1-3. (a) Ni mwatsi wahi ow’ekwenene owa Biblia yikabugha? (b) Thwanga sombolha thuthi abanywani abanga thuwathikya eribya n’emibere mibuya?

ABANDU bali ng’epamba eyikanyunyira amaghetse; bakabera erinyunyira kutse erigherererya ebibathimbireko. Kyolhobire erigherererya emibere, emitse, n’emighendere ey’abanywani bethu isithuthakiminya.

² E Biblia yikabugha ekwenene eyilhangirikire ndeke omughulhu yikabugha yithi: ‘Wulendere n’abandu b’amenge nawu wasyabya n’amenge; nikwa omwira w’abakiru asyakwa.’ (Emisyo 13:20) Omusyo oyu syali manyisaya obunywani obw’eyighulhu-ghulhu. Ekinywe ‘erilendera’ n’omundu kikamanyisaya obunywani obw’okwa ndungo. Ekitabu kighuma ekikasoborera e Biblia kikakanaya okwa mulhondo oyu kithi: “Erilendera n’omundu kikamanyisaya erimwanza n’eribya bughuma nayu.” Mbwino siwuli ligha indi thukalengesaya erigherererya abo thwanzire? Omwa kwenene, kundi omuthima wethu thukahweraya w’okw’abandu abo thwanzire, bangana thubindulha ithwabya babuya kutse babi.

³ Erithoka eriyibika omo lhwanzo lhwa Nyamuhanga, thutholere ithwa sombolha abanywani abanga leka ithwakolha ebibuya. Thwangakolha ekyo kya thuthi? Enzira eya thwanga kolera mw’eki, ly’erianza abo Nyamuhanga anzire, erikolha abanywani biwe mw’abanywani bethu. Thakilengekaniako, ni bandi bandu bahi abathwanga nywana abawithe emibere eyilengire eya Yehova akasondaya omwa banywani biwe? Kwesi, thulebaye nga ni bandu ba mibereki abo Yehova akanza. Thwamabya n’amalengekania wa Yehova, ikikendi thuwathikya erisombolha abanywani babuya.

4. Busana naki Yehova awithe obughabe bw’erisombolha abatholere eribya banywani biwe, kandi ekyaleka Yehova iniahulha Abrahamu mwa munywani wiwe niki?

⁴ Yehova akasombolha ndeke abatholere eribya banywani biwe. Awithe obughabe obw’erikolha eki. Eki kilhangirikire kundi ya Muthabali Mukulhu, n’erimunywana ni lhusunzo olhulengethukireyo. Ibbwa kwesi, ni bahi abakasombolha mw’abanywani biwe? Yehova akayithunda hakuhi n’abo abakamuyikethera n’erimw’ikirirya. Ng’eky’erileberyako, thalengekania oku thatha-kulhu Abrahamu, oyuwabya asibwe busana n’erikirirya liwe erilengethukire. Sihali erilengwako erikalire ng’eribwira omubuthi wuthi ahonge omwana wiwe. * Nomwakine indi Abrahamu ‘mwaha mughalha wiwe Isaka mwa buhere,’ abya inian’ikirirye ndeke ‘ngoku Nyamuhanga angana thoka erilhubukya Isaka okwa baholi.’ (Abaebrania 11:17-19) Kundi Abrahamu mwakangania erikirirya n’obwowa ng’obu, Yehova mwamwahulha mwa ‘mwira wiwe’ kutse munywani.​—Isaya 41:8; Yakobo 2:21-23.

5. Yehova akalhangira athi abakamwowa buthaleghulha?

⁵ Yehova akalhangira obwowa obuthe kw’erileghulha mw’ekindu kikulhu kutsibu. Anzire abandu abathaleghulha embere siwe omwa myatsi yosi. (Soma 2 Samweli 22:26.) Ngoku thwalhangira omwa Sura 1 ey’ekitabu kino, Yehova akatsemera abakathwamu erimwowa kundi bamwanzire. Ekitabu kye Emisyo 3:32 kikabugha kithi, ‘obwira bwiwe buli haghuma n’abathunganene.’ Yehova akakokaya abakaberereraya omwa buthaleghulha eby’akayithagha athi: Banganabya bagheni omwa “hema” yiwe​—ibalighirwa erimuramya n’erimusaba okwa ndambi yosi-yosi.​—Esyonyimbo 15:1-5.

