YESU abere abirikulha n’eriminya ngoku atheghibawa iniakine mulere, wukalengekanaya mwanasaba Yehova n’erimusima?— Wukalengekanaya Yesu mwabwira Maria na Yozefu baki akaminya ngoku mubalhamya engebe yiwe bakamuthibithya e Misiri?—

Lino, Yesu syakiri lhumekeke. Syakiri n’okwa kihugho. Aliriryo wune walhangira ngoku lino abandi bandu bakathwalha Yesu ng’olhumekeke olhukine omw’ithuba ly’esyonde?— Kutsibu-tsibu, eki kikabya omwa bitsweka bingyi omwa buthuku bwe Krisimasi omughulhu bakakanganaya ebisasani bya Yesu ng’olhumekeke.

Nomwakine indi Yesu syakiri okwa kihugho, wun’ikirirye ngoku aneho?— Ee, mwalhubukibwa, kandi lino ni Mwami oyuwithe amaaka elhubulha. Wukalengekanaya ni kyahi eky’angakolha eritheya abakamukolera?— Ng’eky’erileberyako, omughulhu Yesu abya okwa kihugho, mwakangania ngoku angatheya abamwanzire. Thulebaye ngoku akolha eki kiro kighuma iniane omw’obwathu n’abigha biwe.

Ni saha esy’erigholho. Omwa musibo wosi, Yesu alhue iniane mukangirirya okwa Ngetse  eye Galilaya, engetse nene ey’esyokilomita 20 omwa buuli n’esyokilomita 12 omwa bughali. Neryo akabwira abigha biwe athi: ‘Thusokere eyisirya w’engetse.’ Neryo bakingira omw’obwathu n’eribuhongolha bakasoka engetse. Yesu abirilhuha kutsibu, neryo akaghenda enyuma omw’obwathu n’erikesya okwa kiseghemero. Neryo amayatho.

Abigha biwe bakabya ibanalholire ibane mughendya obwathu. Ahabw’akathambi kake hakabya isihali obutsibu, aliriryo enyuma waho erihunga linene likahitha. Likongera erihitha kutsibu, n’ebisunda by’amaghetse bikongera erikanya. Ebisunda bikatsuka eriyighusanga omw’obwathu, n’obwathu bwamatsuka erisulha mw’amaghetse.

Abigha bakubaha, erilengekania bathi bakayadikira. Aliriryo Yesu syathubaha. Akinaghotsere omw’obwathu. Erighunzerera, abigha biwe bakamubukaya, n’eribugha bathi: ‘Mukangirirya, Mukangirirya, thulhamaye; ekihunga eki kikanza erithwitha!’ Neryo Yesu akahangana n’eribwira ekihunga n’ebisunda athi: ‘Huna, wubye bukuthu!’

Neryo-neryo ekihunga kikumbaya, n’engetse yikathekana. Abakwenda bakasweka. Sibali bathalhangira ekindu ng’eki. Mubatsuka  eribwirana bathi: ‘Omundu oyu nindi oyukahana ebihunga n’amaghetse, ibya mukenga kwehi?’—Luka 8:22-25; Mariko 4:35-41.

Wunasi Yesu nga nindi?— Wunasi obuthoki bwiwe bunene obu nga akabwiha hayi?— Abigha sibabya batholere bakubaha omughulhu Yesu abya iniane nabo, kundi Yesu syabya mundu wa buli kiro. Iniakakolha ebindu by’eriswekya ebya wundi mundu athe angakolha. Leka nga kubwire okwa kindi kindu ekya akolha okwa ngetse iyabirighunga.

Kyabya kindi kiro, ihamabirilhaba obuthuku. Likabya lyabya igholho-gholho, Yesu akabwira abigha biwe athi bingire omw’obwathu banasokera eyisirya w’engetse. Neryo Yesu iyo akahethukira okwa kithwe kw’iyuwene. Ni kitsweka ekihunerere ekya angasabira mwa Thatha wiwe, Yehova Nyamuhanga.

