1-3. (a) Ni kihembo kyahi ekya Yehova abirithuha, kandi kyanga kolesibwa kithi nabi? (b) Erithoka eriyibika omo lhwanzo lhwa Nyamuhanga, thutholere ithwa kolesya thuthi ekihembo eky’erikania?

WAMAHA omundu oyuwanzire y’ekihembo, wanga yowa wuthi amakikolesya nabi omw’ikighenderera? Thuthabugha thuthi muwamuha epikipiki, neryo iwaminya ngoku mwakaghendaya yo kithya-kithya, n’eritomengera abandu. Isiwendi yiponera?

² Amaaka aw’erikania ebyuwene ni kihembo ekikalhua oku Yehova, Oyukaha ‘obuli lhusunzo lhubuya n’obuli lhusunzo olhuwene.’ (Yakobo 1:17) Ekihembo ekithe omwa bisoro eki, kikathuthokesaya eribwira abandi b’amalengekania ethu n’eriyowa lyethu. Aliriryo, ng’epikipiki, ekihembo eky’erikania kyangana kolesibwa nabi. Ka kyanga ponesya Yehova thwamakania kithya-kithya, erileka abandi ibahithana n’eriyowa nabi!

³ Erithoka eriyibika omo lhwanzo lhwa Nyamuhanga, thutholere ithwa kolesya ekihembo ky’erikania ngoku Oyuwathuha kyo abya anzire ithwa kikolesya. Yehova akathubwira ndeke-ndeke ngoku thwanga kania omwa nzira eyanga mutsemesya. Ekinywe kiwe kibugha kithi: ‘Si mubughe ebinywe ebithisirire, nikwa mubughe ebinywe bibuya ebikawathikaya n’erihimba abandu, ebikaha olhukogho okwa bandu abakowa.’ (Abanya Efeso 4:29) Thulebaye ekyanga leka ithwa theya emikanirye yethu, nga ni binywe ki ebya thutholere ithwa yihighulhako, kandi ngoku thwanga kania ebinywe ‘bibuya ebikahimba abandi.’

4, 5. Emisyo mirebe eyiri omwa Biblia yikakanaya yithi okwa maaka w’ebinywe?

⁴ Enzumwa nkulhu eyanga leka ithwa theya emikanirye yethu yiri yithi ebinywe biwithe amaaka. Emisyo 15:4 hakabugha hathi: ‘Olhulimi lhw’erilhamya ni muthi w’engebe, nikwa olhuhengemire mulho lhukabbuna omuthima.’ Amaghetse ngoku akanasubaya omuthi owabirihonga, kuthya n’olhulimi olhukakanaya ebyuwene lhwangana humulikania omuthima w’abakabihulikirira. Erithendi sosana n’ekyo, ebinywe ebithuwene eby’olhulimi olhuhengemire byangana bbuna omuthima w’abandi. Omwa kwenene, ebinywe ebya thukakanaya biwithe amaaka aw’erihuthalya kutse erilhamya.​—Emisyo 18:21.

⁵ Erikania ndeke-ndeke okwa maaka w’ebinywe, owundi musyo akabugha athi: ‘Hali oyukabugha buthalengekania ng’eritsimitha ly’omuyali.’ (Emisyo 12:18) Eribugha lhuba-lhuba butsira erilengekania kyangana huthalya omundu y’omwa muthima kandi ikya tsandya obunywani. Ebinywe ebiri ng’omuyali bine byathatsimitha omuthima wawu? Okwa lhundi lhuhandi, omusyo iwan’oyu akabugha athi: ‘Olhulimi lhw’ab’amenge ni lhamya.’ Ebinywe ebyuwene eby’omundu oyukakanganaya amenge awakalhua oku Nyamuhanga byangana suba-subania omuthima owasirikalire n’eryuwania  obunywani. Wangan’ibuka omughulhu omundu akukaniraya ebinywe ebikahumulikanaya n’ebikahimba? (Soma Emisyo 16:24.) Eriminya ngoku ebinywe ebikakanibawa biwithe amaaka, kikendi leka ithwanza erikolesya ebinywe ebikahimba abandi, butsira eribasirikalirya.