6. Thwanga kangania thuthi ngoku thwanzire Yesu, kandi Yehova akayowa athi busana nabo abanzire Mughalha wiwe?

⁶ Yehova akanza abanzire Yesu, Mughalha wiwe ekyusa. Yesu  mwabugha athi: ‘Omundu amanyanza asyakenga ekinywe kyaghe. Kandi Thatha waghe asyamwanza, nethu thwasyamuhikako, ithwa kokothya obwikalho bwethu haghuma nayu.’ (Yoane 14:23) Thwanga kangania thuthi ngoku thwanzire Yesu? Ahathe erithika-thika omw’ikenga ebihano biwe, imwamuli omubiiri w’erithulira engulhu yuwene n’eriyira abigha. (Matayo 28:19, 20; Yoane 14:15, 21) Kandi thukakanganaya ngoku thwanzire Yesu omughulhu ‘thukakwama olhughobe lhwiwe,’ erimugherererya omwa binywe n’omwa mikolere ngoku thwanga thoka ng’abandu abathahikene. (1 Petero 2:21) Yehova akatsema akalhangira abanzire Mughalha wiwe bakalengaho erikwama olhughobe lhwa Kristo.

7. Busana naki ni ky’amenge erinywana abanywani ba Yehova?

⁷ Erikirirya, erithendileghulha, obwowa, n’erianza Yesu n’emisingyi yiwe, ni bighuma by’okwa mibere eya Yehova akasondaya omwa banywani Biwe. Obuli mundu atholere iniayibulya: ‘Banywani baghe banawithe emibere ng’eyi? Nanabirikolha abanywani ba Yehova mw’abanywani baghe?’ Ni ky’amenge erikolha ekyo. Abandu abakabya n’emibere ng’eya Nyamuhanga kandi ibathulhughania engulhu yuwene n’omuhwa banganabya banywani babuya, ibathuwathikya eriberererya erithwamu lyethu ery’eritsemesya Yehova.​—Lebaya akasanduko “ Omunywani Mubuya Yo Wahi?” okwa lhupapura 29.

8. Ni kyahi ekikakutsemesaya ekihambire okwa bunywani bwa (a) Naomi na Ruta? (b) Abalhwana basathu Abaebrania? (c) Paulo na Timoteo?

⁸ Amasako ali mw’eby’erileberyako binene eby’abo abaghasirawa busana n’erisombolha abanywani babuya. Wangana soma okwa bughuma obwabyaho ahakathi-kathi ka Naomi na mwalyana wiwe Ruta, Abaebrania basathu ababya banywene kutsibu e Babiloni, Paulo na Timoteo. (Ruta 1:16; Danieli 3:17, 18; 1 Abanya Korinto 4:17; Abanya Filipi 2:20-22) Nomwabine, thulebaye ekindi ky’erileberyako ekyuwene: obunywani bwa Dawudi na Yonatana.

9, 10. Ekya kamathaya obunywani bwa Dawudi na Yonatana ni kyahi?

 ⁹ Dawudi abere ab’itha Goliata, e Biblia yikabugha yithi, ‘Yonatana mwanza Dawudi, kandi Yonatana mwamwanza ngoku ayanzire omwa muthima.’ (1 Samweli 18:1) Nomwakine indi sibabya bingene omwa myaka, mubatsuka obunywani obuthe bwanga thwika erihika aho Yonatana aholera omwa malhwa. * (2 Samweli 1:26) Ni kyahi ekya kamathaya obunywani obw’abandu babiri aba?

¹⁰ Erianza Nyamuhanga n’erianza erithendibya bathaleghulha okw’iyo, mukyaleka obunywani bwa Dawudi na Yonatana ibwa kamatha. Abalhume babiri aba mubabya banywani busana n’erianza eritsemesya Nyamuhanga. Obuli mundu mwakangania emibere eyabya yikatsemesya owundi. Ahathe erithika-thika, Yonatana mwatsemesibwa busana n’obuthubaha n’omuhwa owa mulhwana oyu akanganaya buthasaghirira akalhwira erina lya Yehova. Omwa kwenene, Dawudi mwasikya omulhume mukulhu oyu oyuwasighika esyondegheka sya Yehova omwa buthaleghulha n’erihira ebiyithawa bya Dawudi by’embere okwa biwe. Ng’eky’erileberyako, thuthalebya ekyabya kyabere omughulhu Dawudi abya omwa bitsibu akathibitha omwa mbwarara busana n’erisagha erihithana ly’Omwami mubi Saulo, thatha wa Yonatana. Yonatana erikangania obuthaleghulha omwa nzira ey’embaghane, mwalhangira athi akaya ‘eyiri Dawudi n’erisikya omuthima wiwe oku Nyamuhanga.’ (1 Samweli 23:16) Thalengekania Dawudi nga mwayowa athi omughulhu munywani wiwe mwanzwa ayihayo erimuwathikya n’erimuhimba! *

