuhanga, kandi mubathasingya na Yesu.—Luka 17:15-19.

Wuli ng’omulhume wahi okw’abalhume aba? Thwanzire eribya ng’Omusamaria, kwa bithe?— Neryo omundu amathukolera ekindu eky’olhukeri, ni kyahi ekya thutholere ithw’ibuka erikolha?— Thutholere ithwa musingya. Mughulhu mungyi abandu bak’ibirirawa eribugha bathi wasingya. Aliriryo ni kibuya eribugha thuthi wasingya. Thwamakolha ekyo, Nyamuhanga Yehova na Mughalha wiwe Yesu, bakatsema.

Wamakilengekaniako, iwukend’ibuka ngoku abandu babirikukolera ebindu bingyi. Ng’eky’erileberyako, wune wathalhwalha?— Wanganabya isiwuli wathalhwalha obulhwere ng’obw’abalhume ikumi abo, aliriryo wanganabya imuwalhwalha ekihinzi kutse omwanda. Mubanakuthwanira?— Banganabya imubakuha omubatsi n’erikukolera ebindi bindu. Muwana tsema kundi mubakuwathikya eribya ndeke?—

Omulhume Omusamaria mwasingya Yesu busana n’erimulhamya, kandi eki mukyatsemesya Yesu. Wukalengekanaya mama wawu kutse thatha wawu bangana tsema wamabasingya busana n’ekya balyakukolera?— Ee, ibakendi tsema.

Abandi bandu bakakukolera ebindu birebe obuli kiro kutse obuli yenga. Anganabya ini mubiiri wabu erikolha ebindu ebi. Nibya kyanganabya  ikikabatsemeseya erikolha ebindu ebi. Aliriryo wangan’ibirirwa eribasingya. Omusomesya wawu ow’okwa sukuru angana kolha kutsibu erikuwathikya erigha. Oyu ni mubiiri wiwe. Aliriryo iniakendi tsema wamamusingya busana n’erikuwathikya erigha.

Okwa bundi buthuku, abandu bakakwama kya kukolera bindu bike-bike. Omundu ane athakuwathikya eriheka ekindu ekirithohire? Kutse omundu ane athakuhukulira ebyalya? Ni kibuya eribugha wuthi wasingya n’okwa bindu bike-bike ng’ebi.

Thwamibuka erisingya abandu ab’okwa kihugho, ikyangana thwanguhira erisingya Thatha wethu ow’elhubulha. Kandi ka hali ebindu bingyi ebyanga leka ithwasingya Yehova! Mwathuha engebe n’ebindu ebyosi ebikatsemesaya engebe. Busana n’ekyo, thuwithe esyonzumwa nyingyi esyangaleka ithwaha Nyamuhanga y’olhukengerwa omw’ikania ebindu bibuya ebimuhambireko buli kiro.