6. Busana naki si kyolho eritheya olhulimi lhwethu?

⁶ Nomuthwanga lengaho thuthi, sithwanga thoka eritheya olhulimi lhwethu lhwa ndeke-ndeke. Kwesi, thulebaye enzumwa eyakabiri eyanga leka ithwa theya emikanirye yethu: Ekibi n’obuthahikana bikaleka ithwa kolesya olhulimi lhwethu lhwa nabi. Omuthima w’akalhua mw’ebya thukabugha, kandi ‘amalengekania w’omuthima w’omundu ni mabi.’ (Enzuko 8:21; Luka 6:45) Busana n’ekyo, erikakirya olhulimi lhwethu si kyolho. (Soma Yakobo 3:2-4.) Nomwathuthe thwanga thoka eritheya olhulimi lhwethu lhwa ndeke-ndeke, thwangana lholha embere erilengaho erithoka erilhukolesya ndeke. Ngoku oyukaziha omwa lhusi mwa bweruka akarwanisaya omuhurumuko w’amaghetse, kuthya nethu thutholere ithwahira h’akaghalha k’erirwanisya amalengekania w’ekibi aw’erikolesya olhulimi lhwethu lhwa nabi.

7, 8. Omwa meso wa Yehova, ni kabiki akanga lhwiririra omwa bya thukabugha?

⁷ Enzumwa eyakasathu eyanga leka ithwa theya emikanirye yethu yiri yithi thuli b’erilhuthonda embere sya Yehova busana n’ebinywe byethu. Emibere eya thukakoleseraya mw’olhulimi lhwethu siyiri hamba okwa bughuma bwethu n’abandi lisa, aliriryo yikahamba n’okwa nkolangana yethu na Yehova. Yakobo 1:26 hakabugha hathi: ‘Omundu amaghanirya athi akakwama ekisomo kya ndeke, nikwa isialikunga olhulimi lhwiwe, akayitheba, n’ekisomo kiwe ni kya busa.’ * Ngoku thwalhangira omwa sura eyihwere, emikanirye yethu yihambangene ndeke-ndeke n’eriramya lyethu. Thwamathendi kunga kutse erikakirya olhulimi lhwethu​—eribugha emithububu, ebinywe by’obutwa​—emibiiri yethu yosi  ey’Ekikrisitayo eya thukakolha iyikendibya ini buyira omwa meso wa Nyamuhanga. Mbwino eyi si nzumwa mbuya eyanga leka ithwa lengekania kutsibu okwa binywe byethu ebya thukabugha?​—Yakobo 3:8-10.

⁸ Ahathe erithika-thika, thunawithe esyonzumwa mbuya esyanga leka ithwayitheya okw’ikolesya ekihembo ky’erikania kya nabi. Thuthe thwalebya emikanirye eyikahimba, thutsuke erikania okwa mikanirye eyo Omukristayo ow’okwenene atholere iniayihighulhako.

9, 10. (a) Munabwire, ni mibughire yahi eyoswire omwa bandu eya mabiribya ya buli kiro? (b) Busana naki sithutholere thukakolesya ebinywe ebithisirire? (Lebaya n’omwatsi ahikwa.)

⁹ Ebinywe by’esisoni. Eritsuma, eribugha emithububu, n’ebindi binywe eby’esisoni biswire omwa mibughire eya buli kiro ey’abandu abamunabwire. Abangyi bakanathwamu erikolesya ebinywe by’esisoni bakakania kutse ibabikolesya kundi sibawithe kindi kinywe ekitholere ekya banga kolesya. Abandu abakanza erisekya abandi mughulhu mungyi bakakolesaya ebinywe by’esisoni ebihambire okwa myatsi y’engyingo. Aliriryo, ebinywe by’esisoni si mwatsi w’erisekera. Emyaka nga 2,000 eyihwere, omukwenda Paulo oyuwasondolhawa n’omulimu abuyirire mwahabulha ekithunga ekye Kolosai athi kiyihighule ‘okw’ibugha ebithisirire.’ (Abanya Kolosai 3:8) Paulo mwabwira ekithunga kye Efeso athi ebinywe “eby’erisekererya” ni bighuma by’okwa bindu ebithatholere ‘eryahulhwa’ n’Abakrisitayo ab’ekwenene.​—Abanya Efeso 5:3, 4.