11. Eky’erileberyako kya Yonatana na Dawudi kikakweghesayaki okwa bunywani?

 ¹¹ Eky’erileberyako kya Yonatana na Dawudi kikathweghesayaki? Enzumwa nkulhu eya thuk’igha omwa mwatsi oyu yiri yithi, abanywani batholere ibabya ibawithe ebilhubirirwa bighumerera eby’obunyakirimu. Omughulhu thukanywana abawithe erikirirya ng’eryethu, esyongeso ng’esyethu  n’abanzire erithendi leghulha oku Nyamuhanga, thwangana himbangana n’erisikania emithima. (Soma Abanya Roma 1:11, 12.) Abanywani abatsomene emyatsi ey’obunyakirimu ng’aba bakabanika omwa bikirirya balikyethu. Nomwabine, mbwino eki kikamanyisaya kithi omundu wosi-wosi oyukasa okwa Kisenge ky’Obwami ni munywani mubuya? Eyihi, kwabithe bithya.

12, 13. (a) Busana naki thutholere ithwa sombolha ndeke abanywani nomubangabya ini Bakristayo balikyethu? (b) Ebithunga eby’omwa kighonye ky’erimbere mubyabana kitsibuki, kandi mukyaleka Paulo iniabakunga athiki?

¹² N’omwa kithunga, erithoka eribana abanywani abanga  thuhimba omwa myatsi ey’obunyakirimu, thutholere ithwalhangira thuthi thuka sombolha ndeke. Mbwino eki kinatholere ikya thuswekya? Eyihi nahake. Abandi Bakristayo abali omwa kithunga bangana thwalha buthuku buuli imubakulha-kulhana bunyakirimu, ng’ebindi bighuma ebiri okwa muthi ku byangana thwalha buthuku buuli imubyera. Busana n’ekyo, omwa buli kithunga, Abakrisitayo sibali kulha bunyakirimu okwa lhulengo lhughuma. (Abaebrania 5:12–6:3) Kwesi, thukanganaye eriyitsingirira n’olhwanzo okw’abo abakine bahya-bahya kutse abatseke bunyakirimu, kundi thwanzire eribawathikya erikulha-kulhana.​—Abanya Roma 14:1; 15:1.

¹³ Okwa bundi buthuku, omwa kithunga mwanganabya emibere mirebe eyanga leka ithwa sondekania ndeke abathwanga nywana. Abandi bandu bangana yingirya omwa mitse eyithuwene. Abandi bangana kulha-kulhania omutse ow’erihithana lhuba-lhuba kutse ow’eriyineghenia kutsibu. Ebithunga eby’omwa kighonye ky’erimbere mubyabana ebitsibu ng’ebi. Nomwakine indi abandi babya bathaleghulha, abandi mubatha yithwalha omwa mibere eyithatholere. Kundi abandi ababya omwa kithunga kye Korinto mubatha ghendera okwa syongangirirya sy’Ekikrisitayo, omukwenda Paulo mwakunga ekithunga ekyo athi: ‘Simuthebibawe, kundi abira babi bakatsandaya omuthima mubuya.’ (1 Abanya Korinto 15:12, 33) Omukwenda Paulo mwakunga Timoteo athi n’omwa Bakrisitayo balikyethu mwanganabya abo abathekolha ebitholere. Timoteo mwahanwa indi ayitheghaye okwa bandu ng’abo, erithendi bakolha mwa banywani biwe.​—Soma 2 Timoteo 2:20-22.

