Iwe Wanzire Yehova:

Yesu mwabugha athi, ‘wasyaminya ekwenene, n’omwatsi w’ekwenene asyakuha obwiranda.’ (Yoane 8:32) Ebinywe ebi ka bikahimba kutsibu! Inga, kithokekene eriminya ekwenene, nibya n’omwa mighulhu eyikalire eno ‘ey’ebiro by’enyuma-nyuma’ omughulhu amabehi akanyirire. (2 Timoteo 3:1) Wun’ibukire omughulhu watsuka eriminya ekwenene ngoku yikasoborerawa omwa Ekinywe kya Nyamuhanga? Ekyo ka kyangabya imukya kutsemesya kutsibu!

Nomwabine, ngoku kine ky’omughaso eribya n’eriminya erihikire ery’omwatsi w’ekwenene n’erithulira gho abandi mughulhu wosi, kwa kine ky’omughaso kithya erihambania emibere yethu n’ekwenene eyo. Erithoka erikolha ekyo, thutholere ithwayibika omw’olhwanzo lhwa Nyamuhanga. Eki mwamuli ki? Ebinywe ebya Yesu abugha omwa kiro athali aholha bikasubiraya okwa kibulyo eki. Mwabwira abakwenda biwe abathaleghulha athi: ‘Mwamakenga ebihano byaghe, mwasy’ikalha omw’olhwanzo lhwaghe, ngoku naghe nabirikenga ebihano bya Thatha waghe, neryo nyikere omw’olhwanzo lhwiwe.’​—Yoane 15:10.

Wukiminye ngoku Yesu mwathoka er’ikalha kutse eriyibika omw’olhwanzo lhwa Nyamuhanga kundi mwakenga ebihano bya Thatha wiwe. Nethu thutholere ithwa kolha thuthya munabwire. Erithoka eriyibika omw’olhwanzo lhwa Nyamuhanga, thutholere ithwa kolesya ekwenene y’omwa syongebe syethu buli kiro. Omwa kiro ikya n’ekyo, Yesu mwabugha athi: ‘Mwamaminya emyatsi eyi, muli n’obutseme mwamakolhayo.’​—Yoane 13:17.

Thuwithe amaha thuthi ekitabu kino kikendi kuwathikya erilholha embere erikolesya ekwenene y’omwa ngebe yawu nuku wanga yibika ‘omw’olhwanzo lhwa Nyamuhanga iwuna lindirire engebe y’erikotha.’​—Yuda 21.