¹⁰ Ebinywe ebithisirire bikahithanaya Yehova. Kandi bikahithanaya abamwanzire. Ni kwenene, erianza Yehova likaleka ithwa thakania ebithisirire. Paulo abere akathondogholha ‘emikolere y’omubiri,’ mwahiramu ‘n’obukine,’ omwangabya imwamuli erikania ebithisirire. (Abanya Galatia 5:19-21) Oyu ni mwatsi akalire. Omundu angana highithwa omwa kithunga bamabya ibane mubere erimuhabulha aliriryo inialholha  embere erikolesya ebinywe by’esisoni, eby’eritsuma, n’ebithisirire. *

11, 12. (a) Erikania okwa bandi mwamuliki, kandi lyangabya lithi lhuthongo? (b) Busana naki abaramya ba Yehova batholere ibayihighulha okw’ihangirira abandi?

¹¹ Olhuthongo, erihangirira. Erikania okwa bandu mwamuli erikania okwa bibahambireko. Mbwino erikania lyosi-lyosi okwa mundu nina lhuthongo? Eyihi. Silhwangabya lhuthongo thwamabya ithukakanaya okwa myatsi eyuwene n’eyikahimba, ng’erikania okwa yuwabatizibawa lino-lino nga nindi kutse nga nindi oyukayithagha erihumulikanibwa. Abakrisitayo ab’omwa kighonye ky’erimbere ibakatsomana kutsibu emibere ey’abandi balimu neryo ibakania oko mwatsi owahambire oko balikyabo. (Abanya Efeso 6:21, 22; Abanya Kolosai 4:8, 9) Aliriryo erikania okwa bandi ilhwanganabya lhuthongo mwamabya eribakaniako eby’amabehi kutse eribisulha emyatsi yabu y’embitha. Ekyakabi kutsibu, olhuthongo olhu lhukakolhaya n’okwitsandya okwa mundu kw’erina. Erihangirira “ly’erikania okwa mundu kw’omwatsi w’amabehi . . . ow’akamutsandaya kw’erina.” Ng’eky’erileberyako, Abafarisayo mubathwamu erithulha amabehi bakanza eritsandya oku Yesu kw’erina. (Matayo 9:32-34; 12:22-24) Eritsandya erina ly’omundu mughulhu mungyi likaletha amalhwa.​—Emisyo 26:20.

¹² Erikolesya ekihembo eky’erikania omw’itsandya okwa bandi kw’erina kutse erilethaho erighabulhana, ni mwatsi akalire embere sya Yehova. Aponire abakaletha ‘amalhwa omwa kathi-kathi k’abaghalha babu.’ (Emisyo 6:16-19) Ekinywe ky’Ekigiriki ekikabindulhawa mwa ‘omuhangiriri’ ni di·aʹbo·los, nalyo ni rina lya Sitani. Iyo ni “Diabolo,”  omuhangiriri wa Nyamuhanga. (Eribisulirwa 12:9, 10) Omwa kwenene thutholere ithwa yihighulha okwa mibughire eyangaleka ithwabya nga Diabolo. Omwa kithunga si mutholere mukabya abandu abakahangirira abandi erileka ihabya emikolere ey’omubiri ‘ng’erineghena’ n’erighabulhana. (Abanya Galatia 5:19-21) Busana n’ekyo, wuthe wa kania mwatsi mulebe okwa mundu, yibulhaye: ‘Nina kwenene? Nina ky’olhwanzo erithasyakania oko mwatsi oyu? Mbwino kinatholere eribwira omwatsi oyu w’abandi?’​—Soma 1 Abanya Tesalonika 4:11.