14. Thwanga kolesya thuthi omusingyi owali omw’ikunga lya Paulo owahambire okwa manywani?

¹⁴ Thwanga kolesya thuthi omusingyi owali omw’ikunga lya Paulo? Omw’ithendi nywana omundu wosi-wosi oyuli omwa kithunga kutse oyuthemu​—oyuwanga thutsandya. (2 Abanya Tesalonika 3:6, 7, 14) Thutholere ithwatheya obunyakirimu bwethu. Wibuke, ng’epamba, thukanyunyira  kutse erigherererya emibere n’emitse ey’abanywani bethu. Kine ngoku thuthe thwanga hira epamba y’omwa maghetse owakinire, thukalengekania thuthi yikendi osulha mw’amaghetse owahenirye, kuthya sithwanga siba n’abandu babi thukalengekania thuthi bakendi thweghesya emibere mibuya.​—1 Abanya Korinto 5:6.

15. Ni kyahi ekya wangakolha eribana omwa kithunga mw’abanywani abakatsomana eby’obunyakirimu?

¹⁵ Eky’obutseme, thwangana thoka eribana abanywani abawithe emibere mibuya omwa baramya balikyethu. (Esyonyimbo 133:1) Wanga thoka wuthi eribana abanywani abatsomene eby’obunyakirimu omwa kithunga? Wune mukulha-kulhania emibere eya Nyamuhanga akanza, ahathe erithika-thika abandi abawithe amalengekania ng’aya bakendianza erikunywana. Okwa ndambi iyan’eyo, kyangana kuyithaghisya erithwalha olhukwamirwa olhw’erisondya abanywani bahya-bahya. (Lebaya akasanduko “ Ngoku Thwabana Abanywani Babuya,” okwa lhupapura 30.) Sondekanaya abawithe emibere eya wukanza erigherererya. Owa erihabulha lye Biblia ‘ery’erikangania ebiri omwa mithima yethu’ omw’isondekania abanywani omwa bikirirya balikyethu nomubangabya b’eyindi rangyi kutse erindi ihanga. (2 Abanya Korinto 6:13; soma 1 Petero 2:17.) Siwuyibohere okwa b’emyaka yawu basa. Wibuke ngoku Yonatana abya mukulhu kutsibu oku Dawudi. Wamanywana abakulire iwukendi minya bingyi.

16, 17. Omwikirirya mulikyethu amathuhithania omwa nzira yosi-yosi, busana naki sithutholere thukalhua omwa kithunga?

¹⁶ Okwa bundi buthuku, ebitsibu ibyangana buthukaho kundi omwa kithunga muli abandu abawithe emibere muthina-muthina n’abakulira omwa mibere muthina-muthina. Omwikirirya mulikyethu angana bugha kutse iniakolha ekindu ekikendi thuhithania. (Emisyo 12:18) Okwa bundi buthuku ebitsibu bikabuthuka busana n’abandu eribya n’emibere  muthina-muthina, erithendi yitheghererania, kutse erithendi lighirana. Mbwino emyatsi ng’eyi yine mwendileka ithwa thwikalha neryo ithwayihighulha okwa kithunga? Sithwanga kolha eki thwamabya kwenene ithunanzire Yehova n’abo anzire.

¹⁷ Kundi Yehova y’Omuhangiki wethu kandi Yukathuha Engebe, thutholere ithwa mwanza n’erimukolera n’omuthima wethu wosi. (Eribisulirwa 4:11) Eryongera okw’ekyo, thutholere ithwa sighika ekithunga ekya anzire erikolesya. (Abaebrania 13:17) Kwesi omwikirirya mulikyethu amathuhithania kutse amathukolha nabi omwa nzira yosi-yosi, sithutholere thukalhua omwa kithunga thukanza erikangania erihithana lyethu. Sihali ekyangaleka ithwakolha eki. Yehova yuthalya thuhithanaya. Thwamabya ithunanzire Yehova isithwanga musighania kutse erisighania abandu biwe!​—Soma Esyonyimbo 119:165.

18. (a) Ni kyahi ekya thwanga kolha erilhangira thuthi omwa kithunga mukabya imune obuholho? (b) Erithwamu erighanyira omundu omughulhu hali enzumwa mbuya eyangaleka iwakolha ekyo, likalhwiririra mw’emighisa yahi?