Abigha bakingira omw’obwathu n’eritsuka erisoka engetse. Aliriryo bathe bahika hali erihunga likatsuka erihitha. Likongera erihitha kutsibu. Yamabiriasa omwirimya. Abigha bakakimaya olhukimba olhukahamba  omuyagha n’eritsuka erikolesya engahya. Aliriryo obwathu sibuli ghenda kundi ekiyagha kikabasukuma enyuma. Obwathu bukayihungaya eyi n’eyi omwa bisunda, n’amaghetse iniane muyighusanga omw’obwathu. Abalhume bakalengaho kutsibu erilhangira bathi bakahika okwa musike w’engetse, aliriryo kikabakalira.

Yesu akine okwa kithwe kw’iyuwene. Amabirighunza y’endambi nene. Aliriryo lino akalhangira ngoku abigha biwe bali omw’akabi omwa bisunda binene-binene eby’amaghetse. Neryo akalhua okwa kithwe n’eriandaghalira okwa musike w’engetse. Yesu akanza eriwathikya abigha biwe, neryo akatsuka erithandaghira okwa ngetse eyabirighunga akaghenda eya bali!

Ni kyahi ekyangabya wamalengesya erithandaghira okw’amaghetse?— Wangana dikira, neryo iwasomera. Aliriryo oku Yesu kwa bithe bithya. Awithe amaaka aw’embaghane. Yesu atholere iniaghenda lhughendo lhuuli erihika okw’obwathu. Neryo abigha bakalhangira Yesu akasa eya bali okw’amaghetse omwa mitsange. Aliriryo bakakukubalha busana n’ekya bamalhangira. Bali mw’engitsi nene, neryo bakalhaka busana n’obuba. Neryo Yesu akababwira athi: ‘Musike emithima! N’ingye, simubahe.’

Yesu akabya akan’ingira omw’obwathu, erihunga likumbaya. Kandi abigha bakasweka. Bakunama embere sya Yesu n’eribugha bathi: ‘Kwenene wuli Mughalha wa Nyamuhanga!’—Matayo 14:22-33; Yoane 6:16-21.

Ku thwabyaho okwa buthuku obo, sithwanga tsemire erilhangira Yesu akakolha ebindu ng’ebi?— Wunasi ekyaleka Yesu iniakolha ebithiko-thiko ebi?— Mwakolha ebindu ebyo kundi abya anzire abigha biwe kandi abya anzire eribawathikya. Aliriryo kandi mwakolha ebindu ebyo erikangania obuthoki bunene obwabya awithe n’obwa angakolesirye omwa buthuku bw’embere ng’Omuthabali w’Obwami bwa Nyamuhanga.

N’omwa buthuku buno Yesu akabera erikolesya amaaka wiwe eritheya abigha biwe okw’irengaho lya Sitani ery’erithulemesya eribwira  abandi okw’Obwami bwa Nyamuhanga. Aliriryo Yesu syali kolesaya amaaka wiwe eritheya abigha biwe okw’amalhwere kutse eribalhamya omughulhu balhwere. Nibya n’erighunzerera abakwenda ba Yesu abosi mubaholha. Mughalha wabu Yoane ya Yakobo mwithibwa, na Yoane iyuwene-wene mwahiribwa omwa muliki.—Emibiri 12:2; Eribisulirwa 1:9.

Kwa bine bithya munabwire. Mbulha abandu bakakolera Yehova kutse eyihi, abosi bangana lhwalha n’eriholha. Aliriryo obuthuku obuthe bwa hali, omughulhu Yesu akendi thabalha ng’Omwami w’obuthabali bwa Nyamuhanga okwa kihugho, emyatsi yikendi syabya ya mbaghane. Okwa buthuku obo sihali omundu oyukendi syubaha kandi, kundi Yesu akendi syakolesya akaghalha kiwe eritsumulha abosi abakamwowa.—Isaya 9:6, 7.