13, 14. (a) Ebinywe by’eritsuma byangana leka abakatsumawa ibayowa bathi? (b) Busana naki omundu oyukabugha ebinywe eby’eritsuma abandi akayihira omwa kabi?

¹³ Ebitsumi. Ngoku thwabirilhangira, ebinywe biwithe akaghalha ak’erihuthalya. Ni kwenene, busana n’obuthahikana bwethu, okwa bundi buthuku ithwe bosi hakanayira ithwayikubya bwomo busana n’ebya thulya bugha. Nomwabine, e Biblia yikakunga okwa mikanirye mirebe eyithatholere erikanibwa nahake omw’eka y’Omukristayo n’omwa kithunga. Paulo mwakunga Abakrisitayo athi: ‘Mughuse hali erikaliha lyosi, n’eriaghalirwa lyosi, muleke olhukanda, n’ebitsumi byosi.’ (Abanya Efeso 4:31) Omwa sindi mbindulha ekinywe “ebitsumi” kikabindulhawa mwa “ebinywe bibi,” kutse “ebinywe by’erihithania.” Ebinywe by’eritsuma​—imwamuli n’amena aw’eritsotsomererya n’eribera erikuthya omundu​—kyangan’iha omwa bandi mw’ekitsumbi n’erileka ibayilhangira ng’abathawithe mughaso. Kwilhabirirya, ebinywe by’eritsuma bikabbuna kutse erinyobokya emithima ey’abaana balere.​—Abanya Kolosai 3:21.

¹⁴ Omw’ikolesya ebinywe ebikalire, e Biblia yikatsweba eritsuma​—omutse ow’eritsamba abandi omwa binywe eby’erihemya-hemya, kutse eby’erihemulha. Omundu oyukabere erikolesya ebinywe ng’ebi akayihira omwa kabi, kundi omutsumi angana highithwa omwa kithunga amathendi hulikirira erihabulha erya bakabera erimuha erimuwathikya erihindulha emibere yiwe. Kandi angana thalha okwa mighisa y’Obwami, mbwino iniana lyabindulha emibere yiwe. (1 Abanya  Korinto 5:11-13; 6:9, 10) Kwesi, kilhangirikire ngoku thuthe thwangabya omo lhwanzo lhwa Nyamuhanga thwamabera erikania ebinywe ebithisirire, eby’amabehi, kutse ebithe by’olhwanzo. Emikanirye ng’eyi yikahimbulha.

15. Ni mikanirye yahi eyiri mw’ebinywe ‘bibuya ebikahimba abandu’?

¹⁵ Thwanga kolesya thuthi ekihembo eky’erikania ngoku Oyuwathuha kyo abya anzire ithwakikolesya? Wibuke ngoku Ekinywe kya Nyamuhanga kikathuhana kithi thubughe ‘ebinywe bibuya ebikawathikaya n’erihimba abandu.’ (Abanya Efeso 4:29) Yehova akatsema akalhangira thukakania ebinywe ebikahimba abandi, eribahira mw’omuhwa n’eribaghumya. Erikania ebinywe ng’ebi, wutholere iwatsuka erilengekania ndeke. E Biblia siyiri hira h’ebilhaghiro birebe eby’erikwama; kandi siyiri thondogholha emikanirye mirebe eyitholere erikolesibwa eyiri ‘mw’ebinywe ebithunganene.’ (Tito 2:8) Erikania ebinywe ‘bibuya ebikahimba,’ thutholere ithwabya ithun’ibukire esyonzumwa isathu nyolho-nyolho aliriryo ini sy’omughaso esikakanganaya emikanirye eyikahimba: ebinywe ebyuwene, eby’ekwenene, n’eby’olhwanzo. Wune mulengekania okwa syonzumwa esi, thulebaye eby’erileberyako birebe eby’emikanirye eyikahimba abandi.​—Lebaya akasanduko “ Emikanirye Yaghe Yikanahimba Abandi?”

16, 17. (a) Busana naki thutholere ithwa sima abandi? (b) Ni bindu nga byahi ebyangaleka ithwasima abandi omwa kithunga? omw’eka?