 ¹⁸ Erianza abikirirya balikyethu kikaleka ithwa lengaho erilhangira thuthi omwa kithunga mukabya imune obuholho. Yehova Nyamuhanga syali thwalha abandu ng’abahikene, nethu kwa thutholere ithwabya thuthya. Olhwanzo lhukaleka ithutha thungerera obuli kasobyo aka mulikyethu angakolha, kandi ilhwaleka ithw’ibuka ngoku ithwe bosi sithuhikene kandi thukasobaya. (Emisyo 17:9; 1 Petero 4:8) Olhwanzo busana na balikyethu lhukaleka ithwa lholha embere ‘erighanyirana.’ (Abanya Kolosai 3:13) Mughulhu mungyi si kyolhobire erikolesya erihano eri. Thwama lengekania kutsibu okwa bya babirithusoberya, ikyangana leka ithwabya ithuna hithene, obundi erilengekania thuthi erihithana lyethu likendibya irikasuyira oyulya thusoberaya. Nomwabine, ekwenene yiri yithi, eribika ekinigha kikathuhuthalhaya omwa muthima. Erithwamu erighanyira omughulhu hali enzumwa mbuya eyangaleka iwakolha ekyo, kikalhwiririra mw’emighisa mingyi. (Luka 17:3, 4) Kikaleka ithwa humulikana omwa birengekanio n’omwa muthima, omwa kithunga imwabya obuholho, n’ekikulhu kutsibu, kikaleka ithwabya ithune n’engolangana mbuya na Yehova.​—Matayo 6:14, 15; Abanya Roma 14:19.

19. Ni mibere yahi eyanga buthukaho eyangaleka ithwa yihighulha okw’ikolangana n’omundu mulebe?

¹⁹ Okwa bundi buthuku, thwangana bwirwa indi thulekeraho erikolangana n’omundu oyulhue mughuma w’okw’ithwe omwa kithunga. Eki kikabya omughulhu omundu oyukathwa ebihano bya Nyamuhanga ahathe eriyisubamu akahighithawa omwa kithunga kutse omughulhu omundu akaghana ekwenene neryo iniatsuka erikangirirya esyongangirirya sy’amabehi kutse iniayighabulha okwa kithunga. Ekinywe kya Nyamuhanga  kikathubwira ndeke-ndeke kithi ‘sithuthambe’ n’abandu ng’abo. * (Soma 1 Abanya Korinto 5:11-13; 2 Yoane 9-11) Kyangana kalha eriyihighulha okwa mundu obundi oyulhue munywani wethu kutse muhughu wethu. Thune mwendithwamu erikangania ngoku thuli bathaleghulha oku Yehova kandi ngoku thukasighika ebihano biwe kwilhaba ekindu kyosi-kyosi? Wibuke ngoku Yehova akayithagha obuthaleghulha n’obwowa.

20, 21. (a) Busana naki endegheka ey’erihighitha abandu ni y’olhwanzo? (b) Busana naki ni kikulhu erisombolha abanywani bethu ba ndeke?

²⁰ Erihighitha omundu y’omwa kithunga ni ndegheka y’olhwanzo erilhua oku Yehova. Busana naki ikyabya ikwa kiri kithya? Erihighitha omukolha nabi oyutheyisubamu ni kindu ekikakanganaya olhwanzo busana n’erina lya Yehova eribuyirire n’ekya lik’imanira. (1 Petero 1:15, 16) Erihighitha abakolha nabi kikaleka ekithunga ikyabya ikina henirye. Abakrisitayo abathaleghulha bakatheghibawa okwa bakolha nabi abanga batsandya nuku banga lholha embere n’eriramya lyabu ibanasi ngoku ekithunga sikiri mw’akabi kosi-kosi erilhua omwa kihugho kibi kino. (1 Abanya Korinto 5:7; Abaebrania 12:15, 16) Erisuyirwa erikalire eryʼerihighitha omukolha nabi yʼomwa kithunga likakanganaya omukolha nabi ngoku anzibirwe. Bwanganabya ibw’obuwathikya obw’akayithagha nuku aminye ngoku atholere iniakolha esyombinduka esyanga leka iniasuba oku Yehova.​—Abaebrania 12:11.

²¹ Ekwenene yiri yithi, abanywani bethu bangana thubindulha erikolha ebibuya kutse ebibi. Neryo kwesi, ni kikulhu erisombolha abanywani bethu ba ndeke. Thwamanywana abanywani ba Yehova, erianza aba Nyamuhanga anzire, ithukendibya n’abanywani babuya. Ebya thwanga bighirako ibikendi thuwathikya erilholha embere eritsemesya Yehova.