¹⁶ Erisima erikalhua omwa muthima. Yehova na Yesu bakyasi ngoku ni kibuya erikania ebinywe eby’erisima n’eby’eritsemera omundu. (Matayo 3:17; 25:19-23; Yoane 1:47) Nethu ng’Abakrisitayo, thutholere ithwa sima abandi erilhua omwa muthima. Busana naki? Emisyo 15:23 hakabugha hathi, ‘Ekinywe omwa mughulhu uwene ni kibuya kingahi!’ Yibulhaye: ‘Ngayowa indi omughulhu nga simawa? Mbwino sikirileka nga yowa ndeke n’erinyihira mw’omuhwa?’ Omwa kwenene, erikusima erikalhua omwa muthima likaleka iwaminya ngoku omundu ane mulhangira ebya wukakolha,  ngoku akutsomene, kandi akaghalha akawulyahiraho ngoku sikathakwa busa. Erikusima ng’eri likaleka iwasika omwa muthima kandi likakuhira mw’omuhwa ow’erithasyakolha ndeke omwa buthuku bw’embere. Kyamabya ikika kutsemesaya bakakusima, mbwino nawu siwanga sima abandi?​—Soma Matayo 7:12.

¹⁷ Yibegheresaye erisondya ebibuya by’omwa bandi, neryo wanabasima. Omwa kithunga, wangana hulikirira omukania owalya hebawa ndeke, iwalhangira omunyethu oyune mukulha-kulhana bunyakirimu, kutse iwalhangira omundu oyukulire oyukahindana okwa mihindano buthaleghulha nomwakine indi akalemererawa busana n’erikekelhuha. Erisima abandu ng’aba kyangana sikya emithima yabu kandi ikya bahimba bunyakirimu. Omw’eka, omulhume n’omukali bakanza bowe ebinywe by’erisima erilhua okwa wundi. (Emisyo 31:10, 28) Kwilhabirirya abaana bakayowa ndeke bamaminya ngoku babatsomene kandi ebya bakakolha ngoku bikasimawa. Ngoku omuthi akayithagha omwisi n’amaghetse, kuthya, abaana bakayithagha erisimwa n’erikanibwako ndeke. Ababuthi, musondaye esyonzira syosi-syosi esya mwanga simira mw’abaana benyu busana n’emibere yabu mibuya n’ebya bakakolha. Erisima ng’eri lyangana hira omwa baana benyu mw’omuhwa, iryaleka ibasika n’erilengaho kutsibu erikolha ebihikire.

18, 19. Busana naki thutholere ithwa lengaho erihimba n’erihumulikania abikirirya balikyethu, kandi thwanga kikolha thuthi?

¹⁸ Erihimba n’erihumulikania. Yehova akatsomana kutsibu ‘abakayikehaya’ n’abawithe ‘omuthima owakwire obulighe.’ (Isaya 57:15) Ekinywe kiwe kikathuhana kithi ‘thusikanaye’ ‘n’erihamirya ab’omuthima owasikerere.’ (1 Abanya Tesalonika 5:11, 14) Thutholere ithwa kiminya ngoku Nyamuhanga akalhangira n’eritsemera akaghalha akathukahiraho erihumulikania n’erikirania abikirirya balikyethu abali omwa bulighe.

¹⁹ Aliriryo ibbwa, ni byahi ebya wanga kania wukahimba Omukristayo mulikyenyu oyulhuhire omwa muthima kutse  oyulirikene? Si wulengekanaye wuthi wukathekawa erighunza h’ekitsibu ekiriho. Mughulhu mungyi, ebinywe byolho-byolho bikawathikaya kutsibu. Kanganaya ngoku wutsomene kutsibu oyusirikalire omwa muthima. Saba n’omundu ng’oyu omwa mulenge owakowika; wangana lemba-lemba Yehova wuthi amuwathikaye eriminya ngoku Nyamuhanga n’abandi bamwanzire kutsibu. (Yakobo 5:14, 15) Mughumaye wuthi eribyaho liwe omwa kithunga ni ry’omughaso munene. (1 Abanya Korinto 12:12-26) Musomere erisako erikahimba angaminya ngoku Yehova amutsomene kutsibu. (Esyonyimbo 34:18; Matayo 10:29-31) Erighunza obuthuku obukaghunza iwune mukania ‘ekinywe kibuya’ n’abawithe amalighe omwa muthima n’erikania ebikalhua omwa muthima wawu, ahathe erithika-thika kikendi muwathikya eriyowa ngoku anzibirwe kandi ngoku akasimawa.​—Soma Emisyo 12:25.

20, 21. Ni nzumwa syahi esikaleka erihabulha irya ghasa?

²⁰ Erihana eryanga ghasa. Kundi sithuhikene, ithwe bosi thutholere ithwabya ithune muhabulhwa. E Biblia yikathubwira yithi: ‘Uhulikirire erihanwa, wangirire erikangiriribwa; iwaminya eribya n’amenge okwa biro byawu by’enduli.’ (Emisyo 19:20) Erihana abandi siry’abasyakulhu basa. Ababuthi bakahana abaana babu. (Abanya Efeso 6:4) Bali bethu abakulire bunyakirimu bangana hana abakali abalere. (Tito 2:3-5) Erianza abandi likaleka ithwanza erihabulha omwa mibere  eyanga leka oyukahabulhawa iniathayowa nabi. Ni kyahi ekyanga thuwathikya erihabulha omwa mibere ng’eyi? Thulebaye esyonzumwa isathu esikaleka erihabulha irya ghasa: ekilhubirirwa ky’oyukahana, ekikaleka iniahana, n’emibere ey’erihanwa likaheberawamu.

²¹ Erihabulha erikaghasa likasighikira okwa muhabuli. Yibulhaye, ‘Kikanyanguhira eriligha erihabulhwa iriryahebawa omwa mibere eyisosire yithi?’ Kyangana kwa nguhira, wamakiminya ngoku oyukakuhabulha akutsomene, ngoku syali kuhabulha busana n’ekinigha eky’awithe, kandi ngoku athawithe ekilhubirirwa kibi. Omughulhu nawu wukahabulha abandi, mbwino nawu eki sikyangabya kilhubirirwa kyawu? Kandi n’erihabulha eryuwene ly’eriseghemere okwa Kinywe kya Nyamuhanga. (2 Timoteo 3:16) Mbulha thwamasoma omwa Biblia kutse eyihi, erihabulha lyethu eryosi litholere iryabya iriseghemere okwa Masako. Busana n’ekyo, abasyakulhu batholere ibayitheya okw’ibya nga bamakaka omundu erikwama amalengekania wabu; kandi sibatholere bakahengemya Amasako, neryo ikyabya e Biblia nga yikasighika ebirengekanio byabu ng’abandu. Erihabulha likatha syaghasa kutsibu lyamahebwa omwa mibere eyitholere. Kyolhobire eriligha erihabulha eriryahebawa omwa lhwanzo kandi kikaleka oyukahabulhawa iniabya iniane n’ekitsumbi kiwe.​—Abanya Kolosai 4:6.

22. Erithwamu lyawu ni ryahi erikwamana n’omwatsi ow’erikolesya ekihembo eky’erikania?

²² Omwa kwenene, erikania ni kihembo eky’obughuli erilhua oku Nyamuhanga. Erianza Yehova litholere irya leka ithwakolesya ekihembo eki kya ndeke butsira nabi. Thwibuke ebinywe ebya thukabwira abandi ngoku biwithe akaghalha​—akaghalha ak’erihimba kutse erihimbulha. Kwesi, thulengeho kutsibu erikolesya ekihembo eki ngoku Oyuwathuha kyo abya anzire ithwa kikolesya​—‘erihimba abandu.’ Omwa nzira eyi, emikanirye yethu iyikendi himba n’erihumulikania abali hakuhi nethu kandi ikikendi thuwathikya eriyibika omo lhwanzo lhwa Nyamuhanga.